Paippalāda-Saṃhitā · Chapter 16.154
arvāg anyo divas pṛṣṭhād
ito 'nyaḥ pṛthivyā agnī
sameto nabhasī antareme |
tayoḥ śrayante raśmayo 'dhi dṛḍhās
tān ā tiṣṭhati tapasā brahmacārī ||
abhikrandann aruṇaḥ śitiṅgo
bṛhacchepo 'nu bhūmau jabhāra |
brahmacārī siñcati
sānau retaḥ pṛthivyāṃ
tena jīvanti pradiśaś catasraḥ ||
parjanyo mṛtyur varuṇaḥ
soma oṣadhayaḥ payaḥ |
jīmūtā āsan satvānas
tair idaṃ svar ābharan ||
agnau sūrye candramasi
mātariśvani brahmacāry
apsu samidham ā dadhāti |
teṣām arcīṃṣi pṛthag abhre caranti
teṣām ājyaṃ puruṣo varṣam aśvaḥ ||
amā ghṛtaṃ kṛṇute kevalam
ācāryo bhūtvā varuṇo
yadyad aicchat prajāpatau |
tad brahmacārī prāyacchat
svān mitro adhy ātmanaḥ ||
ācāryo brahmacārī
brahmacārī prajāpatiḥ |
prajāpatir vi rājati
virāḍ indro 'bhavad vaśī ||
brahmacaryeṇa tapasā
rājā rāṣṭraṃ vi rakṣate |
ācāryo brahmacaryeṇa
brahmacāriṇam icchate ||
brahmacaryeṇa kanyā
yuvānaṃ vindate patim |
anaḍvān brahmacaryeṇa-
-aśvo ghāsaṃ jigīrṣati ||
brahmacaryeṇa tapasā
devā mṛtyum apājayan |
indro ha brahmacaryeṇa-
-amṛtaṃ svar ābharat ||
oṣadhayo bhūtā bhavyam
ahorātre vanaspatayaḥ |
saṃvatsaraḥ sahartubhis
te jātā brahmacāriṇaḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0