Padma Samhita · Chapter 4.10

kathaṃ mahotsavaḥ kaścit kīdṛktasya phalaṃ ca kim /
phalakāmairanuṣṭhātumavijñāto na śakyate

mahyaṃ jijñāsamānāya prasīda bhagavannidam /
ākhyātumarhasi yathā mahotsava manuttamam

ārādhanamidaṃ brahman mokṣakāmai ranuṣṭitam /
paśvādiphalakāmaistu duranuṣṭheyamadbhutam

toṣaṇaṃ mama kalyāṇa manuṣṭhitamamānuṣam /
devaireva purāvṛtravadhe tatpāpanuttaye

indreṇāpi diviṣṭhena māmuddiśya kṛtaṃ śubham /
rūpaṃ tasya pravakṣyāpi yathā tadavadhāraya

savassāṃsārikaṃ duḥkhamuttaranti tadambhudhim /
yaṣṭāra iti vidvaṃso nirbruvantyutsavāhvayam

nityo naimittikaḥ kāmya strividha ssa mahotsavaḥ /
tatra nityaṃ pratisamaṃ māsapakṣavyavasthayā

śubhe ca tathinakṣatre viṣuve cāyanadvaye /
kalpitāvabhṛthasnānassevitassarvadaivataiḥ

naimittika ssa vijñeyo nimitte sati kalpitaḥ /
avagrahe ca durbhikṣe colkāpāte tathā niśi

darśane suracāpanya vālamīnasya darśane /
devatā pratikāyānāṃ kampane bhedane tathā

hasane calane caiva rodane patane tathā /
gopurālayasālānāṃ maṇṭapasya ca bhedane

bhaṅge vā patane vāpi parvatānāṃ tathaiva ca /
nipāte caityavṛkṣasya bhaṅge jvalanadarśane

vṛkṣe tvanyaphale dṛṣṭe divā nakṣatradarśane /
bhūtādidarśane ghore bhūmikampe tathaiva ca

digdāhe ca mahāvāte mahāvṛṣṭai tathaiva ca /
grahayuddhe ca sañjāte pratisūryasya darśane

nṛpe rogābhibhūte ca grāme janapade tathā /
masūrikādi ghorāṇāṃ vyādhīnāṃ ca praveśane

paracakrapraveśe ca vyomni nemisvane tathā /
divyadundibhi nirhrade nirmale gagane sati

varṣevā'śanipāte ca śakradhvajanipātane /
jale'gnijanane caiva tathaivādbhutadarśane

evamādau mahotpātenaimittika mahotsavaḥ /
caturṇāṃ puruṣārthānā muddiśyānyatamaṃ phalam

utsavonuṣṭhitaḥ kāmyassaṅkalpitaphalapradaḥ /
kathyate'vabhṛthasnānasamayastrividhotsave

māsarkṣe viṣuve caiva grahaṇe cāyanadvaye /
darśe ca pūrṇamāsyāṃ ca śravaṇe sarvamāsike

rohiṇyāṃ ca punarvasvoḥ pratiṣṭhādivase tathā /
rājñāṃ janmadine kuryādabhiṣekadine tathā

ete ṣvavabhṛthasnānaṃ brahman sarvārthasādhanam /
māsena vā tadardhena dvādaśāhena vā punaḥ

navāhenotsavaḥ kāryaḥ ssaptāhena caturmukha /
ahobhiḥ pañcabhi rvāpi tribhirvaikena vā punaḥ

ekāhe tryahake dhīmān dhvajakarmana kārayet /
saṅkalpapūrvamālocya māsaṛkṣe tathā tithau

tīrthāvagāhanaṃ yadvā saṃyoga tithitārayoḥ /
viṣuve cāyane caiva nādarastithi tārayoḥ

duṣṭavārādi saṃyoge śubhameva yathoditam /
pattane nagare grāme pratilomā'nadhiṣṭhite

aśūnye balidānādīn rathyāsu bahirācaret /
nocedāvaraṇeṣveva kuryādantarmahotsavam

grāmādi rahite dhāmni notsavaṃ bahirācaret /
antarāvaraṇeṣvena na tu tyājyaṃ kathaṃ cana

pāstveṅge ca svatantre ca dhāmanyutsava sampadi /
yaugapadye na doṣasyāddoṣo vāstvaṅgayordvayoḥ

svatantraṃ paratantraṃ ca āśrayaṃ samudāhṛtam /
uttamādivibhedena ālayastrividhobhavet

viṣṇvālayaṃ purā''kalya paścādgrāmādi kalpanam /
svantramiti vijñeya mālayaṃ tūttamaṃ bhavet

grāmādikaṃ pūrā''kalpya paścādālayakalpanam /
asvatantramiti khyātamālayaṃ madhyamaṃ bhavet

svatantrālaya klṛptāsu rathyāvīdhīṣu padmaja /
antare sthāpitaṃ yatta dāśrayaṃ tvadhamālayam

svatantre paratantre vā utsavādau kṛte sati /
pūrvaṃ svatantre kartavyaṃ vāstvaṅge dviguṇārcanam

āśrayādiṣu bimbeṣu utsavādau kṛte sati /
tattadāvaraṇe kuryā dbāhyavīdhyāṃ tu nācaret

mohādvā yadivā lobhā dviparīte kṛte sati /
arātibhiḥ paribhavo mahāvyādhyādipīḍanam

prāṅgaṇaeṣu ca sarveṣu prāsādādiṣu mūrtiṣu /
prītyābhiṣekamātraṃ ca snapanādyutsavaṃ vinā

kārayedyadi sammohātprajānāṃ pīḍanaṃ tathā /
tasmātsarvaprayatnena viparītaṃ tu nācaret

anyathā kārayenmohādrājā rāṣṭraṃ ca naśyati /
grāmāśrayādibherāṇāmālayāśrayakeṣu ca

grāmavastu balihīnaṃ kevalotsavamācaret /
devatāntarakalyāṇe vartamāne'pi vaiṣṇavam

kuryāddevotsavaṃ naiva vaiṣṇave'nyaṃ kadācana /
vāsudevo hi devānāṃ devatāmnāyate yataḥ

utsave devadevasya dhvajārohaṇapūrvake /
pravartite devayāge caulādi rnaiva saṃskriyā

grāmādyanaṅgāyatane pravṛtte'pyutsave punaḥ /
kuryāddevāntaraṃ yāgaṃ caulādiṃ caiva saṃskriyāṃ

toraṇādīni cānyeṣāṃ devānāmutsave satām /
utpāṭya rathyāsu hare rutsavo nānyathā bhavet

klṛptānāmutsave viṣṇo rathyādiṣvitarotsave /
sthirāṇāṃ toraṇādīnāṃ kuryaṃ notpāṭanaṃ bhavet

adhike māsi śukrādau gurau ca stamite sati /
notsavaḥ prathamaḥkalpyaḥ kalpane rājarāṣṭrayoḥ

prajānāṃ caiva duḥkhaṃ syā dvyādhirvā mṛtireva vā /
utsave ca dvidīyādau noktadoṣaḥ kathañcana

māsādāvutsavadine pañcāhāvadhike kramāt /
dhvajārohaṇakālastu brahmannadya pradarśyate

ekonaviṃśatitame dine tīrthāṅkurārpaṇāt /
aṣṭādaśadine vāpi prāgeva samaye śubhe

vainateyadhvajārohāddvādaśāhe'thavā bhavet /
yadvā kalyāṇa divasaṃ triguṇīkṛtya tāvatām

ādau dinānāṃ kartavyaṃ dhvajārohaṇamabjaja /
aṅkurānaparyayitvāhni puṇye purve yathodite

dhvajamāropayetpaścānmaṅgalaṃ maṅgale dine /
daivādvāmānuṣādvāpi kutaścitkāraṇādyadi

utsavāhargaṇā tpūrvaṃ yathoktaina kṛte dhvaje /
utsavārambhaṇadine divā''ropya dhvajaṃ niśi

bherītāḍanamanvakca pālikāsvaṅkurān kṣipet /
aghoṣya bherīṃ prathamaṃ dhvajārohaṇamanvataḥ

tato'ṅkurārpaṇaṃ yadvā yadvā niśyaṅkurārpaṇam /
pradoṣe'nvagdhvajāroho bherītāḍanamanvataḥ

tatkāle'pi dhvajārohe traividhyaṃ caturāsana /
tantūtthaṃ kṣaumavasanaṃ nirdeṣaṃ sūkṣmamāhṛtam

kārpāsaṃ vā yathāvittaṃ dhvajārthe kalpayedbudhaḥ /
āyataṃ daśabhirhastai rvistīrṇaṃ pañcabhirdṛḍham

navabhirvāṣṭabhirvāpi saptabhirvā caturmukha /
mūlabherasamāyāmaṃ dvārāyāma mathāpi vā

āyāmārdhena vistīrṇaṃ pādena kṛte śekharam /
śekhareṇa samaṃ pucchaṃ tadardhaṃ karṇapuccakam

nirṇejitaṃ khalīyuktaṃ śoṣitaṃ lakṣaṇānvitam /
āhṛtya madhye vastrasya garuḍaṃ kāñcanaprabham

navatālapramāṇena dvibhujaṃ dhṛtañcukam /
dhṛtapuṣpāñjalipuṭaṃ śvetāmbara dharaṃ vibhum

daṃṣṭrākarālavadanaṃ brukuṭīkuṭilekṣaṇam /
nīlanāsāgrasaṃyuktaṃ kuñcitāsavyapādakam

pṛṣṭhe niviṣṭasarvāṅghriṃ pakṣavikṣepaśobhitam /
gagane gamanārambhaṃ suvṛttaṃ ghoradarśanam

karaṇḍikāmukuṭinaṃ lalāṭe racitālakam /
hārakeyūravalayanūvurābharaṇojjvalam

ananto vāmakaṭako yajñasūtraṃ tu vāsukiḥ /
urasi nyastakārkoṭaṃ kaṭisūtritatakṣakam

bibhrāṇaṃ dakṣiṇe karṇe padmāhvayasarīsṛpam /
mahāpadmaṃ tathānyatra śaṅkhaṃ śirasi bhoginam

gulikaṃ cāṅgade sarpaṃ varṇasteṣāṃ ca kadhyate /
sphaṭikābhaśpoṇitābhaḥpītābhodhūmravarṇakaḥ

raktāmbuja nibhaśchaiva piṅgalastu hinaprabhaḥ /
bhramarābhaḥ
kramācchatraṃ muktāhema pariṣkṛtam

upariṣṭācca kartavyaṃ pārśvayoścāmaradvayam /
adhastādambajaṃ purṇa kumbhamadbhiśca pālikāḥ

saṅkurā likhitavyāssyurdīpau dvau pārśvayordvayoḥ /
pañcavarṇairlikhedeva mantaraṃ śyāmavarṇakam

antarālaṃca kṛṣṇena citraye ccitrakṛttamaḥ /
dhvajārdhasammitāṃ caiva patākāṃ caiva citrayet

adhivāse dine prāpte tamisrāyāṃ gurussvayam /
kāruśālāṃ praviśyātha kārayitvātha śilpinā

nayanonmīlanaṃ tasmin visṛṣṭe śilpinī psitaiḥ /
arthaiśca toṣite saścā nikṣipya śirasi dhvajam

mūrtripasya suvarṇādi lohapātre samarpitam /
prādakṣiṇyena dhāmādīnnī tvā tūrya nināditam

tataḥpraveśayedyāga maṇḍapaṃ deśikottamaḥ /
nayanonmīlanādanya tpratiṣṭhāyāmivācaret

chāyādhivāsanaṃ sadyo jale kuryādyathāvidhi /
kumbhaiṣṭoḍaśabhi śchāyāsnapanaṃ darpaṇe bhavet

pauruṣeṇaiva sūktena gāyatryā svasya pūjayet /
śāyayecchāli bhārādāvāstīrṇe navavāsasi

śāyitasya paṭasyātha apasavye sahāṣṭabhiḥ /
parito nyastakalaśairvardhanyā ca ghaṭaṃ kṣipet

āvāhya garuḍaṃ kumbhe karake ca sudarśanam /
indrādīnaṣṭapūrvādi kalaśeṣu supūjayet

śodhayitvā ca garuḍaṃ paṭasthaṃ śoṣaṇādibhiḥ /
saṃhṛtya tatvāni tataḥ kramādutpādya pakṣiṇam

caturṣu pārśva kuṇḍeṣu home sthaṇḍilabhūṣu vā /
kuṇḍe mahānase vāpi samidhājyai ryathāpuram

śāntihomassparśanaṃ ca secanaṃ ca yathāpuram /
paṭaṃ vistīrṇagaruḍaṃ mandirābhimukhaṃ yathā

pradarśyāpāhayettatra vyāhṛtyā
sannidhiṃ tataḥ /
prārthayeta gurustasya gādhayā vakṣyamāṇayā

mahābala mahābāho vainateya vayodhipa /
sannidhatsva paṭe tubhyaṃ samaḥ praṇavamūrtaye

karmaṇāṃ siddhimāhotaḥ kuruṣva vihageśvara /
ahutavyāstrayo lokā devasyotsava saṃpadi

yajedātmīya gāyatryā tamarghyādyupacaryayā /
nivedayettatastasmai nivedyaṃ ca caturvidham

kumbhāya ca nivedyānnaṃ stotrergaruḍatoṣaṇam /
vāhanāya mahāviṣṇo stārkṣyāyā mitatejase

garuḍāya samastubhyaṃ sarvasarpendra mṛtyave /
namo namaste pakṣīndra svādhyāyavapuṣe namaḥ

vihagandre manaste'stu samutpāṭitakalpaka /
āhṛtāmṛtakuṃbhāya jananīdāsyamocine

surāsurendrajayine nāgendrābharaṇāya te /
yadādhārmidaṃ sarvaṃ tadādhārāya te namaḥ

pakṣau yasya bṛhatsāma rathantaramapi dvayam /
akṣiṇī cāpi gāyatri trivṛtsāmaśiraḥ smṛtam

stoma ātmā namastasmai vāmadevyāṅgasampade /
namaḥprāṇādi vāyūnā miśāya garuḍātmane

doṣānapayāyākhaṇḍan guṇānāvaha sarvataḥ /
vighnāni jahi sarvāṇi ātmasātkūru māmapi

stutvaivaṃ gāruḍaṃ mantraṃ japedekāgramānasaḥ /
turyāghoṣairvedaghoṣairjāgareṇa nayenniśām

nivedyaṃ kabalīkṛtya mantrayitvāca mantravit /
pauruṣairgāruḍairmantrai rvasthyānāmapi yoṣitām

kṣipedañjiliṣu dhvātvā garuḍaṃ cācyutaṃ harim /
bhakṣayitvā trayaḥ piṇḍān janayeyussutān bahūn

taṃ prabhāte samārādhya nivedya ca harviḥkramāt /
vastrābharaṇa puṣpaistu paṭasthaṃ śobhayetkhagam

āropya hastipṛṣṭhe pārathe vānyatra maṅgale /
śibhikādau nayedgrāmaṃ prādakṣiṇyena dhāma vā

bherīmṛdaṅgapaṭahauśśaṅkhakāhalacihnakaiḥ /
ghoṣayetpuratastasya nṛttairgeyaiśca sarvataḥ

khageśa vādyayormadhye pālikāssaṅkurānvitāḥ /
vaheyurbrāhmaṇāssarve śirobhissaṃyatendriyāḥ

bimbamautsavamanyacca garuḍasyāntike'thavā /
icchayā yajamānasya sarvamaṅgalasaṃyutam

agrato balipīṭhasya bahirvā dhāma gopurāt /
dhvajastambhaṃ khanedbhūmau nirdeṣaṃ dāravaṃ sthiram

antassāro bahissāro nissārastrividha staruḥ /
kramukādi bahissāraṃ praśastaṃ viduruttamam

antassāraṃ candanādi praśastaṃ stambhakalpane /
nissāraṃ varjayettsambhaṃ śatatālāyataṃ śubham

mānāṅgulapramāṇena viṃśatyūnamathāpi vā /
prāsādocchrāyamathavā yadvā gopurusammitam

caturdhā vibhajettsambhamekāṃśenaiva mastakam /
tasyacādhārabhūtānāṃ ccheditānāṃ tu mūlataḥ

trayāṇāmapi pīṭhānāṃ stambhāgre viniveśanam /
āyatāni ca pūṭhāni dvitālena caturmukha

vistīrṇāni tadardhena tadardhena ghanāni ca /
mūle sthūlāni sūkṣmāṇi cāgre yuñjīta bhūruhān

agre pīṭhadvayecchidre dhvajayaṣṇiṃ ca sskṛtām /
niveśayecchidrayitvā dhvajastambhaṃ caturmukha

niveśayedveṇukaṃ vāsava vā saptapañca vā /
itthaṃ bhūtaṃ dhvajastambhaṃ pīṭhasyottarapārśvataḥ

ārādhya vedavidvipraiḥ prāgagraṃ śāyayedguruḥ /
yadvodagagraṃ prakṣālya stambhamabliṅgamantrataḥ

kuśaiśca sāgraiḥ pracchādya stambhamūrdhvamukhaiśśubhaiḥ /
saṃveṣṭya darbhamālābhi rviṣṇusūktena deśikaḥ

dhvajastambhāvaṭe nyasya lohabījādi śodhitam /
tatrāvaṭe dhvajastambhaṃ sthāpayitvādṛḍhaṃ yathā

prāsādābhimukhaṃ
tasya veṇvagravivare dhvajam /
pāśenāṅguṣṭhanāhena triguṇīkṛtya tantunā

dhvajaṃ niveśayedyadvā stambhamāruhya bandhayet /
baddhadhvajāgrastambhaṃ vā sthāpayecchaktyapekṣayā

evaṃ niyojya yaṣṭyagre muhūrte śobhane guruḥ /
pūrvāhṇe vātha madhyāhne dhvajamāropayettathā

badhvā puruṣamantreṇa sapatākaṃ saghaṇṭakam /
suvarṇo'sīti mantreṇa dhvajasyāropaṇaṃ bhavet

prāsādābhimukhaṃ sthāpya khagendraṃ paṭasaṃsthitam /
tūryaghoṣaṃ tathāmnāyaghoṣaṃ dikṣu ca ghopayet

khageśamālāmantrādīṃ statkāle deśiko japet /
stambhamūlasthale vediṃ hastaissaptabhirāyatām

tāpadbhireva vistīrṇāmekahastasamucchṛtām /
pañcabhirvā tribhirvāpi caturaśrāṃ prakalpayet

vedikāyāstṛtīyāṃśe madhye pīṭhaṃ prakalpayet /
catuṣṭayāṅgulotsedhaṃ mekhalātrayasaṃyutam

bhāge tṛtīye tasyāpi padmamaṣṭadalai ryutam /
karṇikāstho yathā stambhastathā kuryādvicakṣaṇaḥ

ṣoḍaśa stambhasaṃyuktā prapā syātparita stataḥ /
caturdvārasamāyuktā darbhamālādyalaṅkṛtā

puṇyāhaṃ pācayitvātha prokṣayetkumbhavāriṇā /
gāruḍenaiva mantreṇa kalaśaiścāṣṭabhi stathā

indrādyaiḥprokṣayet stambhaṃsvaisvairmantrairyathākramam
prārthayeta sthitiṃ tasya garuḍasya dhvajodare

utsavāvabhṛthaṃ yāvadgādhayā vakṣyamāṇayā /
pakṣīndra pakṣavikṣepataraṅgānilasampadā

nirastāsurasannāha samare śatrusūdana /
sannidhatsya paṭe yāvadutsavāvabhṛthāvadhi

utsavapratimāṃ yānamāropya śibhikādikam /
dhvajastambhasamīporvīmānīyādarśayetkhagam

āhvonārthamaśeṣāṇāṃ lokānāṃ patageśvaram /
niyujya devastadanu prāpnuyānmaṇḍapāvanim

ārādhayettrikālaṃ tu garuḍaṃ ca nivedayet /
anirvāṇaṃ tathā dīpaṃ rakṣennaktaṃdivā sadā

utsavapratimāṃ tatra maṇḍape ca yathāvidhi /
pūjayitvā nivedyātha havirhomāntamarcayet

rātrau tu pūjayitvaivaṃ
bherītāḍana siddhaye /
dhvajapīṭhasaṃya purataḥ kṣitiṃ gomayapāriṇā

ālipya caturaśraṃ ca sudhācūrṇaiścaśobhayet /
caturaśraṃ dhānyapīṭhaṃ droṇapañcakaśālinā

kalpayitvā kālacakraṃ tasya madhye niveśayet /
balyarcāmapitatraiva sthāpayeddhvaja sammukham

pūjayitvā nivedyātha havīṃṣi vividhāni ca /
āpipte puratastasya bhūtale dhānyapīṭhake

tāvadeva mahābherīṃ veṣṭitāṃ navavāsasā /
dakṣiṇetarayostasyā bherikāyā yathākramam

bhāgayorarcayedviṣṇuṃ śriyaṃ caiva yathāvidhi /
triguṇāṃ prakṛtiṃ caiva madhyabhāge sabhājayet

muhūrte śobhane bherīṃ śabdatanmātravidyayā /
koṇena tāḍayenmūrtitrayaṃ dhyāyedgurussvayam

tataḥ pāraśavassnāto darbhapāṇiralaṅkṛtaḥ /
sopavītottarīyaśca vahan bherīmalaṅkṛtām

śaṅkhādivādyasahitāṃ tālabhedavidhānavit /
ghoṣayedguruṇendrādau hūyamāne marudgaṇe

divyāyudhānāmāhvānaṃ tathā vaikuṇṭhavāsinām /
tathā pāriṣadāssarve viṣvaksenābhirakṣitāḥ

āhvātavyā makhe tasmin kumudādyā ssanāyakāḥ /
ṛṣibhiśca marīcyādyairbrahmalokanivāsibhiḥ

samāhvānaṃ viriñcasya rudralokanivāsibhiḥ /
sārdaṃ pramathasārdhaiśca rudraśca vṛṣavāhanaḥ

āhvātavyāstathānye ca tattallokanipāsinaḥ /
vāhanaiḥparivāraiśca sākaṃ tasmin mahūtsave

vidyāśca mūrtidhāriṇyastrayū caṅgairvapuṣmatī /
ahvātavyāssamāhvānaṃ sarveṣāṃ ca svanāmabhiḥ

nityotsavārcaṃ parito vīdhikāsu sudarśanam /
annarmūrtividhānaṃ ca pradīpairbahubhirvṛtam

gamayitvā pratidiśaṃ bherītāḍanapūrvakam /
grāmamadhyaṃ samāsādya tatrāvāhya caturmukham

arcayitvā makhe tasmin yācitvā sannidhiṃ guruḥ /
indrādīṃśca pratidiśaṃ balyarthaṃ sannidhiṃ tadā

arcayitvā tūryaghoṣaṃ ghoṣayitvāsvatālavat /
anyatra gāruḍaṃ tālamantarāleṣu ghoṣayet

praviśya mandiraṃ tatra yathāpūrvaṃ niveśayet /
ādāyotsavabimbaṃ vā kevalaṃ vā sudarśanam

annamūrtividhānaṃ vā bherīmādāya kevalām /
rathyāsu devatāhvānaṃ tatra tatra yathāvidhi

devatāhvānavelāyāṃ bherīṃ śṛṇvantiye narāḥ /
tairnadītaraṇaṃ naiva yānaṃ vā yojanātparam

anādṛtyotsavaṃ mohāddūraṃ yāyājjano yadi /
sa yāti nirayasthānaṃ pretya duḥkhamihāpi ca

tasmādavabhṛthaṃ yāvadvasettatraiva no prajet /
dhvajārthamaṅkurā yena nyastāssa yadi kāraṇāt

kutaścidasamartho vā mṛto vā deśikottamaḥ /
śeṣaṃ samāpayedanyaḥ putro vā tadanujñayā