Paippalāda-Saṃhitā · Chapter 16.104

bhavāśarvau mṛḍataṃ mābhi yātaṃ
bhūtapatī paśupatī namo vām |
pratihitam āyatāṃ mā vi srāṣṭaṃ
mā no hiṃsiṣṭaṃ dvipado mā catuṣpadaḥ ||

śune kroṣṭre mā śarīrāṇi kartam
aliklavebhyo gṛdhrebhyo
ye ca kṛṣṇā aviṣyavaḥ |
makṣikāḥ paśupate
vayāṃsi te vighase mā vidanta ||

krandāya te prāṇāya te
yāś ca te bhava ropayaḥ |
namas te rudra kṛṇmaḥ
sahasrākṣāmartya ||

purastāt te namaḥ kṛṇma
uttarād adharād uta |
abhīvargād divas pary
antarikṣāya te namaḥ ||

mukhāya te paśupate
yāni cakṣūṃṣi te bhava |
tvace rūpāya saṃdṛśe
pratīcīnāya te namaḥ ||

aṅgebhya udarāya
jihvāyā āsyāya ca |
dadbhyo gandhāya te namaḥ ||

astrā nīlaśikhaṇḍena
sahasrākṣeṇa vājinā |
rudreṇādhvagaghātinā
tena mā sam arāmahi ||

sa no bhavaḥ pari vṛṇaktu viśvata
āpa ivāgniḥ pari vṛṇaktu no bhavaḥ |
mā no abhi maṃsta namo astv asmai ||

catur namo aṣṭakṛtvo bhavāya
daśa kṛtvaḥ paśupate namas te |
taveme pañca paśavo vibhaktā
gāvo aśvāḥ puruṣā ād ajāvayaḥ ||

tava catasraḥ pradiśas tava dyaus
tavedam ugrorv antarikṣam |
tavedaṃ sarvam ātmanvad
yad ejad adhi bhūmyām ||