Paippalāda-Saṃhitā · Chapter 16.35

yāṃ kalpayanti vahatau
vadhūm iva viśvarūpāṃ
hastakṛtāṃ cikitsavaḥ |
sārād etv apa nudāma enān ||

śīrṣaṇvatīṃ payasvatīṃ
karṇinīṃ kṛtāṃ kṛtyākṛtā
saṃbhṛtāṃ viśvarūpām |
pratyak prati pra hiṇmasi
yaś cakāra tam ṛcchatu ||

śūdrakṛtā rājakṛtā
strīkṛtā brahmabhiḥ kṛtā |
jāyā patyā nutteva
kartāraṃ bandhum ṛcchatu ||

anayāham oṣadhyety ekā ||

kṛtyāḥ santu kṛtyākṛte
śapathāḥ śapathīvne |
pratyak prati pra hiṇmasi
yaś cakāra tam ṛcchatu ||

pratīcīna āṅgiraso
'dhyakṣo naḥ purohitaḥ |
pratīcīḥ kṛtyā ākṛtya-
-amuṃ kṛtyākṛtaṃ jahi ||

yas tvovāca parehīti
pratikūlam udāyyam |
taṃ kṛtye 'bhi ni vartasva
māsmān iccho anāgasaḥ ||

yas te parūṃṣi saṃdadhau
rathasyeva vibhur dhiyā |
taṃ gaccha tatra te +'yanam
ajñātas te 'yaṃ janaḥ ||

ye tvā kṛtyā ālebhire
vidvalā abhicāriṇaḥ |
vidmedaṃ kṛtyādūṣaṇaṃ
prativartma punaḥsaraṃ
tena tvā snapayāmasi ||

yad durbhagāṃ prasnapitāṃ
mṛtavatsām upeyima |
apaitu sarvaṃ mat pāpaṃ
draviṇaṃ mopa tiṣṭhatu ||