Padma Samhita · Chapter 3.18

aṣṭādaśo'dhyāyaḥ/
yādavasyātha kṛṣṇasya nirmāṇamadhunocyate/
kalyāṇalakṣaṇayutaṃ tribhaṅgaṃ siṃhaviṣṭare

tiṣṭhantaṃ rukmiṇītasyabhāmābhyāṃ sahitaṃ prabhum/
īṣatkuñcitavāmāṅghriṃ susthitetaramadbhutam

meghaśyāmaṃ viśālākṣaṃ pītavastraṃ caturbhujam/
devīsavyabhujanyastavāmahastasaroruham

adhomukhaṃ tu hastāgraṃ nābhisūtrasamanvitam/
vāmetarakaraspṛṣṭakrīḍāyaṣṭimanoharam

tatkaraṃ kaṭisūtrānta mudaste tu karadvayam/
śaṅkhacakradharaṃ kuryāddvibhujaṃ vā yathoditam

śrīvatsāṅkaṃ prasannābhaṃ vareṇyaṃ mukuṭojvalam/
baddhālakabharaṃ vāpi bhāge divye prakalpayet

rukmiṇīṃ dakṣiṇe pārśve satyabhāmāmathottare/
vinatānandanaṃ vāpi satyāsthāne prakalpayet

āsīnaṃ vā sukhaṃ sārdhaṃ devībhyāṃ saha viṣṭare/
vāhastena varadaṃ dakṣiṇenābhayapradam

yadvā śayīta nṛpavatparyaṅke śobhite bhṛśam/
bhogīndraśayane vāpi mahāparyaṅkamaṇḍite

pṛṣṭhato maulipārśva tu rukmiṇīṃ kārayetsudhīḥ/
satyabhāmā bhavetpādasaṃvāhanasamudyatā

saṃvahayaṃtyau vā devyau hastābhyāṃ pādapaṅkajam/
tārkṣyārūḍhaṃ caturbāhuṃ bibhrāṇaṃ śarakārmukam

mukhyābhyāmaparābhyāṃ ca śaṅkhaṃ cakraṃ caturmukha/
āropya satyabhāmāṃ vā vāmotsaṅge caturbhujam

āruhya yāntaṃ pakṣīndraṃ dvibhujaṃ vā yathāruci/
yadvā'rjunasya sārathyaṃ kurvāṇaṃ parikalpayet

rathasthitaṃ caturbāhuṃ pratodapragrahau dadhat/
vāmahastena mukhyena dakṣiṇena kareṇa tu

kapidhvajāya prahvāya paravidyāmudīrayan/
aparābhyāṃ ca hastābhyāṃ śaṅkhacakradharaṃ prabhum

kirīṭinaṃ viśālākṣaṃ śrīvatsāṅkitavakṣanam/
dvibhujaṃ baddhakeśaṃ vā kuryātkamalasambhava

pārthaṃ ca prāṃjaliṃ prahvaṃ seṣuṃ seṣudhikārmukam/
kirīṭinaṃ śyāmavarṇaṃ kalpayetsyandhanasthitam

viśvarūpaṃ tu vā kuryātkeśavaṃ keśisūdanam/
bṛndāvanagataṃ kṛṣṇaṃ gavāmanucaraṃ prabhum

īṣatkuñcitavāmāṅghrimitareṇa ṛju sthitam/
gacchantamapi gāyantaṃ vaṃśena paramādbhutam

īkṣamāṇaṃ manāksavye pārśve puṣpāvataṃsitam/
vicitrapuṣpagrathitavanamālāvibhūṣitam

barhibarhaiśca rucirairvatsadāmavibhūṣaṇaiḥ/
bhūṣitaṃ devagandharvasiddhacāraṇasevitam

kadambamūle vā madhyaṃdine kṛtvā pratiṣṭhitam/
vyatyāsena sthitaṃ padbhyāṃ vāmena ṛjunā sthitam

dakṣiṇaprapade nānyapṛṣṭhabhāgaspṛśā sthitam/
gobhissavatsairhariṇaiḥ pakṣibhiśca samāvṛtam

ṛṣibhirdevagandharvaiḥ kinnarādyaiśca sevitam/
phaṇīndraṃ kāliyaṃ yadvā phaṇāpañcakasaṃyutam

purataḥ paruṣākāraṃ nāgākāraṃ ca pṛṣṭhataḥ/
kṛtāñjaliṃ durādharṣamākramya śirasi sthitam

vāmapādena gṛhṇantaṃ pucchaṃ vāmena pāṇinā/
dakṣiṇābhayadaṃ hastaṃ nṛtyantaṃ kārayedbudhaḥ

athavā kṛtatāṭaṃkaṃ kurvāṇaṃ nāṭyamadbhutam/
mahiṣītaṃ nāgarājasya bhikṣamāṇāṃ svakaṃ patim

kṛtāñjalipuṭāṃ devīṃ tatpārśve vepitāṃ sthitām/
rāsamaṇḍalamadhyasthaṃ yadvākuryājjagadgurum

devyorgṛhītvā hastābhyāṃ karāgraṃ madhyataḥ sthitam/
nṛtyantaṃ bahusāhapragopakanyābhirāvṛtam

navanītāya nṛtyantaṃ sarvena ṛjunā sthitam/
uddhṛtya dakṣiṇaṃ pādaṃ viparītamathāpi vā

kārayedvāmahastaṃ tu cubukāntasamucchrayam/
abhītidaṃ dakṣiṇena varadaṃ vā yathāruci

madhyataḥ stananābhyoścha varado hasta iṣyate/
yādavendreṇa kṛṣṇena kriḍayā yadyathāśritam

kalpayitvā vapuntattadārādhyāṃ vibhavārthibhiḥ/
ekaberavibhānāṃ cet sthāpayedbrahmaṇaḥ pade

karmārcādīni bimbāni kalpayedraghuvīravat/
rukmiṇīsyabhāmābhyāṃ saha pīṭhe prakalpayet

rukmiṇī kanakaprakhyā satyā'nyā śyāmalā bhavet/
karaṇḍikāmakuṭinī yadvā dhammilladhāriṇī

satyabhāmā kare padmaṃ dhārayeddakṣiṇe param/
ūrau viśrāmayedanyaṃ dhārayedanyathā'thavā

yathoktataravinyāsakalpanaṃ kamalāsana/
bālye'pi yā yā devī syātyā sā kalpyā yathāvidhi

nirmāṇamadhunā vakṣye kalki viṣṇormahātmanaḥ/
piṅgaśmaśruṃ vivṛttākṣaṃ raktābhaṃ hayavahanam

dvibhujaṃ carmavasanaṃ khaḍgakheṭakadhāriṇam/
jaṭāmukuṭasaṃyuktaṃ brahmalakṣmyā virājitam

paiśāce yānakaṃ kuryāddivye bhāge sthitirbhavet/
yadvā caturbhujaṃ kuryānmukhyābhyāṃ khaḍgakheṭakau

aparābhyāṃ śaṅkhacakraṃ hastābhyāṃ dadhataṃ harim/
āsane kheṭakaṃ khaḍgaṃ na kurvīta kadācana

abhayaṃ varadaṃ caiva karayugmaṃ prakalpayet/
śayanaṃ neṣyate tanya kalpiviṣṇo rmahātmanaḥ

ekaberavidhānaṃ cetkalpayedbrahmaṇaḥ pade/
āsīnāṃ sthānakaṃ caiva bhāge divye prakalpayet

tasya dakṣiṇapārśve tu yājñavalkyaṃ purohitam/
nāradaṃ dakṣiṇe pārśve bhittibhūmiṣu devatāḥ

kalpayejjaṅgamān bimbān dvijānvā caturbhujān/
abhayaṃ varadaṃ caiva dvau bhūjau parikalpayet

caturbhuje śaṅkhacakre dvayoraparayorbhavet/
śrīvatsevāṅkitoraskān jaṭāmukuṭasaṃyutān

kirīṭino vā kurvīta karmabimbāṃśca lohajān/
viṣṇoraṃśāvatārāṇāṃ kamān rcādyāstu kautukāḥ

kalpanīyāścaturhastāḥ dvibhujā vā yathāruci/
daśatālena mīyantevarāhādyāścamūrtayaḥ

bāhyāṃścābhyantarāṃścaiva parivārān prakalpayet/
ādimūrteryathā tadvat na viśeṣostikaścana

lakṣmīnārāyaṇaṃ kuryādbhujāṣṭakasamanvitam/
yadvā caturbhujaṃ śaṅkhacakrādyāyudhabhūṣitam

vāmabhāge tu hastābhyāṃ varadaṃ paṅkajaṃ tu vā/
itarābhyāṃ ca hastābhyāmabhayaṃ cakrameva vā

vapuṣo dakṣiṇe bhāge viṣṇurvāme saroruhā /
pīnastanataṭo vāmaśśrī vatsāṅkastathetaraḥ

vāmo hemanibhaśśyāmo dakṣiṇo bhāga iṣyate/
āsīnaṃ vā śayānaṃ vā garuḍārūḍhameva vā

sthitaṃ vā kalpayeddhevaṃ yajñamūrtimataśśṛṇu/
tiśīrṣaṃ ca tripādaṃ ca catuśśṛṅgaṃ caturmukha

saptahastaṃ japā tulyaṃ vanamālāvibhūṣitam/
abhītido mukhyahasto dakṣiṇo'nyo varapradaḥ

pañcautarakarāśca sruksruvādyāyudhabhūṣitāḥ/
ekamūrtirvāsudve lakṣmīnā?rāyaṇaḥ paraḥ

tau dvimūrtistrimūrtistu satyaścācyutapūruṣau/
caturmurtirvāsudevo bhavetsaṅkarṣaṇa stathā

pradyumnaścāniruddhaśca pañcamūrtimataśśṛṇu/
satyācyutau tathānantaḥ vāsudevaśca pūruṣaḥ

ṣaṇmūrtirannādhipatiśśaktīśaḥ kālanemijit/
trailokyamohano yajñavarāhā śceti paṃcamaḥ

śaṅkhodaro nṛsiṃhaśca saptamūrtirathocyate/
catasro vāsudevādi mūrtayaḥ pūrvamīritāḥ

pūṣādayastathā tisrassaptamūrtirudāhṛtā/
hayagrīvo mukundaśca babhruścaiva vṛṣākapiḥ

śauriśca dāśārhaścaiva vaikuṇṭhaḥ puruṣastathā/
aṣṭamūrtiriti proktonavamūrtarathaucyate

catasraḥ kathitāḥ pūrvaṃ vāsudevādaya stathā/
nārāyaṇo hayagrīvo viṣṇurvṛharisūkarau

ṣaष़ḍanneśādayaḥ proktāḥ vāsudevādimūrtayaḥ/
catasro daśamūrtissyādādimūrtirimā daśaḥ

syādekādaśamūrtissyātproktā dvādaśamūrtayaḥ/
catasro viṃśatiścaiva mūrtayaḥ pūrvamīnitāḥ

paṃcamūrti (******?) samudīryate/
sthāpayedvāsudevābhyāṃ mūrtiṃ garbhaṃ gṛhe sudhīḥ

divye bhāgethavā brāhme bahiḥ prāgdiśi pūruṣam/
satyamūrtiṃ dakṣiṇasyāṃ pratīcyāmacyutaṃ yathā

anantākhyamutīcīne calāṃ vā yativā'calām/
dhāmne'ntarvāsudevassyāccaturmūrtiṣu pūrvavat

saṅkarṣaṇaṃ dakṣiṇasyāṃ bahirdiśi niveśayet/
pradyumnaṃ ca pratīcīne kauberyāmaniruddhakam

yāṃ yāṃ diśamadhiṣṭhāya sthitāḥ pūrvo ktamūrtayaḥ/
tattaddigābhimukhyena kalpayetkamalāsana

dvāraṃ vātāyanaṃ vāpi kuryādbhittiṃna kalpayet/
śaṅkhacakragadāyuktā mukhyairabhayadā karaiḥ