Padma Purana · Chapter 6.83

pārvatyuvāca-
sarveṣāṃ caiva māsānāṃ vidhiṃ brūhi maheśvara /
mahotsavaḥ prakarttavyaḥ ko vidhistatra saṃmataḥ

ko devaḥ pūjanaṃ kasya mahimā kīdṛśo bhavet /
kasyāṃ tithau prakarttavyaṃ tanme vada sureśvara

māsaṃ prati kimuktaṃ ca vaiṣṇavānpuṇyakarmaṇaḥ /
dhanyāhaṃ kṛtakṛtyāhaṃ subhagāhaṃ dharātale /
viṣṇoḥ kathāṃ śṛṇomīti darśanātsparśanāttava

śiva uvāca-
utsavānāṃ vidhiṃ brūmo māsaṃ prati tavānaghe /
yānākarṇya punardevi gītavāditra harṣitā

tatrādau ca site pakṣe caitramāse suśobhane /
ekādaśyāṃ viśeṣeṇa dolārūḍhaṃ prapūjayet

kuryādbhaktyā sadā devi utsavaṃ vidhipūrvakam /
dolārūḍhaṃ prapaśyaṃti kṛṣṇaṃ kalimalāpaham

aparādhasahasraistu muktāste naganaṃdini /
tāvattiṣṭhaṃti pāpāni koṭijanmakṛtānyapi

yāvannāṃdolayeddevaṃ viśveśaṃ viśvanāyakam /
kalau vai ye prapaśyaṃti dolārūḍhaṃ janārdanam

goghnādikāḥ pramucyaṃte kā kathā itareṣvapi /
dolotsave prahṛṣṭāstu rudreṇa sahitāḥ surāḥ

kurvaṃti prāṃgaṇe nṛtyaṃ gītavādyaṃ ca harṣitāḥ /
ṛṣayo gaṇagaṃdharvā raṃbhādyapsarasāṃ gaṇāḥ

vāsukipramukhā nāgāstathā devāḥ sureśvarāḥ /
dolāyāṃ ca samāyāṃti viṣṇudarśanalālasāḥ

dolāyātrānimittaṃ tu dolāhne madhumādhave /
bhūtāni saṃti bhūpṛṣṭhe ye keciddevayonayaḥ

samāyāṃti mahādevi kṛṣṇe dolāsthite dhruvam /
viṣṇuṃ dolāsthitaṃ dṛṣṭvā trailokyasyotsavo bhavet

tasmātkāryaśataṃ tyaktvā dolāhne utsavaṃ kuru /
prahlādastu samāyāti viṣṇurdolādhirohaṇam

kurute ca mahādevi varadaṃ tamanusmaran /
dolāsthitasya kṛṣṇasya ye kurvaṃti prajāgaram

sarvapuṇyaphalaprāptirnimeṣaikena jāyate /
dolāyāṃ saṃsthitaṃ viṣṇuṃ paśyaṃti madhumādhave

krīḍaṃti viṣṇunā sārddhaṃ devadevena vaṃditāḥ /
dakṣiṇābhimukhaṃ devaṃ dolārūḍhaṃ sureśvari

sakṛddṛṣṭvā tu goviṃdaṃ mucyate brahmahatyayā /
ॐ dolārūḍhāya vidmahe mādhavāya ca dhīmahi /
tanno devaḥ pracodayāt १८ idaṃ gāyatryā pūjanam /
mādhavāya goviṃdāya śrīkaṃṭhāya namonamaḥ /
pūjanaṃ maṃtrapūrvaṃ ca kartavyaṃ vidhipūrvakam

gurave dakṣiṇāṃ dadyādyathāśaktyā samāhitaḥ /
gāyanviṣṇoḥ sadā bhaktyā paripūrṇaṃ tato bhavet

kimanyadbahunoktena bhūyo bhūyo varānane /
dolāyāṃ saṃsthito viṣṇuḥ sarvapāpāpahārakaḥ

pūjito yairnaraiḥ samyaksadā sarvaṃ dadāti ca /
yatra devāḥ sagaṃdharvāḥ kinnarā ṛṣayastathā

āyāṃti bahudhā tatra dolārūḍhe na saṃśayaḥ

ॐ namo bhagavate vāsudevāyeti maṃtreṇa pūjanaṃ tatra kārayet /
ṣoḍaśopacāraiḥ pūjā ca kartavyā vidhipūrvakam /
dharmārthamukhyā ye kāmāste sarve prāpnuyurdhruvam

aṃganyāsaṃ karanyāsaṃ nyāsaṃ śārīrakaṃ ca yat /
tatsarvaṃ tu prakarttavyaṃ maṃtreṇānena suvrata

āgamoktena maṃtreṇa karttavyo hi mahotsavaḥ /
śrīlakṣmyāsahitaṃ devaṃ dolāyāṃ ca prakalpayet

devāgre vaiṣṇavāḥ sthāpyā nāradādyāḥ surarṣayaḥ /
viṣvaksenādikā bhaktā sthāpyāste hyagrataḥ sadā

paṃcavāditranirghoṣaiḥ kuryādārārtikaṃ budhaḥ /
yāme yāme tathā devi pūjanīyaḥ prayatnataḥ

nālikeraistathā śubhraiḥ kadalairvā tathā punaḥ /
arghaṃ dadyāttato devi pūjanīyaḥ prayatnataḥ

devadeva jagannātha śaṃkhacakragadādhara /
arghaṃ gṛhāṇa me deva kṛpāṃ kuru mamopari

taccheṣaṃ vaiṣṇavānāṃ tu dadyātprācchādikaṃ punaḥ /
vādanaṃ narttanaṃ tatra karttavyaṃ vaiṣṇavairnaraiḥ

āṃdolanaṃ tataḥ sarvaiḥ karttavyaṃ ca viśeṣataḥ /
pṛthivyāṃ yāni tīrthāni kṣetrāṇi ca sureśvari

sarvānyetāni vai tatra draṣṭumāyāṃti taddine /
evaṃ jñātvā sadā devi karttavyaḥ sotsavo mahān

brāhmaṇāḥ kṣatriyā vaiśyāḥ śūdrā yāścānyajātayaḥ /
śaṃkhacakragadādhārā jñātavyā naganaṃdini

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvara-saṃvāde dolāmahotsavonāma tryaśītitamo'dhyāyaḥ