પૈપ્પલાદ-સંહિતા · અધ્યાય 16.21

પ્રાણાય નમો
યસ્ય સર્વમ્ ઇદં વશે ।
યો ભૂતઃ સર્વસ્યેશ્વરો
યસ્મિન્ સર્વં પ્રતિષ્ઠિતમ્ ॥

નમસ્ તે પ્રાણ ક્રન્દાય
નમસ્ તે સ્તનયિત્નવે ।
નમસ્ તે અસ્તુ વિદ્યુતે
નમસ્ તે પ્રાણ વર્ષતે ॥

યત્ પ્રાણ ઋતાવ્ આગતે
અભિક્રન્દત્ય્ ઓષધીઃ ।
પ્ર વીયન્તે ગર્ભં દધતે
અથો બહ્વીર્ વિ જાયન્તે ॥

યત્ પ્રાણ સ્તનયિત્નુના-
-અભિક્રન્દત્ય્ ઓષધીઃ ।
સર્વં તદા પ્ર મોદતે
યદ્ ઉ કિં ચ ભૂમ્યામ્ અધિ ॥

યદા પ્રાણો અભ્યક્રન્દીદ્
વર્ષેણ સ્તનયિત્નુના ।
પશવસ્ તત્ પ્ર મોદન્તે
મહો વૈ નો ભવિષ્યતિ ॥

અભિવૃષ્ટા ઓષધયઃ
પ્રાણેન સમ્ અવાદિરન્ ।
આયુર્ વૈ નઃ પ્રાતીતરત્
સર્વા નઃ સુરભીર્ અકઃ ॥

નમસ્ તે પ્રાણ પ્રાણતે
નમો અસ્ત્વ્ અપાનતે ।
પ્રતીચીનાય તે નમઃ
પરાચીનાય તે નમઃ
સર્વસ્મૈ ત ઇદં નમઃ ॥

નમસ્ તે અસ્ત્વ્ આયતે
નમો અસ્તુ પરાયતે ।
નમસ્ તે પ્રાણ તિષ્ઠત
આસીનાયોત તે નમઃ ॥

યા તે પ્રાણ પ્રિયા તનૂ
યા વા તે પ્રાણ પ્રેયસી ।
અથો યદ્ ભેષજં તવ
તસ્ય નો ધેહિ જીવસે ॥

પ્રાણઃ પ્રજા અનુ વસ્તે
પિતા પુત્રમ્ ઇવ પ્રિયમ્ ।
પ્રાણો હ સર્વસ્યેશ્વરો
યચ્ ચ પ્રાણતિ યચ્ ચ ન ॥