Paippalāda-Saṃhitā · Chapter 10.1

hā amba tejane
dheno lambanastani |
na tad vido yad icchasi
yad u vittaṃ na tad ghasaḥ ||

putro yas te pṛśnibāhus
tam u tvaṃ sāmanaṃ kṛdhi |
atho duhitaraṃ naptrīm
atho tvaṃ sāmanā bhava ||

asāme kurame
naigūrasya svasaḥ |
arāte nirṛte
amate snuhite ||

pareta kastupakaṃ vaḥ
punar dadāmi |
yo vo na veda taṃ hata
tasyātta pariśiśnyam ||

tasyātta putrān bhrātṝṃś ca
tasya goṣṭhaṃ vitāvata |
yaś ca sato nāstivākī
yaś cāsāv ahavirgṛhaḥ |
durṇāmnīs tatra gacchata
tatra sarvāḥ paretana ||

pari dhāmānīty ekā ||

antaścarāṃ kośecarām
atho goṣṭhāvacāriṇīm |
atho yāḥ svapne paśyāmas
tā ito nāśayāmasi ||

kaṇvā yā gardabhīva
nibhasat sūkarīva |
tasyai pratipravartaya
taptam aśmānam āsani ||

yo maryā abhigacchāt
striyaṃ kastupastopinīm |
kastupam asyā ācchidya-
-athaināṃ cātayātai
paramāṃ cit parāvatam ||

yā bhadrā yā śivā
yorjā payasā saha |
agniṣ ṭā asmākaṃ gṛhe
gārhapatyo ni yacchatu ||

idaṃ vo devaḥ savitā-
-idaṃ devo bṛhaspatiḥ |
idaṃ vo viśve devā
avasānam ayukṣata ||

pari prāgād devo agnī
rakṣohāmīvacātanaḥ |
sedhan viśvā apa dviṣo
dahan rakṣāṃsi viśvahā ||

parīme gām aneṣata
pary agnim ahṛṣata |
deveṣv akrata śravaḥ
ka imām̐ ā dadharṣati ||