પૈપ્પલાદ-સંહિતા · અધ્યાય 16.104

ભવાશર્વૌ મૃડતં માભિ યાતં
ભૂતપતી પશુપતી નમો વામ્ ।
પ્રતિહિતમ્ આયતાં મા વિ સ્રાષ્ટં
મા નો હિંસિષ્ટં દ્વિપદો મા ચતુષ્પદઃ ॥

શુને ક્રોષ્ટ્રે મા શરીરાણિ કર્તમ્
અલિક્લવેભ્યો ગૃધ્રેભ્યો
યે ચ કૃષ્ણા અવિષ્યવઃ ।
મક્ષિકાઃ પશુપતે
વયાંસિ તે વિઘસે મા વિદન્ત ॥

ક્રન્દાય તે પ્રાણાય તે
યાશ્ ચ તે ભવ રોપયઃ ।
નમસ્ તે રુદ્ર કૃણ્મઃ
સહસ્રાક્ષામર્ત્ય ॥

પુરસ્તાત્ તે નમઃ કૃણ્મ
ઉત્તરાદ્ અધરાદ્ ઉત ।
અભીવર્ગાદ્ દિવસ્ પર્ય્
અન્તરિક્ષાય તે નમઃ ॥

મુખાય તે પશુપતે
યાનિ ચક્ષૂંષિ તે ભવ ।
ત્વચે રૂપાય સંદૃશે
પ્રતીચીનાય તે નમઃ ॥

અઙ્ગેભ્ય ઉદરાય
જિહ્વાયા આસ્યાય ચ ।
દદ્ભ્યો ગન્ધાય તે નમઃ ॥

અસ્ત્રા નીલશિખણ્ડેન
સહસ્રાક્ષેણ વાજિના ।
રુદ્રેણાધ્વગઘાતિના
તેન મા સમ્ અરામહિ ॥

સ નો ભવઃ પરિ વૃણક્તુ વિશ્વત
આપ ઇવાગ્નિઃ પરિ વૃણક્તુ નો ભવઃ ।
મા નો અભિ મંસ્ત નમો અસ્ત્વ્ અસ્મૈ ॥

ચતુર્ નમો અષ્ટકૃત્વો ભવાય
દશ કૃત્વઃ પશુપતે નમસ્ તે ।
તવેમે પઞ્ચ પશવો વિભક્તા
ગાવો અશ્વાઃ પુરુષા આદ્ અજાવયઃ ॥

તવ ચતસ્રઃ પ્રદિશસ્ તવ દ્યૌસ્
તવેદમ્ ઉગ્રોર્વ્ અન્તરિક્ષમ્ ।
તવેદં સર્વમ્ આત્મન્વદ્
યદ્ એજદ્ અધિ ભૂમ્યામ્ ॥