પૈપ્પલાદ-સંહિતા · અધ્યાય 16.36

યત્ તે પિતૃભ્યો દદતો
યજ્ઞે વા નામ જગૃહુઃ ।
સંદેશ્યાત્ સર્વસ્માત્ પાપાદ્
ઇમા મુઞ્ચન્તુ ત્વૌષધીઃ ॥

દેવૈનસાત્ પિત્ર્યાન્ નામગ્રાહાત્
સંદેશ્યાદ્ અભિનિષ્કૃતાત્ ।
મુઞ્ચન્તુ ત્વા વીરુધો વીર્યેણ
બ્રહ્મણ ઋગ્ભિઃ પયસ ઋષીણામ્ ॥

યથા વાતશ્ ચ્યાવયતિ ભૂમ્યા
રેણુમ્ અન્તરિક્ષાચ્ ચાભ્રમ્ ।
એવાસ્મત્ સર્વં દુર્ભૂતં
બ્રહ્મનુત્તમ્ અપાયતિ ॥

અપ ક્રામ નાનદતી
વિનદ્ધા ગર્દભીવ ।
કર્તૄન્ નક્ષસ્વેતો નુત્તા
બ્રહ્મણા વીર્યાવતા ॥

અયં પન્થાપિ નયામિ ત્વા કૃત્યે
પ્રહિતાં પ્રતિ ત્વા પ્ર હિણ્મઃ ।
તેનાભિ યાહિ ભુઞ્જત્ય્ અનસ્વતીવ
વાહિની વિશ્વરૂપા કુરૂટિની ॥

પરાક્ તે જ્યોતિર્ અપથં તે અર્વાગ્
અન્યત્રાસ્મદ્ અયના કૃણુષ્વ ।
પરેણેહિ નવતિં નાવ્યા અતિ
દુર્ગા સ્રોત્યા મા ક્ષનિષ્ઠાઃ પરેહિ ॥

વાત ઇવ વૃક્ષં નિ મૃણીહિ પાદય
મા ગામ્ અશ્વં પુરુષમ્ ઉચ્ છિષ એષામ્ ।
કર્તૄન્ નિવૃત્યેતઃ કૃત્યે
અપ્રજાસ્ત્વાય બોધય ॥

યાં તે ચક્રુર્ બર્હિષિ યાં શ્મશાને
કૃત્યાં ક્ષેત્રે વલગં વા નિચખ્નુઃ ।
અગ્નૌ વા ત્વા ગાર્હપત્યે ઽભિચેરુઃ
પાકં સન્તં ધીરતરા અનાગસં
તદ્ ઇતો નાશયામસિ ॥

ઉપાહૃતમ્ અનુબુદ્ધં નિખાતં
વૈરં ત્સાર્ય્ અન્વ્ અવિદામ કર્તૄન્ ।
તદ્ એતુ યત આગતં તત્રાશ્વ ઇવ
વર્તતાં હન્તુ કૃત્યાકૃતઃ પ્રજામ્ ॥

સ્વાયસા અસયઃ સન્તિ નો ગૃહે
વિદ્મ તે કૃત્યે યતિધા પરૂંષિ ॥