Padma Purana · Chapter 6.93

nārada uvāca-
nāḍīdvayāvaśiṣṭāyāṃ rātrau gacchejjalāśayam /
tilagaṃdhākṣataiḥ puṣpairdīpādyaiḥ sahitaḥ śuciḥ

mānuṣe devakhāte ca nadyāṃ nadyośca saṃgame /
kramāddaśaguṇaṃ snānaṃ tīrthe'naṃtaphalaṃ smṛtam

viṣṇuṃ smṛtvā tataḥ kuryātsaṃkalpaṃ savanasya tu /
tīrthādidevatādibhyaḥ kramādarghādi dāpayet

ॐnamaḥ kamalanābhāya namaste jalaśāyine /
namaste'stu hṛṣīkeśa gṛhāṇārghaṃ namo'stu te

vaikuṃṭhe ca prayāge ca tathā badarikāśrame /
yato viṣṇurvicakrame tredhā sa nidadhe padam

ato devā māmavaṃtu yato viṣṇurvicakrame /
taireva sahitaiḥ sarvairmunidevasamanvitaiḥ

kārtike'haṃ kariṣyāmi prātaḥsnānaṃ surottama /
prītyarthaṃ devadeveśa dāmodara mayā saha

dhyātvāhaṃ tvāṃ ca deveśa jale'sminsnātumudyataḥ /
tava prasādātpāpaṃ me dāmodara vinaśyatu

nityanaimittike kṛṣṇe kārtike pāpanāśane /
gṛhāṇārghyaṃ mayā dattaṃ rādhayā sahito hare

vratinā kārtike māsi snātasya vidhivanmama /
gṛhāṇārghyaṃ mayā dattaṃ rādhayā sahito hare

smṛtvā bhāgīrathīṃ viṣṇuṃ śivaṃ sūryaṃ jale viśet /
nābhimātre jale tiṣṭhanvratī snāyādyathāvidhi

tilāmalakacūrṇena gṛhī snānaṃ samācaret /
vanasthānāṃ yatīnāṃ ca tulasīmūlamṛttikā

saptamī darśa navamī dvitīyā daśamīṣu ca /
trayodaśyāṃ ca na snāyāddhātrīphala tilaiḥ saha

ādau kuryānmalasnānaṃ maṃtrasnānaṃ tataḥ param /
strī śūdrāṇāṃ na vedoktairmaṃtraisteṣāṃ purāṇajaiḥ

snāna mantrāḥ /
tridhābhūddevakāryāya yaḥ purā bhaktibhāvataḥ /
sa viṣṇuḥ sarvapāpaghnaḥ punātu kṛpayātra mām

viṣṇorājñāmanuprāpya kārtikavratakāraṇāt /
rakṣaṃtu devāste sarve māṃ punaṃtu sadaiva te

vedamaṃtrāḥ sabījāstu sarahasyāḥ savīryakāḥ /
kaśyapādyāśca munayo māṃ punaṃtu sadaiva te

gaṃgādyāḥ saritaḥ sarvāstīrthāni jaladā nadāḥ /
sasaptasāgarāḥ sarve māṃ punaṃtu jalāśayāḥ

pativratāstvadityādyā yakṣāḥ siddhāḥ sapannagāḥ /
oṣadhyaḥ parvatāścāśu māṃ punaṃtu trilokajāḥ

ebhiḥ snātvā vratī maṃtrairhastanyastapavitrakaḥ /
devarṣīnmānavapitṝṃstarpayecca yathāvidhi

yāvaṃtaḥ kārtike māsi vartaṃte pitṛtarpaṇe /
tilāstatsaṃkhyakābdāni pitaraḥ svargavāsinaḥ

tato jalādviniṣkramya śucivastrāvṛto vratī /
prātaḥkāloditaṃ karma samāpyārceddhariṃ punaḥ

tīrthādidevānsaṃsmṛtya punararcāṃ pradāpayet /
gaṃdhapuṣpaphalairyukto bhaktitatparamānasaḥ

arghamaṃtraḥ /
vratinaḥ kārtike māsi snātasya vidhivanmama /
gṛhāṇārghyaṃ mayā dattaṃ danujeṃdra niṣūdana

tataśca brāhmaṇānbhaktyā bhojayedvedapāragān /
gaṃdhapuṣpaiḥ satāṃbūlaiḥ praṇamecca punaḥ punaḥ

tīrthāni dakṣiṇe pāde vedāśca mukhamāśritāḥ /
sarvāṃge saṃsthitā devāḥ pūjitāḥ syurdvijārcanāt

avyaktarūpiṇo viṣṇoḥ svarūpaṃ brāhmaṇā bhuvi /
nāvamānyā no virodhyāḥ kadācicchubhamicchatā

tāṃ vai haripriyāṃ devi tulasīmarcayedvratī /
pradakṣiṇanamaskārānkuryādekāgramānasaḥ

devaistvaṃ nirmitā pūrvamarcitāsi munīśvaraiḥ /
namo namaste tulasi pāpaṃ hara haripriye

tato viṣṇukathāṃ śrutvā paurāṇīṃ snigdhamānasaḥ /
taṃ brāhmaṇaṃ muniṃ vipraṃ pūjayedbhaktimānvratī

evaṃ pūrṇavidhiṃ samyakpūrvoktaṃ bhaktimānnaraḥ /
karoti yaḥ sa labhate nārāyaṇasalokatām

rogāpahaṃ pāpavināśakṛtparaṃ sadbuddhidaṃ putradhanādisādhanam /
mukternidānaṃ na hi kārtikavratādviṣṇupriyādanyatamaṃ hi bhūtale

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye śrīkṛṣṇasatyabhāmāsaṃvāde snānavidhivarṇanonāma trinavatitamo'dhyāyaḥ