Padma Purana · Chapter 6.94

nārada uvāca-
kārtikavratināṃ puṃsāṃ niyamā ye prakīrtitāḥ /
tāñchṛṇuṣva mayā rājankathyamānānsamaṃtataḥ

sarvāmiṣāṇi māṃsāni kṣaudraṃ sauvīrakaṃ tathā /
rājamāṣādikaṃ cāpi naivādyātkārtikavratī

dvidalaṃ tilatailaṃ ca tathānnamaśrudūṣitam /
bhāvaduṣṭaṃ śabdaduṣṭaṃ varjayetkārtikavratī

parānnaṃ ca paradrohaṃ paradārāgamaṃ tathā /
tīrthe pratigṛhaṃ nāpi gṛhṇīyātkārtikavratī

devadevadvijānāṃ ca gurośca vratinastathā /
strīrājamahatāṃ niṃdāṃ varjayetkārtike vratī

prāṇyaṃgamāmiṣaṃ cūrṇaṃ phale jaṃbīramāmiṣam /
dhānye masūrikā proktā cānnaṃ paryuṣitaṃ tathā

ajāgomahiṣīkṣīrādanyadugdhādi cāmiṣam /
dvijakrītā rasāḥ sarve lavaṇaṃ bhūmijaṃ tathā

tāmrapātrasthitaṃ gavyaṃ jalaṃ palvalasaṃsthitam /
ātmārthaṃ pācitaṃ cānnamāmiṣaṃ tatsmṛtaṃ budhaiḥ

brahmacaryamadhaḥ suptiḥ patrāvalyāṃ ca bhojanam /
caturthakāle bhuṃjīta kuryādevaṃ sadā vratī

narakasya caturdaśyāṃ tailābhyaṃgaṃ ca kārayet /
anyatra kārtikasnāyi tailābhyaṃgaṃ na kārayet

palāṃḍuṃ laśunaṃ śigru chatrākaṃ gṛṃjanaṃ tathā /
nālikāṃ mūlakaṃ hiṃguṃ varjayetkārtikavratī

alābuṃ cāpi vṛṃtākaṃ kūṣmāṃḍaṃ bṛhatīphalam /
śleṣmātakaṃ kapitthaṃ ca varjayedvaiṣṇavavratī

rajasvalāṃtyaja mleccha patitavrātyakaiḥ saha /
dvijātivedabāhyaiśca na vadetkārtikavratī

śvabhirdṛṣṭaṃ ca kākaiśca sūtakānnaṃ ca varjayet /
dviḥpācitaṃ ca dagdhānnaṃ varjayetkārtikavratī

tilābhyaṃgaṃ tathā śayyāṃ parānnaṃ kāṃsyabhojanam /
kārtike varjayedyastu paripūrṇavratī bhavet /
etāni varjayennityaṃ vratī sarvavrateṣvapi /
kṛcchrādyaṃ cāpi kurvīta svaśaktyā viṣṇutuṣṭaye

kramātkūṣmāṃḍa vṛṃtākaṃ bṛhatī mūlakaṃ tathā /
śrīphalaṃ ca kaliṃgaṃ ca phalaṃ dhātrībhavaṃ tathā

nārikeraṃ mahālābuṃ paṭolaṃ badarīphalam /
carma vaikatakaṃ cāpi bisaṃ vai kaṭphalaṃ tathā

śākānyetāni varjyāni kramātpratipadādiṣu /
dhātrīphalaṃ ravau tadvadvarjayetsarvadā gṛhī

ebhyo'pi varjayetkiṃcidyadviṣṇuprītaye naraḥ /
tatpunarbrāhmaṇe dattvā bhakṣayetsarvadaiva hi

evameva hi māghe'pi kuryādvai niyamānvratī /
harijāgaraṇaṃ tatra vidhiproktaṃ ca kārayet

yathoktakāriṇaṃ dṛṣṭvā kārtikavratinaṃ naram /
yamadūtāḥ palāyaṃte gajāḥ siṃhārditā yathā

varaṃ viṣṇuvrataṃ hyetadatha yajñaśatādhikam /
yajñakṛtprāpnuyātsvargaṃ vaikuṃṭhaṃ kārtikavratī

bhuktimuktipradānīha yāni kṣetrāṇi bhūtale /
vasaṃti tāni tadgehe kārtikravratakāriṇaḥ

duḥsvapnnaṃ duṣkṛtaṃ kiṃcinmanovākkāyakarmajam /
kārttikavratinaṃ dṛṣṭvā vilayaṃ yāṃti tatkṣaṇāt

kārttikavratinaḥ puṃso viṣṇuvākyapraṇoditāḥ /
rakṣāṃ kurvaṃti śakrādyā rājño vai kiṃkarā yathā

viṣṇuvratakarā nityaṃ yatra tiṣṭhaṃti pūjitāḥ /
grahabhūtapiśācādyā naiva tiṣṭhaṃti tatra vai

kārttikavratinaḥ puṇyaṃ yathoktavratakāriṇaḥ /
na samartho bhavedvaktuṃ brahmāpīha caturmukhaḥ

viṣṇupriyaṃ sakalakalmaṣanāśanaṃ ca sarvatra putradhanadhānyasamṛddhikāri /
ūrje vrataṃ saniyamaṃ kurute manuṣyaḥ kiṃ tasya tīrthapariśīlana sevayā ca

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārttikamāhātmye śrīkṛṣṇasatyabhāmāsaṃvāde niyamavarṇanonāma caturnavatitamo'dhyāyaḥ