Padma Samhita · Chapter 4.26

gāyatrīṃ vaiṣṇavīṃ brahman caturviṃśākṣarātmikām /
śṛṇu vakṣyāmi paramaṃ rahasyaṃ kathyate'dhunā

mātṛkācakramabhyarcyachandasāmādimuddharet /
ādidevaśirāścātra vighneśaṃ tadanantaram

vahnyantaṃ gopanaṃ paścācchaṅkhaṃ viṣṇuśiraḥ smṛtam /
sumukhaṃ gopanayuta manyacca marudādimat

māyāśritaṃ sudhādhāma vaidharo'nvakaccha mandaram /
viṣṇuśīrṣo bhāskaro'tha māthavādhiṣṭhitaḥ kramāt

ādidevasamākrāntaḥ kumbhaśuklodayāvahau /
vaidharo devatāntaśca pīyūṣarucirāśirāḥ ?

anilaḥ praṇavādyanto mahāmāyāśirāḥ kramāt /
dhanadonu tato dakṣo viṣṇumūrdhātha bhāskaraḥ

māyāśirāśca vairājo viṣṇvanto bhadrapāṇiyuk /
otadehaḥ paraḥ kumbhastrivikramaparassmṛtaḥ

krodhanaṃ vanamālyantaṃ tadvayaṃ bhuvanāvadhi /
vasargaḥ pāpahantā ca vahniścādyarṇasaṃyutaḥ

cakāraścotadehaścha dvau dṛṣṭirviṣṇumūrdhakaḥ /
daraśca gopanaścobhau vijayorṇassamuddhṛtaḥ

candaścha devī gāyatramṛṣirbrahmādhidaivatam /
viṣṇuṣṣaḍaṅgāni tathā kruddholkādīni padmaja

mūrdhādipādaparyantamakṣaranyasanaṃ matam /
mūrdhniphāle nayanayornāsikāpuṭayostathā

śrotrayorāsyagalayorhṛdaye buhumūlayoḥ /
nyāsaḥ kūrparayoścaiva tathaiva maṇibandhayoḥ

hastayoḥ kukṣimadhye ca guhyecorvośca jaṅghayoḥ /
pādayośca kramādevaṃ nyāsaḥproktaścaturmukha

pītaṃ kaktaṃ ca dhūmrābhaṃ śvetaṃ kṛṣṇaṃ ca lohitam /
valarkṣaṃ pītakaṃ raktaṃ śyāmaṃ śaṅkhanibhaṃ tathā

pāṭalaṃ sphaṭikābhaṃ ca pītaṃ rajatasannibham /
candradīdhitisaṅkāśaṃ padmakiñjalkasannibham

tārābhaṃ bandhujīvābhaṃ nakṣatrābhaṃ ca pāṭalam /
japākusamasaṅkāśaṃ taptajāmbānadaprabham

raviprabhaṃ cākṣarāṇāṃ varṇabhedaḥ pradarśitaḥ /
kālameghanibhaṃ saumyaṃ caturbāhuṃ kirīṭinam

śaṅkhacakragadāpāṇiṃ garuḍārūḍhamacyutam /
evaṃ dhyātvā'rcayeddevaṃ prātaḥ kāle samāhitaḥ

sphaṭikopalasaṅkāśaṃ garuḍārūḍhavigraham /
madhyandine'rcayitvā tamācarejjapamātmavān

pradoṣeṣu caturhastaṃ vainateyoparisthitam /
śyāmalaṃ puṇḍarīkākṣaṃ dhyāyanmantra mudīrayet

kuryāttriṣavaṇasnānaṃ vratasthassaṃyatendriyaḥ /
caturviṃśati lakṣeṇa mantrajāpena sidhyati

mantravitsādhakovāritarpaṇaṃ homakarmaca /
kurvannāpnoti sakalāṃ siddhimiṣṭāṃ sudarlabhām

gomūtrayāvakāhāro japellakṣamatandritaḥ /
pātakebhyo mahadbhyopi mucyate nātra saṃśayaḥ

brahmakūrcaṃ piban lakṣatrayaṃ mantraṃ japansudhīḥ /
tatsamebhyaḥ pātakebhyo vimuktomantravittamaḥ

brahmādi devatāssarvā ninīṣurvaśamātmanaḥ /
aṇimādiphalaṃ prevsustathaivākarṣaṇodyataḥ

vaśīkāre ca sarveṣāṃ pātālagamane tathā /
gandharvayakṣapramukhān pramukhānātmanassadā

cikīrṣuraṣṭākṣaravadanutiṣṭhecchaturmukha /
sakṛduccārayanmantraṃ viṣṇugāyatrisaṃjñitam

vedānāmasakṛtsarva śākhādhyayanapuṇyabhāk /
keśakīṭādiduṣṭāni havīṃṣi dhyānamāsthitaḥ

spṛṣṭvā japenmantramidaṃ sadyaḥ śuddhāni padmaja /
caturṇāṃ mūlamantrāṇāṃ phalametena sidhyati

śrīkaraṃ mantramaparaṃ vakṣye sarvārthasādhanam /
aṣṭākṣaraṃ caturvaktra rahasyaṃ paramaṃ śṛṇu

varṇacakraṃ likhitvādau samabhyarcya tataḥ punaḥ /
uddharecchrīkarāṣṭārṇaṃ mantraṃ mantraprabhāvavit

ādau samuddharaittāramudayaṃ tadanantaram /
dvirekanetramāyāntaṃ krodhanaṃ kaustubhākṣaram

viṣṇuśīrṣaṃ tato lakṣmīmanalaṃ tadanantaram /
mahāmāyāyutaṃ padmamaprameyamanantaram

agnimādiṃ caturvaktraṭhaṭheti śrīkarāhvayam /
bhījamasya pravakṣyāmi yathātatvamudīryate

dīptimānanalaḥ pañca bindurardhenduniṣṭhitā /
bījamaṅgāni ṣaṭcāpi kruddolkādīni pūrvavat

chandhaśca devī gāyatramṛṣirasya prajāpatiḥ /
devatā devadeveśaḥ pratyarṇaṃ pūrvavat smṛtam

ṛṣiśchandodaivataṃ ca
dhyānaṃ saṃprati kathyate /
kalpakānokahacchāyāmāśritya sukhaśītalām

garuḍasya caturbāhossarvālaṅkāradhāriṇaḥ /
skandhadeśe sukhāsīnamaṣṭabāhuṃ kirīṭinam

kundendudhavalaṃ saumyaṃ sarvākalpapariṣkṛtam /
divyagandhaviliptāṅgaṃ divyamālāvibhūṣitam

pītāmbaradharaṃ nīlakuntalairupaśobhitam /
cakraṃ ca musalaṃ bhāṇamaṅkuśaṃ dadhataṃ bhujaiḥ

caturbhirdakṣiṇairanyeśśaṅkhaṃ kaumodakīṃ tathā /
śārṅgaṃ pāśaṃca kalyāṇaiḥ prasannendunibhānanam

garuḍopi ca hastābhyāmubhābhyāṃ pādapaṅkaje /
devasya dhārayan kumbhaṃ pūrṇaṃ pīyūṣavāriṇā

itarābhyāṃ ca hastābhyāṃ spṛśannāsye sthitaṃ tathā /
śriyaṃ ca vāmorutale rukmābhāṃ kṣaumavāsinīm

divyagandhaviliptāṅgāṃ sarvākalpapariṣkṛtām /
subhrālalāṭamukuṭāṃ karṇaviśrāntalocanām

lāvaṇyāmṛtatoyena varṣantīmiva sarvataḥ /
pāśāṅkuśadharāṃ lakṣmīṃ kandarpaśarapīḍitām

dhyātvaivaṃ pūjayitvātu vratasthassaṃyatendriyaḥ /
dvādaśāhaṃ japenmantraṃ dhyātvā pārśve nidhidvayam

ūrdhvabāhurjaletiṣṭhannurodaghne samāhitaḥ /
ādityābhimukho mantrī juhuyācca samicchatam

bilvodbhavaistathālakṣmīṃ kusumaiḥ pāyasodanaiḥ /
śuddhodanairghṛtāktaiśca aṣṭottarasahasrakam

evaṃ kṛte vidhānena puṣṭirutpadyate'calā /
pauṣṭikādi ca pūrvoktaphalaṃ pūrvoktasaṅkhyayā

śāntikaṃ pauṣṭikaṃ karmamantreṇānena sādhayet /
lakṣmīnārāyaṇāhvānaṃ mantraṃ paramadurlabham

tasyoddhāraṃ pravakṣyāmi śṛṇu varṇakrameṇa tam /
udgīthaṃ manujeśānaṃ viṣṇuṃ mandara meva tat

sūktīndumukhyamaparaṃ gadinaṃ kumbhamarpitam /
ādyantaṃ vijayaṃ dattaṃ māhendraṃ cāprameyakam

garuḍaṃ dakṣamaparaṃ mahāmāyāṃ vināyakam /
ādidevaṃ tato vahniṃ gopanaṃ ca caturgatim

ādyaṃ pracaṇḍamākāraṃ śaṅkhamādiṃ ṭhaṭheti ca /
uddṛtya ṣoḍaśārṇaṃ tanmantraṃ bījaśca kathyate

dyumaṇiṃ bindumaparaṃ vāmanaṃ bindumuddharet /
aṅgāni pūrvamuktāni chandho gāyatramucyate

viddhi śukro munirdevo lakṣmīnārāyaṇassmṛtaḥ /
japaṣṣoḍaśalakṣaṃ tu tadardhaṃ vāritarpaṇam

homastatardhomantrasya phalānyāhuryathā kramam /
saṅkarṣaṇādimūrdīnāṃ tisṛṇāṃ manurucyate

āditaḥ pūrvavatsapta varṇānāmamanupūrvaśaḥ /
uddhāraśśiṣṭavarṇānāṃ brahman saṃprati kathyate

dīptimān vahniraurvaścha druvaśśuklastathādimān /
binduḥ prajāpatiścādyo vahnirugro mukhaṃ tataḥ

sumukhaṃ gopanayutaṃ vāyurādyaṃ ṭhaṭhāntitam /
dvādaśāroṇātmako mantrobījamaṅgaṃ ca pūrvavat

chandaśca devī gāyatramṛṣisyānnīlalohitaḥ /
devassaṅkarṣaṇo varṇo devatā tatvanirṇayaḥ

dvādaśākṣaravat jñeyaḥ puraścaraṇamīritam /
phalāni pūrvamuktāni vāksiddhirmahatī bhavet

jñānaṃ ca mahadāpnoti yaccānyadadhikāṅkṣitam /
tatsarvamacirādeva sidhyenmantraprabhāvataḥ

śaṅkhagokṣīradhavalaṃ caturbhāhuṃ kirīṭinam /
vasānaṃ vasanaṃ kṣaumaṃ pūrṇacandranibhāvanam

muktāṃ bhūyiṣṭhamākalpaṃ sauvarṇamatiśobhanam /
dadhānaṃ mukhyahastena jñānamudrāsamanvitam

pustakaṃ vāmahastena bibhrāṇaṃ bhujayordvayoḥ /
ūrdhvayossphāṭikaṃ śaṅkhamakṣamālāṃ yathātatham

dhavalaiḥ kālajaiḥ puṣpaiśśobhitaṃ vanamālayā /
śvetapadme sukhāsīnamevaṃ dhyāyīta mantravit

dhyāyato buddhiratulā bhavet jñānaṃ ca puṣkalam /
śāntikaṃ pauṣṭikaṃ karma kuryādetena padmaja

bahunā kiṃ pralāpena dviṣaṭkākṣaravatphalam /
sarvamāpnoti manunā sādhakaḥ kamalāsana

pradyumnamantramadhunā sarvakāmaphalapradam /
bravīmi tasya coddhāraṃ kathyate'kṣaraśaḥ kramāt

ādita ssaptavarṇānāmuddhāraḥ pūrvamīritaḥ /
asyāsādhāraṇārṇānāṃ saṃpratyuddhāra ucyate

pāpmānamanalaṃ viṣṇumantraṃ vāyumukāravat /
mandaraṃ bhadrapāṇiṃ ca madhusūdanamārutau

āgneyī daśa caikaṃ cāpyarṇassaṃhananaṃ matam /
anusvāraparo viṣṇurbhīja maṅgaṃ ca pūrvavat

ṛṣissanatkumārassyācchando gāyatramucyate /
pradyumno devatā mantrassādhanaṃ phalameva ca

pūrvoktam
mantramaparamāniruddhamataḥ param /
śṛṇu brahman yathāpūrvaṃ saptārṇānāmanukramāt

uddhāraḥ pariśiṣṭānāmārṇānāṃ kathyate' dhunā /
praṇavādyobhadrahastomāyā saptārcireva ca

udayau dvau ca subhago gopano vāyurādimān /
bījamasyāprameyaśca visargaśchāvasānataḥ

ṛṣiśca sanakaśchandaḥ pūrvavaddevatā tathā /
aniruddho dvādaśārṇaḥ krameṇa samudīritaḥ

yathāpuraṃ ṣaḍaṅgāni sādhanaṃ phalameva ca /
caturviṃśatimūrtināṃ samākhyā dvādaśādibhiḥ