Paippalāda-Saṃhitā · Chapter 16.30

mṛtyudūtā amūn nayata
yamadūtā apombhata |
paraḥ sahasrā hanyantāṃ
tṛṇeḍhv enān matyaṃ bhavasya ||

sādhyā ekaṃ jāladaṇḍam
udyatya yanty ojasā |
rudrā dvitīyaṃ vasavas tṛtīyam
ādityair eka udyataḥ ||

viśve devā upariṣṭād
ubjanto yantv ojasā |
madhyena ghnanto yantu
senām aṅgiraso vadhaiḥ ||

vanaspatīn vānaspatyān
oṣadhīr uta vīrudhaḥ |
dvipāc catuṣpād iṣṇāmi
yathā senām amūṃ hanat ||

gandharvāpsaraso devān
sarpān puṇyajanān pitṝn |
dṛṣṭān adṛṣṭān iṣṇāmi
yathā senām amūṃ hanat ||

mṛtyupāśā ime yuktā
yān ākramya na mucyase |
amuṣyā hantu senāyā
idaṃ kūṭaṃ sahasraśaḥ ||

gharmaḥ samiddho agninā-
-ayaṃ homaḥ sahasrahā |
bhavaś ca pṛśnibāhuḥ
śarva senām amūṃ hatam ||

mṛtyor oṣam ā padyantāṃ
kṣudhaṃ sediṃ vadhaṃ bhayam |
indraś cākṣujālābhyāṃ
śarva senām amūṃ hatam ||

parājitāḥ pra trasatāmitrā
jitā dhāvata brahmaṇā |
bṛhaspatipraṇuttānāṃ
māmīṣāṃ moci kaś cana ||

ava padyantām eṣām āyudhāni
mā śakan pratidhām iṣum |
athaiṣāṃ bahu bibhyatām
iṣavo ghnantu marmaṇi ||

sam enān krośatāṃ dyāvāpṛthivī ubhe
sam antarikṣaṃ saha devatābhiḥ |
mā jñātāraṃ mā pratiṣṭhāṃ vidanta
mitho 'pighnānā upa yantu mṛtyum ||