Scripture Library

Paippalāda-Saṃhitā · Chapter 12.3

12.3.1

yatheyam urvī pṛthivī
vṛddhaiva garbham ādadhe |
evā dadhāmi te garbhaṃ
tasmai tvām avase huve ||

12.3.2

parvatād divo yoner
gātrād gātrāt samāśṛtam |
reto devasya devasya
tsarau parṇam ivā dhām ||

12.3.3

viṣṇur yoniṃ kalpayatu
tvaṣṭā rupāṇi piṃśatu |
ā siñcatu prajāpatir
dhātā garbhaṃ dadhātu te ||

12.3.4

garbhaṃ dhehi sinīvāli
garbhaṃ dhehi sarasvati |
garbhaṃ yuvam aśvināsyāmā
dhattaṃ puṣkarasrajā ||

12.3.5

garbhaṃ te rājā varuṇo
garbhaṃ devo bṛhaspatiḥ |
garbhaṃ ta indraś cāgniś ca
garbhaṃ dhātā dadhātu te ||

12.3.6

garbho asy oṣadhīnāṃ
garbho vanaspatīnām |
garbho viśvasya bhūtasya
so agne garbham eha dhāḥ ||

12.3.7

yenauṣadhayo garbhinīḥ
paśavo yena garbhinaḥ |
teṣāṃ garbhasya yo garbhas
tena tvaṃ garbhiṇī bhava ||

12.3.8

vi te granthiṃ cṛtāmasi
dhātā garbhaṃ dadhātu te |
ā yoniṃ putro rohatu
jananaṃ prati jāyatām ||

12.3.9

janiṣṭa hi mahiyā
ā yoniṃ sam ihāsarat |
athā soma iva bhakṣaṇam
ā garbhaḥ sīdatv ṛtviyam ||

12.3.10

dhātaḥ śreṣṭhena rūpeṇa-
-asyā nāryā gavīnyoḥ |
pumāṃsaṃ putram ā dhehi
daśame māsi sūtave ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0