Paippalāda-Saṃhitā · Chapter 12.14

yo jāta eva prathamo manasvān
devo devān kratunā paryabhūṣat |
yasya śuṣmād rodasī abhyasetāṃ
nṛmṇasya mahnā sa janāsa indraḥ ||

yaḥ pṛthivīṃ vyadhamānām adṛṃhad
yaḥ parvatān prakupitām̐ aramṇāt |
yo antarikṣaṃ vimame varīyo
yo dyām astabhnāt sa (janāsa indraḥ) ||

yo hatvāhim ariṇāt sapta sindhūn
yo gā udājad apadhā valasya |
yo aśmanor antar agniṃ jajāna
saṃvṛk samatsu sa (janāsa indraḥ) ||

yenemā viśvā cyavanā kṛtāni
yo dāsaṃ varṇam adharaṃ guhākaḥ |
śvaghnīva yo jigīvām̐l lakṣam ādad
aryaḥ puṣṭāni sa (…) ||

yaṃ smā pṛcchanti kuha seti ghoram
utem āhur naiṣo astīty enam |
so aryaḥ puṣṭīr vija ivā mināti
śrad asmai dhatta sa (…) ||

yo radhrasya coditā yaḥ kṛśasya
yo brahmaṇo nādhamānasya kīreḥ |
yuktagrāvṇo yo 'vitā suśipraḥ
sutasomasya sa (…) ||

yasyāśvāsaḥ pradiśi yasya gāvo
yasya grāmā yasya viśve rathāsaḥ |
yaḥ sūryaṃ ya uṣasaṃ jajāna
yo apāṃ netā sa (…) ||

yaṃ krandasī saṃyatī vihvayate
pare 'vara ubhayā amitrāḥ |
samānaṃ cid ratham ātasthivāṃsā
nānā havete sa (…) ||

yasmān na rte vijayante janāso
yaṃ yudhyamānā avase havante |
yo viśvasya pratimānaṃ babhūva
yo acyutacyut sa (…) ||

yaḥ śaśvato mahy eno dadhānān
abudhyamānān sarvā jaghāna |
yaḥ śardhate nānudadāti śṛdhyāṃ
yo dasyor hantā sa (…) ||