Paippalāda-Saṃhitā · Chapter 16.132
agamaṃ svar agamaṃ jyotir
abhy aṣṭhāṃ viśvāḥ pṛtanā arātīḥ |
yo +'smān dveṣṭi yaṃ vayaṃ dviṣmas
tasyedaṃ prāṇam āyur ni veṣṭayāmi-
-idam enam adhamaṃ tamo gamayāmi ||
sūryasyāvṛtam anv āvarte dakṣiṇām anv āvṛtam |
diśo jyotiṣmatīr abhi paryāvarte
sapta ṛṣīn abhi paryāvarte
brahmābhi paryāvarte
brāhmaṇān abhi paryāvarte |
te me draviṇaṃ yacchantu
te me brāhmaṇavarcasam ||
yat te 'nnaṃ bhuvaspata
ākṣiyati pṛthivīm anu |
tasya nas tvaṃ bhuvaspate
saṃprayaccha prajāpate |
yaṃ vayaṃ mṛgayāmahe
taṃ vadhai stṛṇavāmahi ||
vyātte parameṣṭhino
brahmaṇāpīpadāma tam |
vaiśvānarasya daṃṣṭrābhyāṃ
mṛtyus taṃ samadhād abhi ||
iyaṃ taṃ psātv āhutiḥ
samid devī sahīyasī |
rājño varuṇasya bandho 'si
so *'mum āmuṣyāyaṇam amuṣyāḥ putram anne prāṇe badhāna ||
apām asmai vajraṃ pra harāmi
caturbhṛṣṭiṃ śīrṣabhidyāya vidvān |
so asya parvā pra śṛṇātu sarvā
tan me devā hy anu jānantu viśve ||
yad agne tapasā tapa
upa prekṣāmahe vayam |
priyāḥ śrutasya bhūyāsma-
-āyuṣmantaḥ sumedhasaḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0