Paippalāda-Saṃhitā · Chapter 16.101

skambheneme viṣkabhite
dyauś ca bhūmiś ca tiṣṭhataḥ |
skambha idaṃ sarvam ārpitam ejad
yat prāṇan nimiṣac ca yat ||

ekacakraṃ vartata ekanemi
sahasrākṣaraṃ pra puro ni paścāt |
ardhenedaṃ pari babhūva viśvaṃ
yad asyārdhaṃ katamaḥ sa ketuḥ ||

pañcavāhi vahaty agram asya
pṛṣṭayo yuktā anusaṃvahanti |
ayātam asya dadṛśe na yātaṃ
paraṃ nedīyo 'varaṃ davīyaḥ ||

idaṃ savitar vi jānīhi
ṣaḍ yamā eka ekajaḥ |
tasmin hāpitvam icchante
ya eṣām eka ekajaḥ ||

tiryagbilaś camasa ūrdhvabudhno
yasmin yaśo nihitaṃ viśvarūpam |
atrāsata ṛṣayaḥ sapta sākaṃ
ye asya gopā mahato babhūvuḥ ||

tisro ha prajā atyāyam āyan
ny anyā arkam abhito +'viśanta |
bṛhan ha tasthau rajaso vimāno
harito hariṇīr ā viveśa ||

dvādaśa pradhayaś cakram ekaṃ
trīṇi nabhyāni ka u tac ciketa |
tatrāhatās trīṇi śatāni śaṅkavaḥ
ṣaṣṭiś ca khīlā avicācalā ye ||

anantaṃ vitataṃ purutrā anantam
antavac cā samakte |
te nākapālaś carati prajānan
vidvān bhūtaṃ yad u bhavyam asya ||

āviḥ san nihitaṃ guhā
jaran nāma mahat padam |
tatraidaṃ sarvam ārpitam
ejat prāṇan nimiṣac ca yat ||

ūrdhvaṃ bharantam udakaṃ
kumbhenevodahāryam |
paśyanti sarve cakṣuṣā
na sarve manasā viduḥ ||