Padma Purana · Chapter 7.1

śrīgaṇeśāya namaḥ /
atha kriyāyogasārakhaṇḍamārabhyate /
lakṣmīnāthapadāraviṃdayugalaṃ /
brahmeśvarādyāmaraśreṇīnamraśirolirolimā amalaṃ/
vaṃdāmahe saṃtatam /
bhaktyā yogimanastaḍāgasuṣamāsaṃdohapuṣyattamaṃ gaṅgāmbhomakaraṃ davindunikaraṃ saṃsāraduḥkhāpaham

yo mūrtīrbahudhā vidhāya bhagavānrakṣannaśeṣaṃ jagadyatpādārcanatatparā na hi punarmajjaṃti viśvārṇave /
sarvaprāṇihṛdaṃbujeṣu vasatiryasya prabhoḥ saṃtataṃ ramyakroḍavapurdharāya haraye devāya tasmai namaḥ

vedebhya uddhṛtya samastadharmānyo'yaṃ purāṇeṣu jagāda devaḥ /
vyāsasvarūpeṇa jagaddhitāya vaṃdetametaṃ kamalā sametam

ekadā munayaḥ sarve sarvalokahitaiṣiṇaḥ /
suramye naimiṣāraṇye goṣṭhīṃcakrurmanoramām

tatrāṃtare mahātejā vyāsaśiṣyo mahāyaśāḥ /
sūtaḥ śiṣyagaṇairyuktaḥ samāyāto hariṃ smaran

tamāyāṃtaṃ samālokya sūtaṃ śāstrārthapāragam /
nemuḥ sarve samutthāya śaunakādyāstapodhanāḥ

so'pi tānsahasā bhaktyā munīnparamavaiṣṇavān /
nanāma daṃḍavadbhūmau sarvadharmavidāṃvaraḥ

varāsane mahābuddhistairddatte munisattamaiḥ /
uvāsa ha munirmadhye sarvaiḥ śiṣyagaṇairvṛtaḥ

tatropaviṣṭaṃ taṃ sūtaṃ śaunako munisattamaḥ /
baddhāñjalirimāṃ vācamuvāca vinayānvitaḥ

śaunaka uvāca-
maharṣe sūta sarvajña kalikāle samāgate /
kenopāyena bhagavanbhūribhaktirbhavennṛṇām

kalau sarve bhaviṣyaṃti pāpakarmaratā janāḥ /
vedavidyāvihīnāśca teṣāṃ śreyaḥ kathaṃ bhavet

kalāvannagatāḥ prāṇā lokāḥ svalpāyuṣastathā /
nirdhanāśca bhaviṣyaṃti nānāduḥkhaprapīḍitāḥ

prayāsasādhyaṃ sukṛtaṃ śāstreṣu kriyate dvija /
tasmātke'pi kariṣyaṃti kalau na sukṛtaṃ janāḥ

sukṛteṣu vinaṣṭeṣu pravṛtte pāpakarmaṇi /
savaṃśāḥ pralayaṃ sarve gamiṣyaṃti durāśayāḥ

svalpaśramairalpavittairalpakālaiśca sattama /
yathā bhavenmahāpuṇyaṃ tadvai kathaya sūtaja

yasyopadeśataḥ puṇyaṃ pāpaṃ vā kurvate janāḥ /
sa tadbhāgī bhavenmartya iti śāstreṣu niścitam

puṇyopadeśaḥ sadayaḥ kaitavaiśca vivarjitaḥ /
pāpamārgavirodhī ca catvāraḥ keśavopamāḥ

jñānaṃ saṃprāpya saṃsāre yaḥ parebhyo na yacchati /
jñānarūpī haristasmai prasanna iva nekṣate

jñānaratnaiśca ratnaiśca parasaṃtoṣakṛnnaraḥ /
sa jñeyaḥ sumatirnūnaṃ nararūpadharo hariḥ

tvameva muniśārdūla vedavedāṅgapāragaḥ /
tvadṛte na hi vaktā'nyo yatastvaṃ vyāsaśāsitaḥ

sūta uvāca-
dhanyo'si tvaṃ muniśreṣṭha tvameva vaiṣṇavāgraṇīḥ /
yataḥ samastalokānāṃ hitaṃ vāñchasi sarvadā

śṛṇu śaunaka vakṣyāmi yattvayā śrotumicchitam /
sarvalokahitārthāya vaiṣṇavānāṃ viśeṣataḥ

pṛṣṭo jaimininā sarvaṃ yaduvāca śṛṇuṣva tat /
maharṣirjaiminirnāma yogābhyāsarataḥ sadā

praṇamya śirasā vyāsaṃ papraccha munisattamaḥ /
jaiminiruvāca-
bhagavansarvadharmajña vyāsa satyavatī suta

kalau kasmādbhavenmokṣastanmamācakṣva mūlataḥ /
sūta uvāca-
jaiminervacanaṃ śrutvā vyāsaḥ saṃtuṣṭamānasaḥ

prārebhe muniśārdūla kathāṃ maṃgalasaṃyutām /
vyāsa uvāca-
jaimine muniśārdūla dhanyo'si tvaṃ mahāmate

nārāyaṇakathāṃ śrotuṃ yato vāṃchasi sarvadā /
satkathāśravaṇe buddhiryasya yasya pravartate

tasya tasya bhavejjñānaṃ jñānaṃ mokṣapradaṃ viduḥ/
na vaiṣṇavakathā yasmai rocate pāpine bhuvi

vṛthaiva sṛṣṭvā vidhinā bhūmirbhāravatī kṛtā /
kathāyai jagatī vaktuṃ ślāghyate vaiṣṇavairjanaiḥ

tāṃ mithyāmiva yo vakti sa jñeyaḥ pāpināṃ varaḥ /
yasmindine muniśreṣṭha śrūyate na hareḥ kathā

taddinaṃ durdinaṃ manye ghanacchannaṃ na durdinam /
yatra yatra mahībhāge vaiṣṇavī vartate kathā

sāṃnidhyaṃ tatra bhagavānna jahāti kadācana /
yo vaiṣṇavakathārambhe vighnakṛnmānavo bhavet

tameva śaptvā bhagavāndaivataiḥ saha gacchati /
prabhāvaṃ vāsudevasya śrutvā hṛṣyaṃti ye janāḥ

jñeyāsta eva devāṃśāḥ pūjyā dṛśyāśca sattamāḥ /
nārāyaṇaprabhāvaṃ ye śrutvā copahasaṃti vai

te vijñeyā dānavāṃśā narā narakabhāginaḥ /
tatra tīrthāni sarvāṇi gaṅgādīni dvijottama

devarṣayaśca devāśca munayaśca tapodhanāḥ /
śṛṇvatāṃ lokasaṃghānāṃ pāpavyādhivināśanī

nārāyaṇakathā yatra vartate prativāsaram /
mune kriyāyogasāraṃ bahvarthaṃ pāpanāśanam

nārāyaṇakathopetaṃ setihāsaṃ niśāmaya

iti śrīpādme mahāpurāṇe kriyāyogasāre jaiminivyāsasaṃvāde prathamo'dhyāyaḥ