Scripture Library

Paippalāda-Saṃhitā · Chapter 12.1

12.1.1

agnis takmānam apa bādhatām itaḥ
somo grāvā marutaḥ pūtadakṣāḥ |
vedir barhiḥ samidhaḥ śośucānā
apa rakṣāṃsy amuyā dhamantu ||

12.1.2

ayaṃ yo ruro abhiśocayiṣṇur
viśvā rūpāṇi haritā kṛṇoti |
tasmai te 'ruṇāya babhrave tapur
maghāya namo 'stu takmane ||

12.1.3

takman sārthinam icchasva
vaśī san mṛḍayāsi naḥ |
athehi yatra te gṛhā
aninūrtteṣu dasyuṣu ||

12.1.4

yaḥ puruṣaḥ pāruṣeyo
'vadhvaṃsa ivāruṇaḥ |
takmānaṃ viśvadhāvīrya-
-adharāñcaṃ parā suva ||

12.1.5

adharāñcaṃ pra hiṇomi
manas kṛtvā takmane |
śakambharasya muṣṭihā
punar gaccha mahāvṛṣān ||

12.1.6

mahāvṛṣān mūjavata
oka edhi paretya |
vratāni takmane brūmo
anyakṣetrāṇi vā imāḥ ||

12.1.7

oko asya mūjavanta
oko asya mahāvṛṣāḥ |
yāj jātas takmaṃ tād asi
balihikeṣu nyocaraḥ ||

12.1.8

takman vyāla vigada
vyaṅga bhūri yāvaya |
dāsīṃ niṣṭakvarīm iccha
tāṃ vajreṇa sam arpaya ||

12.1.9

giriṃ gaccha girijāsi
girau te māhiṣo gṛhaḥ |
dāsīm iccha prapharvyaṃ
tāṃ takman vīva dhūnuhi ||

12.1.10

yas tvaṃ śīto atho rūraḥ
saha kāsāvīviyaḥ |
bhimās te takman hetayas
tābhi sma pari vṛṅdhi naḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0