Scripture Library

Paippalāda-Saṃhitā · Chapter 10.2

10.2.1

tvayīndriyaṃ tvayi varcas
tvaṃ dharmapatir bhava |
tvam uttaro bhrātṛvyebhyas
tava lakṣmīḥ payasvatī ||

10.2.2

tavaitām aśvinā havaṃ
tava rāṣṭraṃ divi śritam |
tvam āyuṣmān sapatnahā-
-uttaro dviṣato bhava ||

10.2.3

tīkṣṇaśṛṅga ṛṣabhaḥ
samudra ivākṣitodakaḥ |
tvaṃ sahasravīryas
tava bāhū gavāṃ patī ||

10.2.4

bhrātṛvyaś ca sapatnaś ca
yas tvāmitro jighāṃsati |
śriyaṃ tvaṃ sarveṣāṃ teṣām
ādāyogro vi dhāraya ||

10.2.5

tvaṃ vaśī satyākūtaḥ
satyadharmā gaveṣaṇaḥ |
nāṣṭrās tvaṃ sarvās tīrtvā
bhrātṛvyāṇāṃ śriyaṃ vṛha ||

10.2.6

tubhyaṃ saṃ yantu balayas
tubhyaṃ śulkaḥ pra vīyatām |
tubhyaṃ virāṭ payo duhāṃ
tvāṃ vāñchantu viśo mahīḥ ||

10.2.7

vāñchatu tvā bṛhad rāṣṭraṃ
tviṣis te mukha āhitā |
tvaṃ devānāṃ bhava priyas
tvayi gāvo adhiśritāḥ ||

10.2.8

tvayīndriyaṃ tvayi varcas
tvayi yajño adhiśritaḥ |
tavā yantu havaṃ devās
tvaṃ priyo bṛhaspateḥ ||

10.2.9

agnīṣomā pavamānau
virāḍ devī payasvatī |
atandraṃ sarve rakṣantu
rāṣṭraṃ te napavādyam ||

10.2.10

agnir iva tṛṇaṃ pra daha-
-oghaḥ kūlam ivā ruja |
śriyaṃ bhrātṛvyāṇām ā datsva-
-āṇḍīkam ivādhi puṣkarāt ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0