Padma Samhita · Chapter 4.30

tithiyāgaṃ caturvaktra bravīmi sukhapādhanam /
kāmyasya karmaṇaḥ kālaśśuklapakṣastathā tithiḥ

japahomārcanaissamyakkāleṣvārādhayetsudhīḥ /
agnirbrahmādhaneśānau vighneśaśśrīṣṣaḍānanaḥ

bhānurvṛṣadhvajo durgā yamo valanighādanaḥ /
viṣṇuḥ kāmo'śvinau candra ityuktāstithi devatāḥ

praṇavaṃ navabinduṃ ca varuṇaṃ śrīdharaṃ tataḥ /
gadadhvaṃsaṃ bhadrahastaṃ pāvanaṃ mādhavaṃ tataḥ

ṭhaṭhāntamuddhṛtya manuḥ kathito jātavedasaḥ /
agnimādyamanusvāraṃ bījaṃ tenāṅgapaddhatiḥ

chando virāṭ devalaśca draṣṭāgnirathidevatā /
caturthyantaṃ svābhidhānaṃ natyantamasaro manuḥ

ṛṣiśchando devatāpi manorasyāpi pūrvavat /
pratyakṣaraṃ lakṣajapassādhanaṃ mantrayordvayoḥ

kāmyasya lābhassarvasya phalamatyantadurlabham /
nigamādiṃ kālanemimṛtadhāmavidarbhitam

mārtāṇḍamandarayutaṃ pracaṇḍaṃ mādhavaṃ natim /
ityuddharedbrahmamanumuddhāro'nyasya kathyate

caturthyantaṃ brahmapadamāgneyīniṣṭhitaṃ manuḥ /
vai rājamakṣaprathamaṃ vijayaṃ rohiṇīpatim

akāramekanetraṃ ca bījaṃ praṇavasaṃyutam /
etadevāṅgasantānassvaraśchandaśchalohitaḥ

munirbrahmāca devaśca yaṣṭavyaṃ paṅkajotare /
praṇavaṃ sūkṣmadṛṣṭiṃ ca bhadrapāṇiṃ sabindukam

uddhṛtyaikākṣaro mantraḥ kuberasya samiritaḥ /
uṣṇikchando munirvahnirdhaneśānaśca devatā

ārambhaṃ natimanvakca subhagaṃ vighnanāyakam /
pavitraṃ vijayaṃ paścāddhvaṃsanaṃ mādhavaṃ tathā

kamalaṃ codayaṃ procya jṛmbhalaṃ mṛgavallabham /
pāvakaṃ gopanayutaṃ sadāgatimanantaram

kumbhaṃ śaśāṅkaṃ bhuvanaṃ herambaṃ rāmasaṃyutam /
vakratuṇḍaṃ jagatprāṇaṃ mandaraṃ paścimānanam

āgnimādyaṃ mārutaṃ ca prathamaṃ pretanāyakam /
acāmādi mathāgneyīmuddhṛtya manurīritaḥ

dhanadasya nabho draṣṭā chandogāyatramiritam /
daivaṃ dhanādhipo devo bījaṃ pūrvavadīritam

aṅgaṣṭhe māṇibhadrākhyaṃ tarjanyāṃ pūrṇabhadrakam /
kalimāliṃ madhyamāyāṃ vikuṇḍalamanāmikām

mūle kaniṣṭhakāyāṃ ca madhye ca maṇibandhayoḥ /
makhendraṃ pāṇitalayo raṅganyāse dhanādhipaṃ

snātvājṛmbhalamantreṇa prakṣipedudakāñjalim /
ambhojakarṇikāmadhye mahākāyaṃ mahodaram

dvibhujaṃ pītavasanaṃ cintāratnaṃ rake sthitam /
dhārayantaṃ manaḥ kāntaṃ mantribhyo pīpsitaṃ vasu

yakṣayakṣīparijanaṃ dhyāyannarghyādibhiryajet /
ṛddhiṃ guptiṃ ca tatpārśve caturthyantaṃ svasaṃjñayā

arghyādyairarcayitvātu tato jṛmbhalamabjaja /
kalimāliṃ māṇibhadraṃ carendhraṃ pūrṇabhadrakam

mukhendraṃ śikhipūrvaṃ ca kuṇḍalaṃ nalakūbaram /
ambhojakarṇikāmadhye daleṣvindrādiṣu kramāt

arcayetpurataśśaṅkhanidhiṃ padmanidhiṃ tathā /
śabalāṃ purato nyasyetpṛṣṭhataḥ kalpakadrumam

japahomau tarpaṇādi phalaṃ mūlamanoryathā /
vakṣyāmi jṛmbhalamanumarṇoddhāreṇa saṃprati

omādiṃ subhagaṃ bhadrahastaṃ vaidhara makṣaram /
ādidevaṃ mārutaṃ ca dhanadaṃ bhadrabāhukam

pavitraṃ vijayaṃ caiva mārutaṃ mādhavaṃ tathā /
janmahantṛ tathāmnāyaṃ mādhavaṃ sūkṣmadarśanam

vikṣkambhamādidevaṃ ca sparśaṃ svāhayā yutam /
bījamādyakṣaraṃ bhargo draṣṭā cchando virāṇmanoḥ

devatā jṛmbhalaḥ kāryaḥ phalaṃ sarvaṃ prayacchati /
vighneśamantramuddhṛtya varṇān vakṣyāmyanukramāt

udgīthaṃ ca tṛtīyaṃ ca sparśeṣu pulahaṃ manumam /
daṇḍa ityuddhṛto mantro gaṇikāṣṣaḍvirāṭtathā

devatā vighnu rājaśca japo lakṣatrayaṃ smṛtam /
bhūtaṃ bhavyaṃ bhaviṣyaṃ ca svapne paśyati mantravit

ārabdhaṃ karmanirvighnaṃ phalaṃ dugdhe yathepsitam /
tṛtīyādiṃ ca sumukhamādyaṃ paścimasaṃjñitam

acāṃ mukhaṃ ca vijayaṃ prāṇaṃ mādhavamanvataḥ /
satyantamādau pūrvoktaṃ manuṃ ca manurīritaḥ

ajo muniśchanda uṣṭigdevatā vighnanāyakaḥ /
saptalakṣaṃ japenmantraṃ siddhayaḥ pūrvamiritāḥ

ekākṣaraṃ natiśiro manuranyassamiritaḥ /
nigamādiṃ dinakaraṃ jvalanaṃ pañchabindukam

sānusvāraṃ gadadhvaṃsaṃ padmanābhaṃ ca vāmanam /
yaṣṭiṃ sahasrakiraṇaṃ pāvakaṃ daṇḍaśekharam

triyakṣaramanurbrahman kathitassarvasādhanaḥ /
aṅgādi gaditaṃ varṇamakārādisvarāntakam

prayuñjīta manuścānyo vakṣyate kamalāsana /
udgīthamādiṃ kamalaṃ pāvakaṃ pañcabindukam

ardhendusahitaṃ bhadramanalaṃ binduvāmanam /
saroruhaṃ samāhendraṃ mahāmayā sayaṣṭikam

bījaṃ ca tatsvarādyarṇaṃ gadadhvaṃsaṃ pracaṇḍakam /
paścimānanavairājau māyāṃ ca vasudhārasaṃ

ādimagni makāraṃ ca phaṭpadadvayamirayet /
śaśinaṃ varuṇaṃ vahniṃ kakubhaṃ bhadrabāhukam

mandaradvayamekāraṃ varuṇaṃ kamalāmukham /
acāṃ dakṣaṃ gopanaṃ ca vighneśaṃ śvasanaṃ tathā

ṭhaṭhāntamatthamuddhāro bījādi kathitaṃ purā /
aihikāmuṣmikaphalaṃ sarvametena sādhayet

śriyaṃ pūrvoktamārgeṇa devīmarghyādibhiryajet /
tatkaṭākṣanipātena labhate śriyamuttamām

tāraṃ natiṃ krodharūpaṃ pracaṇḍaṃ dakṣamanvataḥ /
udayaṃ kharvadehaṃ ca gopanaṃ ca prabhañjanam

śaśāṅkaṃ śrīdharaṃ hrasvamṛtadhāmasamāhvayam /
dineśaṃ mādhavīmanvakpracaṇḍaṃ madhusūdanam

śvasanaṃ svāhayā sārdhaṃ manureṣasamiritaḥ /
jṛmbhalaṃ pulahaṃ cordhvalokeśaṃ yaṣṭimastakam

etadbījasamuddhārastadevāṅgamṛṣiḥ punaḥ /
varṇātmā kathitaśchando gāyatraṃ devatā guhaḥ

dāḍimikusamaprakhyāṃ tanmantreṇa samarcayet /
evaṃ kṛtavato vaṃśe subrahmaṇyādayo grahāḥ

na pīḍayanti tadvaṃśyān bhavanti cirajīvinaḥ /
nigamādiṃ coṣadhīśamanunāsikyamuddharet

ekākṣaro'yaṃ kathito mantrassarvārthasādhakaḥ /
hārito mantradṛcchando virāṭ sūryaśca devatā

brahmakośaṃ padmapāṇimṛtaṃ sumukhasaṃjñitam /
rāmabinduṃ hṛṣī keśamagniṃ vāyumacāṃ mukham

vaidharaṃ binduvairājaṃ vāyuṃ tāraṃ samuddharet /
itthamaṣṭākṣaro mantro bījamekākṣaraṃ smṛtam

ṛṣikatriśca devaśca pūṣā caivādhidevatā /
paraṃ saptākṣaraṃ mantraṃ mantrairuddhṛtyavarṇyate

saptārṇāḥ pūrvavadgrāhyassubhadraṃ madhusūdanam /
bhadrahastaṃ ca kalaśaṃ mādhavaṃ pūrvamiritam

bījamabhyantarīkṛtvā dviruktaṃ kakubhaṃ tathā /
aprameyaṃ gandhavahamādyametadanantaram

pādadvitayamāpāhya mādidevamanantaram /
pāvakaṃ vikramayutaṃ vaidharaṃ ṛtadhāma ca

mārutaṃ cāpi nāsikyaṃ vighneśaṃ gopanāhvayam /
kamalāmādipavanamādyaṃ dviḥ padamiriyet

mādhavīmādisahitamakṣaraṃ dviradaṃ paṭhet /
pavitraṃ gopanayutaṃ paṭhemaṃ ? svarasaṃyutam

vighneśaṃ dahatiṃ dhātuṃ loḍantaṃ dvissamuddharet /
śāntarogaṃ sukhapadaṃ pūrvaloḍantamadhyamam

yamaṃ caṇḍaṃ dviruccārya triranvakpraṇavaṃ padam /
svanāmnā praṇavāntena manurevaṃ samuddhṛtaḥ

bījamaṅgāni coktāni sindhudvīpaśca dṛṣṭavān /
aticchandassvayaṃ chandassūryaścānena kathyate

padma madhye karṇikāyāmādityaṃ dalabhūmiṣu /
prācyādiṣu grahānanyāṃ stadānīṃ bimbamarcayet

kramāt ṣaḍṛtavassarve gṛhāssānugrahāstadā /
āyurārogyasaundarya samṛddhi mukhasaṃpadaḥ

saptajanmasuvaṃśe'sya bhavantini ravagrahāḥ /
praṇavaṃ natimanvakca śubhadaṃ ca trivikramam

varuṇaṃ gopanaṃ vāyumādimuddṛtya mantravit /
manuḥ pañcākṣaraḥ kāryo bījaṃ saṃprati kathyate

gopatiṃ viṣṇusahita manusvāraṃ samuddharet /
bījametaccaturvaktra ṣaḍaṅgānāmudāharet

upamanyuṛṣiśchandho devaṃ gāyatramucyate /
pratipādyo mahāśāno japassyāllakṣapañchakam

aṣṭākṣaravadasyāpi phalasādhanameva ca /
raktāmbujāsanāsinamarcayettaddaleṣu ca

prāgādiṣu ṣaḍaṅgāni pārvatīnandikeśvarau /
kramādvinyasya purato vāhanaṃ samyagarcayet

dikṣvaṣṭānu surendrādīnaṣṭāvarghyādinārcayet /
sṛṣṭyādinyasanaṃ kṛtvā prathamaṃ tadanantaram

akṣarasyasanaṃ kuryāt sthāneṣveteṣu padmaja /
mūrdhni cāsye ca hṛdaye guhye pādatale tathā

varṇānāṃ kramaśo varṇāḥ pañcānāṃ kathyate'dhunā /
sphaṭikaṃ pāṭalaṃ pītaṃ śvetaṃ nīlamitismaret

śivo'hamiti cātmānaṃ bhāvayenmantravittamaḥ /
dhyāyantaṃ devadeveśamārādhya vṛṣabhadhvajam

tyaktvā saṃsārikaṃ duḥkhameti sthānamanaśvaram /
bhogānapyaihikān bhuktvā durlabhānamarairapi

omādisaptavarṇānāmuddhāraḥ pūrvamiritaḥ /
vaidharaṃ nṛhariṃ māyāṃ pracaṇḍaṃ madhusūdanam

mandaraṃ cordhvalokeśaṃ vairājaṃ dviścaturmukha /
pāvakaṃ pavanaṃ devadattaṃ pāṭalamanvataḥ

gopatiṃ mārutamatho mandaraṃ mādhavīṃ tathā /
mādhavaṃ dhanadaṃ brahman madhusūdanasaṃjñitam

nāsikyaṃ paścimaṃ padmanābhaṃ ca pavanāhvayam /
khaḍgaṃ dvirucca retsvāhā iti mandraṃ samuddhṛtam

manumanyaṃ pravakṣyāmi tamarṇairuddharāmyaham /
tāramatriṃ garutmantaṃ rāmaṃ sumukhamanvataḥ

gopavaṃ mandaraṃ cordhvalokeśaṃ vijayaṃ punaḥ /
tamarṇaṃ cābhiśaṅkhaṃ ca mādhavaṃ vāruṇābhidham

gopanaṃ ca karālaṃ ca kamalaṃ jṛmbhalaṃ tataḥ /
śrīdharaṃ subhagaṃ māyāṃ janmadhvaṃsamanantaram

pāśapāṇiṃ cādidevaṃ bhadrahastaṃ ca paścimam /
ṛtāhvayaṃ vaidharaṃ ca madhubhinmārutaṃ tataḥ

satimuddhṛtya kathito varṇān ṣoḍaśa saṃjñitān /
mantrayoranayorbrahman jīvo draṣṭābhidhīyate

dharmavarttīmaheśāno devatā dakṣiṇātanuḥ /
dineśa rāmasahitaṃ śvasanaṃ matibindumat

bījametadato dhyānamiśānasya bravimite /
kundendhumuktāśaṅkhābhaṃ sarvākalpapariṣkṛtam

vaiyāghracarmavasanaṃ jaṭāmaṇḍalamaṇḍitam /
nāsāgranyastanayanaṃ śaśikhaṇḍavirājitam

prasannavadanaṃ devaṃ caturbhujamabhīṣṭadam /
vāmajānuni vinyastavāmetarapadāmbujam

pphaṭikāmakṣamālāṃ ca bibhrāṇaṃ dakṣiṇekare /
vāme karāmbuje svīye dhṛtavijñānapustukam

darśayantaṃ jñānamudrāṃ maharṣigaṇasevitam /
dhyāyato mantriṇastvaivaṃ sidhvanti sakalāḥ kalāḥ

gaṅgāpravāhavattasya vākprasāraḥ pravartate /
caturvargaphalāvāptistasya haste sthitā dhruvam

japabhūyastayo kāmān durlabhān sukhamaśnute /
tithau bhagavatīṃ durgāṃ navamyāṃ samyagarcayet

nigamādiṃ vaidharaṃ ca bhuvanaṃ ca visarjanam /
manurekākṣaraḥ proktassamuddhṛtya yathātatham

svīkṛtyaikākṣaraṃ pūrvaṃ gadadhvaṃsaṃ hutāśanam /
sparśanaṃ godhanāhvānaṃ natiṃ ca manurīritaḥ

bījamasyoddhariṣyāmi gopatiṃ pāvakaṃ tataḥ /
vāmanaṃ yaṣṭiśirasamasya kātyāyano muniḥ

chandaśca devi gāyatraṃ vanadurgā ca devatā /
mantramanyaṃ pravakṣyāmi durgāśrayamanuttamam

nigamādiṃ viṣṇusaṃjñaṃ kapilaṃ jṛmbhalāhvayam /
mādhavaṃ ca surendrādiṃ pradyumnaṃ kālanemijam

madhusūdananamānaṃ pulahaṃ māyayāvṛtam /
karālaṃ devadattākhyaṃ śaśāṅkaṃ kamalānugau

pavitramādi devāntaṃ nṛhariṃ sparśanaṃ tathā /
brahmaṇamagniṃ coddhṛtya pañcabindumanantaram

ādiṃ śrīvatsamudayaṃ subhadraṃ nāsikāhvayam /
bhāskaraṃ bhadrabāhudvau vaidharaṃ gopatidvayam

pavitrakhaḍganāmānau dvau ca dakṣamanantaram /
supratiṣṭhaṃ dviruccārya dinakṛnmādhavīdhruvau

phaṭkāramagnyādimanvagityuddhṛtya japenmanum /
arṇoddhārakramādanyaṃ mantraṃ vacmi caturmukha

praṇavaṃ vaidharaṃ paścācchrīdharaṃ gadinaṃ tathā /
vaiśvānaraṃ mṛgapatiṃ tamevārṇamanantaram

yāntaṃ nṛsiṃhaṃ sumukhaṃ rāmaṃ svāhaṃ samuddharet /
uddhṛto'yaṃ manuścānyo bījamaṅgāni pūrvavat

ṛṣirjayamatiśchando giridurgāca devatā /
udgīthaṃ śrīdharaṃ caiva dṛṣṭidvandvaṃ trivikramam

krodharūpi ca jīmūtaṃ paścimaṃ bhuvanāhvayam /
bahulaṃ śrīdharaṃ krodhaṃ vikramaṃ sarasīruham

vikramaṃ dharmaśītāṃśuṃ śaśāṅkaṃ ca sudhāmayam /
paścimaṃ rāmaśirasaṃ krodharūpaṃ savikramam

bhallāyudhaṃ tathā śaṅkhamādhavīdvayamādhavam /
śuklamādiṃ mṛgapatiṃ śrīdharaṃ paścimānanam

nīhāradīdhitiṃ sarvarodhaṃ vikramaśīrṣakam /
vairājaṃ kapilaṃ śaṅkhaṃ vaidharaṃ bandhumastakam

śubhadaṃ kamalaṃ vāyuṃ mandaraṃ vittavarthanam /
ādiṃ karālamanilaṃ nāsikyaṃ yādasāṃ patim

gopanaṃ vijayaṃ vighnunāyakaṃ dakṣamādhavau /
subhadraṃ ca gadiṃ kumbhaṃ vairājaṃ bandhuśīrṣakam

śubhadaṃ mandaraṃ śaṅkhaṃ ṭhaṭhānto manurīritaḥ /
ṣoḍhā vibhajya taṃ mantraṃ hṛdayādyaṅgakalpanam

draṣṭā vareṇyako nāma hyanuṣṭhupchanda īritaḥ /
devatā vanadurgāsyāttadaṣṭākṣara vatphalam

sarvadāhvayadurgāyā mantramuddhārayāmi te /
udgīthaṃ natimanvakca sūkṣmadṛgdṛṣṭiśīrṣakam

gadadhvaṃsamakāraṃ ca kumbhanādyaṃ caturmukha /
vairājaṃ rājamānaṃ vai vaidharaṃ śrīdharāhvayam

gadinaṃ bandhusaṃjñaṃ ca svāhāśīrṣaṃ śriyaḥ patim /
gadinaṃ pāvakaṃ caiva dṛṣṭimikāramanvataḥ

dehaṃ ca vikramaṃ caṇḍaṃ rāmaṃ mandarasaṃjñitam /
madhusūdaṃ gandhavahaṃ mādhavaṃ mādharāhvayam

ādityaṃ gopanaṃ dakṣamādidevaṃ ca mārutam /
mṛgeśaṃ mandharaṃ bhānuṃ madhusūdanasaṃjñitam

pulahaṃ devadattaṃ ca dakṣaṃ ca yadabhāskaram ? /
rāma mugrātmanātmānaṃ madhusūdanamanvataḥ

śaśāṅkaṃ śrīdharaṃ sapta jihvaṃ kumbaṃ trivikramam /
kajānanaṃ gopatiṃ ca lakṣmīṃ bhadraṃ trivikramam

vaidharaṃ bhuvanāhvānamugrarūpaṃ ca kheṭakam /
bhallāyudhaṃ tathā brahman śvasanaṃ nāsikā bhuvam

vidhātāraṃ hutavahaṃ vikramaṃ ca sudhārasam /
rāmaṃ ca bhadraṃ subhagamanilaṃ vighnanāyakam

rāmaṃ mahendrasubhagaṃ maheśaṃ gaganāhvāyam /
mārtāṇḍamādidevaṃ ca śaśāṅkaṃ śrīdharaṃ tathā

citrabhānuṃ tathā dakṣaṃ vaidharaṃ havyavāhanam /
vighneśaṃ vikramaṃ dṛṣṭiṃ devadattamapāṃ patim

madhusūdananāmānaṃ kalātmānamataḥ param /
bhuvanaṃ pāvakaṃ dṛṣṭiṃ gopanaṃ vijayaṃ tathā

vāyuṃ pavitramākāraṃ musalaṃ vikramaṃ punaḥ /
ekanetraṃ mādhavaṃ ca kalaśaṃ pāpakāhvayam

vaidharaṃ devadattaṃ ca vighneśaṃ madhusūdanam /
dahanaṃ gopanaṃ caiva mārutaṃ vanamālinam

māyāṃ ca vaidharāhvānaṃ madhusūdanamandharau /
otadehaṃ dṛṣṭimagniṃ paścimānanamanvataḥ

ṛtadhāmaṃ vikramaṃ ca śvasanaṃ mṛganāyakam /
puṣṭibhījaṃ triruccārya sahasrakiraṇāhvayam

guhālayamanusvāraṃ bījametattriruddharet /
bhadraṃ guhālayaṃ caiva vijayaṃ gadinaṃ tathā

padmanābhaṃ gopatiṃ ca kalaśaṃ mṛgarāṭ tathā /
vai rājamādidevaṃ ca ḍuṇḍubhaṃ locanodayau

ugrātmakheṭakau vahniṃ gopatiṃ vihagādhipam /
śvetāṃśu paścimaṃ lakṣmīmādidevamanantaram

vakratuṇḍaṃ gopanaṃ ca bhadrapāṇimanantaram /
vijayākāramādiṃ ca śaśāṅkaṃ ca sadāgatim

dvirabhyasetkālanemiṃ bhadraṃ puṇyaṃ dviruccharet /
mandaraṃ cādidevaṃ ca dahanaṃ śvasanaṃ tathā

dvirbrūyātsūkṣmadṛgbrahman karālaṃ vijayaṃ punaḥ /
pīyūṣamādiṃ vijayaṃ vasumastakaniṣṭhitam

nihāradīdhitimacāmādiṃ pītaṃ samādhavam /
subhadraṃ kamalaṃ caikadṛṣṭiṃ ca caturāsana

pavitramṛtadhāmānaṃ trivikramamataḥ param /
puruṣātmānameṇeśaṃ paścimaṃ puratastathā

dhruvaṃ dhruvaṃ tathā hrasvaṃ māhendraṃ mandaraṃ tataḥ /
sarvarodhaṃ gajāsyaṃ ca māyāṃ kamalamandarau

ekanetramṛtaṃ śulaṃ bahu kukṣiṃ trivikramam /
karālaṃ padmanābhākhyaṃ vighneśaṃ vijayaṃ tathā

bhadrahastaṃ tathā rāmaṃ śaśāṅkaṃ manumanvataḥ /
subhadraṃ gopanaṃ paścātpañcāntikamathānilam

paścimaṃ padmanābhākhya mṛtadhāmānamasvataḥ /
jṛmbhalaṃ pulahaṃ pāpahananaṃ padmanābhakam

dṛṣṭiṃ mṛgeśamamṛtamāryāṃ ca dvirguhālayam /
pavitramṛtadhāmānaṃ vaidharaṃ mādhavaṃ tataḥ

mārutaṃ kamalāṃ padmapavitramṛtadhāma ca /
atriṃ mṛgapatiṃ lakṣmīṃ bahulaṃ pañcabindukam

pavitramṛtadhāmānaṃ vai rājaṃ vikramaṃ tathā /
paścimaṃ padmanābhākhyaṃ vaidharaṃ mṛgavallabham

dakṣaṃ raviṃ gopanākhyaṃ subhadraṃ bhuvanaṃ tathā /
kakubhaṃ mādhavaṃ paścānmādhavīṃ bhāskarāhvayam

gopanaṃ matimantaṃ ca pulahaṃ mādhavaṃ ravim /
yaṣṭiṃ ca vyāharedbrahman tathaiva madhusūdanam

dhruvaṃ nabhomaṇiṃ gopaṃ binduṃ ca caturāsana /
evaṃ tri rvyāharedarṇaṃ sugataṃ sāgarottamam

mandaraṃ bhāskaraṃ paścādgopanaṃ mādhavīṃ tathā /
ādidevaṃ jagatprāṇaṃ mādhavaṃ natimuddharet

ityevamuddhṛto mantro brahman sarvārthasiddhadaḥ /
śatena saṃmito varṇo raśmītyādibhireva ? saḥ

bhāskaraṃ mandharaṃ pañcabinduṃ yaṣṭimanantaram /
uddhṛtya bījametena ṣaḍaṅgāni prakalpayet

draṣṭā kakutsthaśchandassyādaticchando tra devatā /
sarvadāhvānamantrasya caturlakṣojapaḥsmṛtaḥ

jñānāddhyānājjapānmantrassiddhiṃ sarvāṃ prayacchati /
mantriṇo nityayuktasya pratyahaṃ prayatātmanaḥ

āmuṣmikaṃ caihikaṃ ca phalaṃ sarvaṃ prayacchati /
daśamyāmarcayedbrahman kṛtāntamabhayapradam

nigamādiṃ gandhavahaṃ hṛṣīkeśamantaram /
daṇḍaṃ prabhañjanaṃ dakṣaṃ cādidevaṃ sadāgatim

nitimuddhṛtya kathito manurvaivasvatā śrayaḥ /
bījamarṇān samuddhṛtya śvasanaṃ yaṣṭiśīrṣakam

uditaṃ tena bījena hṛdayādyaṅgakalpanam /
ṛṣissatyatapāśchando gāyatraṃ daivamiritam

mantraśca pitṛdaivatyo japaḥ syātpañcalakṣakaḥ /
tenārādhya śrāddhadevamabhīṣṭaṃ sarvamaśnute

prathamaṃ chandasāmādiṃ vikramaṃ mānuṣeśvaram /
vaidharaṃ vahnimaparaṃ gopanaṃ pavanaṃ mukham

satimuddhṛtya māghonaḥ kathito manurabjaja /
vaidharaṃ cordhvalokeśaṃ nāsikyaṃ bījamuddhṛtam

ṛṣirdevo virāṭ chando devatā valasūdanaḥ /
eteneṣṭvā turāsāhaṃ sāmrājya phalamaśnute

dvādaśyāṃ mālamantreṇa pūjayeduktavartmanā /
bhagavantaṃ śriyaḥ kāntaṃ phalamipsan sudurlabham

nigamādiṃ ca natyantaṃ paścimodayanaṃ tathā /
krodharūpaṃ pavitraṃ ca śrīvatsaṃ pāvakaṃ tataḥ

ādidevaṃ ca pananaṃ gopanaṃ yaṣṭimanvataḥ /
gopatiṃ bahulaṃ pañchabinduṃ narahariṃ tataḥ

aurvaṃ yaṣṭiṃ ca kamalaṃ gopanaṃ mandarāhvayam /
vaidharaṃ devadattaṃ ca kamalaṃ gopanaṃ tathā

śaṅkhaṃ ṭhaṭhāntamuddhṛtya manureṣa samiritaḥ /
svargādiṃ pulahaṃ bandhuṃ nāsikyaṃ bījamuddharet

ṛṣiśśrīnidhirasyokto virāṭ chandaśca devatā /
manmathastena yaṣṭavyassa sarvaphalakāṅkṣibhiḥ

ekārṇamaparaṃ mantramuddhariṣyāmi padmaja /
tāraṃ garuḍamaurvaṃ ca sabinduṃ manurīritaḥ

lakṣamekaṃ japenmantrī karmaṇyākarṣaṇādike /
samarthaṃ kāmadaivatyaṃ manumanyaṃ bravīmi te

udgīthaṃ kamalaṃ pītaṃ māyāmardhenduśekham /
karālaṃ gopanaṃ dakṣaṃ vaidharaṃ tadanantaram

mṛgendraṃ varuṇaṃ cādi devaṃ śvasanasaṃjñitam /
śuklaṃ sudhāmayaṃ vahniṃ kakubhaṃ savināyakam

śaśāṅkhaṃ mādhavaṃ brahmasādhakaṃ bhāskarāhvayam /
hairambaṃ gopanaṃ vāyuṃ kakubhaṃ yādasāṃ patim

pulahaṃ nigamādiṃ ca taddvayaṃ tadviruccharet /
paścimaṃ tvṛtadhāmānaṃ pūrṇaṃ parvabhiruccharet

śaśāṅkamādiṃ jalajaṃ pītaṃ varuṇamabjaja /
kakubhaṃ viṣṇuvighnesau prathamaṃ tagmadidhitim

padmanābhaṃ vaidharaṃ ca vāyumādyaṃ ca mandaram /
mandarādyadvayaṃ bhūyastadeva samanantaram

varuṇaṃ viṣṇumabjāṃ ca yaṣṭi mabjodayau tathā /
dahanaṃ śrīdharaṃ varṇaṃ pulahaṃ brahmasādhanam

karālamādyaṃ kalaśaṃ mukhaṃ śrīvatsamanvataḥ /
prabhañjanaṃ gopanaṃ ca sparśamādyamapāṃ patim

ṭhaṭhāstamuddhṛtya manuḥ kathitaḥ kamalāsana /
ṛṣiḥ kaliṅgo'ticchandhaśchandaḥ kāmaśca devatā

japeddviraṣṭau lakṣāṇi nāsādhyaṃ tena mandriṇā /
ratiśca viratiścobhe tasya pārśve sthite sadā

mantra stayośchaturthyantaṃ nāmamātraṃ triśīrṣakam /
madanaḥ prathamo bhāṇastathaivonmādano'paraḥ

mohanaṃ dveṣaṇaṃ ca dve dīpanaṃ pañcamaṃ smṛtam /
mallikā ketakī jātiḥ paṅkajaṃ yūdhikā tathā

puṣpāṇi kramaśo bhāṇānyā husteṣāṃ manuḥ punaḥ /
saṃvidyarṇāśca sahitāścaturthyantāssamāhvayāḥ

teṣāṃ satyantasahitaṃ taisteṣāmarcanaṃ vidhuḥ /
dhanuraṅkaśapāśāśca tasyāstrāṇi manobhuvaḥ

mantrāśca pūrvavatteṣāṃ nāmānyeva caturmukha /
kalpakānokaha prāya puṣpitadrumaśobhite

udyāne mañju śiñjānapakṣisaṅghiniṣevite /
madhye mahāhrade pūrṇe sarojaiśca vikasvaraiḥ

viṣṭare kāñcane nyaste śubhā staraṇasaṃyute /
āsīnaṃ saha devībhyāṃ sarvābharaṇabhūṣitam

raktacandanaliptāṅgaṃ raktamālyopaśobhitam /
cārukuṇḍalinaṃ kāntaṃ yuvānaṃ kṣaumavāsanam

vasānamapsaromukhyai strīgaṇaiḥ parito vṛtam /
dhyāyannanena manunā kramādarghyādibhiryajet

kāmagāyatriyā vāpi yajeta makaradhvajam /
japādi pūrvavatsarvaṃ vaśyaṃ ca bhuvanatrayam

mantriṇo nityayuktasya kimanyairatisistaraiḥ /
aśvinormantramadhunā bravīmi kamalāsana

uddhṛtya pūrvamudgīthaṃ vighneśaṃ pāṭalapriyam /
brahmasādhananāmānaṃ śrīvatsaṃ ca sudhāmayam

māyāṃ subhadra mākāramaśvinorīrito manuḥ /
ādimardhendusahitaṃ bījaṃ tenāṅgakalpanā

bhṛgurdraṣṭā bṛhacchandaḥ pratipādyau tathāśvinau /
japanvaipañcalakṣeṇa siddhissarvārṇasādhanaḥ

rājayakṣmādayo rogā na tiṣṭhanti tadanvaye /
auṣadhāni ca dakṣāṇi vyādhīnāmapanodane

tatkarasparśamātreṇa sarvaṃ vastvauṣadhaṃbhavet /
paurṇamāsyāṃ tathā somaṃ yajeta manuvittamaḥ

nigamādiṃ pūrṇacandramotadehaṃ samandaram /
madhumārutavighneśaṃ mādhavīṃ ca visarjanam

somasya kathito mantro bījamuddhārayāmite /
sitamādimanusvāraṃ kuryāttenāṅgasantatim

draṣṭā kaumodako nāma paṅtkicchandassa devatā /
japaḥ pūrvavadevāsya gāyatryā vā samarcayet

phalaṃ ca sarvaṃ pūrvoktaṃ candrasālokyamapyatha /
ityuktāstithamo devāsteṣāṃ mantrāssamarcanam

phalāni ca samastāni krameṇāpyuditāni te /
nārādhyaṃ tithiyogaistairaihikā muṣmikātmakam

phalaṃ mantraprasādhena taddevānāṃ mahattayā /
nukṛtānyapi karmāṇi vinā vighneśapūjayā

na phalantyantarāyeṇa nihatāni caturmukha /
tadādau karmakurvāṇairārādhyo vighnanāyajaḥ