Paippalāda-Saṃhitā · Chapter 16.24

sāhasras tveṣa ṛṣabhaḥ payasvān
viśvā rūpāṇi vakṣaṇāsu bibhrat |
bhadraṃ dātre yajamānāya śikṣan
bārhaspatya usriyas tantum ātān ||

apāṃ yo agre pratimā babhūva
prabhūḥ sarvasmai pṛthivīva devī |
pitā vatsānāṃ patir aghnyānāṃ
sāhasre poṣe api naḥ kṛṇotu ||

pumān antarvān sthaviraḥ payasvān
vasoḥ kabandham ṛṣabho bibharti |
tam indrāya pathibhir devayānair
hutam agnir vahatu jātavedāḥ ||

devānāṃ bhāga upanāha eṣo
apāṃ rasa oṣadhīnāṃ ghṛtasya |
somasya drapsam avṛṇīta śakro
bṛhann adrir abhavad yac charīram ||

pitā vatsānāṃ patir aghnyānām
atho pitā mahatāṃ gargarāṇām |
vatso jarāyuḥ pratidhuk pīyūṣa
āmikṣā ghṛtaṃ tad v asya retaḥ ||

somasya pūrṇaṃ kalaśaṃ bibharṣi
tvaṣṭā rūpāṇāṃ janitā paśūnām |
śivās te santu prajanva imā
ny asmabhyaṃ svadhite yaccha yā amūḥ ||

indrasyaujo varuṇasya bāhū
aśvinor aṃsau marutām iyaṃ kakut |
bṛhaspatisaṃbhṛtam etam āhur
ye dhīrāsaḥ kavayo ye manīṣiṇaḥ ||

ājyaṃ bibharti ghṛtam asya retaḥ
sāhasraḥ poṣas tam u yajñam āhuḥ |
indrasya rūpam ṛṣabho vasānaḥ
so asmāṃ devāḥ śiva aitu dattaḥ ||

daivīr viśaḥ payasvān ā tanoṣi
tvām indraṃ tvāṃ sarasvantam āhuḥ |
sahasraṃ sa ekamukhā dadāti
yo brāhmaṇa ṛṣabham ā juhoti ||

bṛhaspatiḥ savitā te mano dadhau
tvaṣṭur vāyoḥ pary ātmā ta ābhṛtaḥ |
antarikṣe manasā tvā juhomi
barhiṣ ṭe dyāvāpṛthivī abhūtām ||