Scripture Library

Paippalāda-Saṃhitā · Chapter 16.29

16.29.1

indro manthatu manthitā
śakraḥ śūraḥ purandaraḥ |
yathā hanāma senām
amitrāṇāṃ sahasraśaḥ ||

16.29.2

pūtirajjur upadhmānī
pūtiṃ senāṃ kṛṇotv amūm |
agniṃ dhūmaṃ parādṛśya
hṛtsv ā dadhatāṃ bhayam ||

16.29.3

paruṣān amūn paruṣāhvaḥ kṛṇotu
hanty enān vadhako vadhaiḥ |
kṣipraṃ śara iva bhajyantāṃ
bṛhajjālena saṃjitāḥ ||

16.29.4

amūn aśvattha ni śṛṇīhi
khādāmūn khadirājiram |
tājadbhaṅga iva bhajyantāṃ
bṛhajjālena saṃjitāḥ ||

16.29.5

antarikṣaṃ jālam āsīj
jāladaṇḍā diśo mahīḥ |
tenābhidāya senām
indro dasyūn apāvapat ||

16.29.6

bṛhat te jālaṃ bṛhata indra śūra
sahasrārghasya śatavīryasya |
tenā ny ubja maghavann amitrān
śaśvatībhyaḥ samābhyaḥ ||

16.29.7

bṛhat te jālaṃ bṛhataś
śakrasya vājinīvataḥ |
tenā śataṃ sahasram ayutaṃ jaghāna-
-indro dasyūnām abhidhāya senām ||

16.29.8

ayaṃ loko jālam āsīc
chakrasya mahato mahān |
tenāham indrajālena
tamasāmūn abhi dadhāmi sarvān ||

16.29.9

sedir ugrāvartir
ārtiś cānapavācanā |
śramas tandrīś ca mohaś ca
tair amūn abhi dadhāmi sarvān ||

16.29.10

mṛtyave amūn pra yacchāmi
mṛtyupāśair amī sitāḥ |
mṛtyor ye aghalā dūtās
tebhya enān prati nayāmi baddhvā ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0