Scripture Library

Paippalāda-Saṃhitā · Chapter 12.21

12.21.1

imaṃ badhnāmi te maṇiṃ
dīrghāyutvāya tejase |
darbhaṃ sapatnajambhanaṃ
dviṣatas tapanaṃ hṛdaḥ ||

12.21.2

dviṣatas tāpayan hṛdaḥ
śatrūṇāṃ tāpayan manaḥ |
durhārdaḥ sarvāṃs tvaṃ darbha
gharma ivābhīt sutāpayan ||

12.21.3

gharma ivābhitapan darbha
dviṣato nitapan maṇe |
hṛdaḥ sapatnānāṃ bhindhi-
-indra iva virujaṃ valam ||

12.21.4

bhindhi darbha sapatnānāṃ
hṛdayaṃ dviṣatāṃ maṇe |
udyaṃ tvacam iva bhūmyāḥ
śira eṣāṃ vi pātaya ||

12.21.5

bhindhi darbha sapatnān me
bhindhi me pṛtanāyataḥ |
bhindhi me sarvān durhārdo
bhindhi me dviṣato maṇe ||

12.21.6

chindhi darbha sapatnān me
chindhi me pṛtanāyataḥ |
chindhi me sarvān durhārdaś
chindhi me dviṣato maṇe ||

12.21.7

vṛśca darbha sapatnān me
vṛśca me pṛtanāyataḥ |
vṛśca me sarvān durhārdo
vṛśca me (dviṣato maṇe) ||

12.21.8

kṛnta darbha sapatnān me
kṛnta me pṛtanāyataḥ |
kṛnta me sarvān durhārdaḥ
kṛnta me dviṣato maṇe ||

12.21.9

piṃśa darbha sapatnān me
piṃśa me pṛtanāyataḥ |
piṃśa me sarvān durhārdaḥ
piṃśa me dviṣato maṇe ||

12.21.10

vidhya darbha sapatnān me
vidhya me pṛtanāyataḥ |
vidhya me sarvān durhārdo
vidhya me dviṣato maṇe ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0