પૈપ્પલાદ-સંહિતા · અધ્યાય 16.24

સાહસ્રસ્ ત્વેષ ઋષભઃ પયસ્વાન્
વિશ્વા રૂપાણિ વક્ષણાસુ બિભ્રત્ ।
ભદ્રં દાત્રે યજમાનાય શિક્ષન્
બાર્હસ્પત્ય ઉસ્રિયસ્ તન્તુમ્ આતાન્ ॥

અપાં યો અગ્રે પ્રતિમા બભૂવ
પ્રભૂઃ સર્વસ્મૈ પૃથિવીવ દેવી ।
પિતા વત્સાનાં પતિર્ અઘ્ન્યાનાં
સાહસ્રે પોષે અપિ નઃ કૃણોતુ ॥

પુમાન્ અન્તર્વાન્ સ્થવિરઃ પયસ્વાન્
વસોઃ કબન્ધમ્ ઋષભો બિભર્તિ ।
તમ્ ઇન્દ્રાય પથિભિર્ દેવયાનૈર્
હુતમ્ અગ્નિર્ વહતુ જાતવેદાઃ ॥

દેવાનાં ભાગ ઉપનાહ એષો
અપાં રસ ઓષધીનાં ઘૃતસ્ય ।
સોમસ્ય દ્રપ્સમ્ અવૃણીત શક્રો
બૃહન્ન્ અદ્રિર્ અભવદ્ યચ્ છરીરમ્ ॥

પિતા વત્સાનાં પતિર્ અઘ્ન્યાનામ્
અથો પિતા મહતાં ગર્ગરાણામ્ ।
વત્સો જરાયુઃ પ્રતિધુક્ પીયૂષ
આમિક્ષા ઘૃતં તદ્ વ્ અસ્ય રેતઃ ॥

સોમસ્ય પૂર્ણં કલશં બિભર્ષિ
ત્વષ્ટા રૂપાણાં જનિતા પશૂનામ્ ।
શિવાસ્ તે સન્તુ પ્રજન્વ ઇમા
ન્ય્ અસ્મભ્યં સ્વધિતે યચ્છ યા અમૂઃ ॥

ઇન્દ્રસ્યૌજો વરુણસ્ય બાહૂ
અશ્વિનોર્ અંસૌ મરુતામ્ ઇયં કકુત્ ।
બૃહસ્પતિસંભૃતમ્ એતમ્ આહુર્
યે ધીરાસઃ કવયો યે મનીષિણઃ ॥

આજ્યં બિભર્તિ ઘૃતમ્ અસ્ય રેતઃ
સાહસ્રઃ પોષસ્ તમ્ ઉ યજ્ઞમ્ આહુઃ ।
ઇન્દ્રસ્ય રૂપમ્ ઋષભો વસાનઃ
સો અસ્માં દેવાઃ શિવ ઐતુ દત્તઃ ॥

દૈવીર્ વિશઃ પયસ્વાન્ આ તનોષિ
ત્વામ્ ઇન્દ્રં ત્વાં સરસ્વન્તમ્ આહુઃ ।
સહસ્રં સ એકમુખા દદાતિ
યો બ્રાહ્મણ ઋષભમ્ આ જુહોતિ ॥

બૃહસ્પતિઃ સવિતા તે મનો દધૌ
ત્વષ્ટુર્ વાયોઃ પર્ય્ આત્મા ત આભૃતઃ ।
અન્તરિક્ષે મનસા ત્વા જુહોમિ
બર્હિષ્ ટે દ્યાવાપૃથિવી અભૂતામ્ ॥