Paippalāda-Saṃhitā · Chapter 16.136
aghāyatām api nahyā mukhāni
sapatneṣu vajram arpayaitam |
indreṇa dattā prathamā śataudanā
bhrātṛvyaghnī yajamānāya gātuḥ ||
vediṣ ṭe carma bhavatu
barhir lomāni yāni te |
eṣā tvā raśanāgrahīd
grāvā tvaiṣo 'dhi nṛtyatu ||
bālās te prokṣaṇīḥ santu
jihvā saṃ mārṣṭv aghnye |
śuddhā tvaṃ yajñiyā bhūtvā
divaṃ prehi śataudane ||
yaḥ śataudanāṃ pacati
kāmapreṇa sa kalpate |
prītā hy asya ṛtvijaḥ
sarve yanti yathāyatham ||
ye te devi śamitāraḥ
paktāro ye ca te janāḥ |
ete tvā sarve gopsyanti
maibhyo bhaiṣīḥ śataudane ||
sa svargam ā rohati
yatrādas tridivaṃ divaḥ |
hiraṇyajyotiṣaṃ kṛtvā
yo dadāti śataudanām ||
sa tāṃl lokān sam āpnoti
yeṣu devāḥ samāsate |
apūpaṃ nābhiṃ kṛtvā
yo dadāti śataudanām ||
vasavas tvā dakṣiṇata
uttarān marutas tvā |
ādityāḥ paścād gopsyanti
sātirātram agniṣṭomam ati drava ||
gandharvā apsaraso devi
rudrā aṅgirasas tvā |
ete tvā sarve gopsyanti
sātirātram agniṣṭomam ati drava ||
antarikṣaṃ divaṃ bhūmim
ādityān maruto diśaḥ |
lokān sarvān āpnoti
yo dadāti śataudanām ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0