પૈપ્પલાદ-સંહિતા · અધ્યાય 16.136

અઘાયતામ્ અપિ નહ્યા મુખાનિ
સપત્નેષુ વજ્રમ્ અર્પયૈતમ્ ।
ઇન્દ્રેણ દત્તા પ્રથમા શતૌદના
ભ્રાતૃવ્યઘ્ની યજમાનાય ગાતુઃ ॥

વેદિષ્ ટે ચર્મ ભવતુ
બર્હિર્ લોમાનિ યાનિ તે ।
એષા ત્વા રશનાગ્રહીદ્
ગ્રાવા ત્વૈષો ઽધિ નૃત્યતુ ॥

બાલાસ્ તે પ્રોક્ષણીઃ સન્તુ
જિહ્વા સં માર્ષ્ટ્વ્ અઘ્ન્યે ।
શુદ્ધા ત્વં યજ્ઞિયા ભૂત્વા
દિવં પ્રેહિ શતૌદને ॥

યઃ શતૌદનાં પચતિ
કામપ્રેણ સ કલ્પતે ।
પ્રીતા હ્ય્ અસ્ય ઋત્વિજઃ
સર્વે યન્તિ યથાયથમ્ ॥

યે તે દેવિ શમિતારઃ
પક્તારો યે ચ તે જનાઃ ।
એતે ત્વા સર્વે ગોપ્સ્યન્તિ
મૈભ્યો ભૈષીઃ શતૌદને ॥

સ સ્વર્ગમ્ આ રોહતિ
યત્રાદસ્ ત્રિદિવં દિવઃ ।
હિરણ્યજ્યોતિષં કૃત્વા
યો દદાતિ શતૌદનામ્ ॥

સ તાંલ્ લોકાન્ સમ્ આપ્નોતિ
યેષુ દેવાઃ સમાસતે ।
અપૂપં નાભિં કૃત્વા
યો દદાતિ શતૌદનામ્ ॥

વસવસ્ ત્વા દક્ષિણત
ઉત્તરાન્ મરુતસ્ ત્વા ।
આદિત્યાઃ પશ્ચાદ્ ગોપ્સ્યન્તિ
સાતિરાત્રમ્ અગ્નિષ્ટોમમ્ અતિ દ્રવ ॥

ગન્ધર્વા અપ્સરસો દેવિ
રુદ્રા અઙ્ગિરસસ્ ત્વા ।
એતે ત્વા સર્વે ગોપ્સ્યન્તિ
સાતિરાત્રમ્ અગ્નિષ્ટોમમ્ અતિ દ્રવ ॥

અન્તરિક્ષં દિવં ભૂમિમ્
આદિત્યાન્ મરુતો દિશઃ ।
લોકાન્ સર્વાન્ આપ્નોતિ
યો દદાતિ શતૌદનામ્ ॥