પૈપ્પલાદ-સંહિતા · અધ્યાય 16.101

સ્કમ્ભેનેમે વિષ્કભિતે
દ્યૌશ્ ચ ભૂમિશ્ ચ તિષ્ઠતઃ ।
સ્કમ્ભ ઇદં સર્વમ્ આર્પિતમ્ એજદ્
યત્ પ્રાણન્ નિમિષચ્ ચ યત્ ॥

એકચક્રં વર્તત એકનેમિ
સહસ્રાક્ષરં પ્ર પુરો નિ પશ્ચાત્ ।
અર્ધેનેદં પરિ બભૂવ વિશ્વં
યદ્ અસ્યાર્ધં કતમઃ સ કેતુઃ ॥

પઞ્ચવાહિ વહત્ય્ અગ્રમ્ અસ્ય
પૃષ્ટયો યુક્તા અનુસંવહન્તિ ।
અયાતમ્ અસ્ય દદૃશે ન યાતં
પરં નેદીયો ઽવરં દવીયઃ ॥

ઇદં સવિતર્ વિ જાનીહિ
ષડ્ યમા એક એકજઃ ।
તસ્મિન્ હાપિત્વમ્ ઇચ્છન્તે
ય એષામ્ એક એકજઃ ॥

તિર્યગ્બિલશ્ ચમસ ઊર્ધ્વબુધ્નો
યસ્મિન્ યશો નિહિતં વિશ્વરૂપમ્ ।
અત્રાસત ઋષયઃ સપ્ત સાકં
યે અસ્ય ગોપા મહતો બભૂવુઃ ॥

તિસ્રો હ પ્રજા અત્યાયમ્ આયન્
ન્ય્ અન્યા અર્કમ્ અભિતો +ઽવિશન્ત ।
બૃહન્ હ તસ્થૌ રજસો વિમાનો
હરિતો હરિણીર્ આ વિવેશ ॥

દ્વાદશ પ્રધયશ્ ચક્રમ્ એકં
ત્રીણિ નભ્યાનિ ક ઉ તચ્ ચિકેત ।
તત્રાહતાસ્ ત્રીણિ શતાનિ શઙ્કવઃ
ષષ્ટિશ્ ચ ખીલા અવિચાચલા યે ॥

અનન્તં વિતતં પુરુત્રા અનન્તમ્
અન્તવચ્ ચા સમક્તે ।
તે નાકપાલશ્ ચરતિ પ્રજાનન્
વિદ્વાન્ ભૂતં યદ્ ઉ ભવ્યમ્ અસ્ય ॥

આવિઃ સન્ નિહિતં ગુહા
જરન્ નામ મહત્ પદમ્ ।
તત્રૈદં સર્વમ્ આર્પિતમ્
એજત્ પ્રાણન્ નિમિષચ્ ચ યત્ ॥

ઊર્ધ્વં ભરન્તમ્ ઉદકં
કુમ્ભેનેવોદહાર્યમ્ ।
પશ્યન્તિ સર્વે ચક્ષુષા
ન સર્વે મનસા વિદુઃ ॥