Scripture Library

Padma Purana · Chapter 6.82

6.82.1

pārvatyuvāca-
vaiṣṇavānāṃ lakṣaṇaṃ ca kīdṛśaṃ pratipāditam /
mahimā kīdṛśaścaiva vada viśveśvara prabho

6.82.2

mahādeva uvāca -
viṣṇorayaṃ yataḥ prokto hyato vai vaiṣṇavo mataḥ /
sarvasyādistu vijñeyo brahmārūpadharastataḥ

6.82.3

yataḥ sakāśātsaṃjātā brāhmaṇā vedapāragāḥ /
te vaiṣṇavāstu vijñeyā naivānye tu kadācana

6.82.4

śaucasatyakṣāṃtiyukto rāgadveṣavivarjitaḥ /
vedavidyāvicārajño yaḥ sa vaiṣṇava ucyate

6.82.5

agnihotrarato nityaṃ nityaṃ cātithipūjakaḥ /
pitṛbhakto mātṛbhaktaḥ sa vai vaiṣṇava ucyate

6.82.6

dayādharmeṇa saṃyuktastathā pāpaparāṅmukhaḥ /
śaṃkhacakrāṃkitoyo vai sa vai vaiṣṇava ucyate

6.82.7

kaṃṭhe mālādharo yastu mukhe rāmaṃ sadoccaret /
gānaṃ kuryātsadā bhaktyā sa naro vaiṣṇavaḥ smṛtaḥ

6.82.8

purāṇeṣu ratā nityaṃ yajñeṣu caratāḥ sadā /
te narā vaiṣṇavā jñeyāḥ sarvadharmeṣu saṃmatāḥ

6.82.9

teṣāṃ niṃdāṃ prakurvaṃti ye narāḥ pāpakāriṇaḥ /
te mṛtāstu kuyoniṃ vai gacchaṃti ca punaḥ punaḥ

6.82.10

gopālanāmnīṃ mūrtiṃ ca ye'rcayaṃti dvijāḥ sadā /
dhātumātramayīṃ kṛtvā caturhastāṃ suśobhitām

6.82.11

pūjāṃ kurvaṃti ye viprāste jñeyāḥ puṇyabhājinaḥ /
kṛtvā pāṣāṇajāṃ mūrtiṃ kṛṣṇākhyāṃ rūpasuṃdarīm

6.82.12

pūjāṃ kurvaṃti ye viprāste jñeyāḥ puṇyamūrttayaḥ /
śālagrāmaśilā yatra yatra dvāravatī śilā

6.82.13

ubhayoḥ saṃgamo yatra muktistatra na saṃśayaḥ /
mūrtiṃ maṃtreṇa saṃsthāpya pūjanaṃ kriyate yadi

6.82.14

tadarcanaṃ koṭiguṇaṃ dharmakāmārthamokṣadam /
navadhā tatra vai bhaktiḥ kartavyā ca janārdane /
ataḥ pāṣāṇajā mūrtistathā dhātumayī tvayā

6.82.15

tasyāṃ bhaktaiḥ prakarttavyaṃ dhyānaṃ pūjanameva ca /
rājopacārakīṃ pūjāṃ mūrtau tatra prakalpayet

6.82.16

sarvātmānaṃ smarennityaṃ bhagavaṃtamadhokṣajam /
dīnānāthaikaśaraṇaṃ lokānāṃ vṛttikāraṇam

6.82.17

mūrttau tatra smarennityaṃ mahāpātakanāśanam /
gopālo'yaṃ tathā kṛṣṇo rāmo'yamiti ca bruvan

6.82.18

pūjāṃ karoti yaḥ samyaksa vai bhāgavato naraḥ /
gokule tu yathā rūpaṃ dhṛtaṃ vai keśavena tu

6.82.19

tādṛgrūpaṃ prakarttavyaṃ vaiṣṇavairnarasattamaiḥ /
ātmasaṃtoṣaṇārthāya svarūpaṃ kārayedbudhaḥ

6.82.20

yato bhaktistu bahulā jāyate nātra saṃśayaḥ /
śaṃkhacakragadādīni viṣṇoścaivāyudhāni ca

6.82.21

tasyāṃ mūrtau viśeṣeṇa karttavyāni pramāṇataḥ /
caturbhujāṃ dvinetrāṃ ca śaṃkhacakragadādharām

6.82.22

pītavāsaḥ parīdhānāṃ śobhamānāṃ garīyasīm /
vanamālāṃ dadhānāṃ tāṃ lasadvaiḍūryakuṃḍalām

6.82.23

mukuṭe maṇisaṃyuktāṃ kaustubhodbhāsitāṃ sadā /
sauvarṇīṃ cātha raupyāṃ vā tāmrajāṃ cātha paittalīm

6.82.24

kārayetparayā bhaktyā vaiṣṇavairdvijasattamaiḥ /
āgamoktairvedamaṃtraiḥ pratiṣṭhāpya viśeṣataḥ

6.82.25

paścādvai arcanaṃ kāryaṃ yathāśāstrānusārataḥ /
ṣoḍaśopacārairmaṃtraiḥ pūjanaṃ vidhipūrvakam

6.82.26

pūjite tu jagannāthe sarve devāśca pūjitāḥ /
ato yena prakāreṇa pūjanīyo mahāprabhuḥ

6.82.27

anādinidhano devaḥ śaṃkhacakragadādharaḥ /
sarvaṃ dadāti sarveśo vaiṣṇavānpuṇyarūpiṇaḥ

6.82.28

yathā viṣṇustathā śarvo nāṃtaraṃ varttate kvacit /
evaṃ jñātvā tu bho devi hyubhayormūrtikalpanam

6.82.29

śivapūjāṃ prakurvāṇo viṣṇuniṃdāsu tatparaḥ /
rauraveṣu narakeṣu vasate nātra saṃśayaḥ

6.82.30

ahaṃ viṣṇurahaṃ rudro hyahaṃ brahmā pitāmahaḥ /
sarvabhūteṣu satataṃ saṃvasāmi punaḥ punaḥ

6.82.31

pārvatyuvāca-
ke dāsā vaiṣṇavāḥ ke tu ke bhaktā bhuvi kīrtitāḥ /
teṣāṃ vai lakṣaṇaṃ brūhi yathārthaṃ vai maheśvara

6.82.32

mahādeva uvāca-
śūdrā bhavaṃti vai dāsā vaiṣṇavā nāradādayaḥ /
prahlādaścāṃbarīṣādyā bhaktāste naganaṃdini

6.82.33

brahmakriyārato nityaṃ vedavedāṃgapāṭhakaḥ /
śaṃkhacakrāṃkito yastu sa vai vaiṣṇava ucyate

6.82.34

dvijasevārato nityaṃ nityaṃ viṣṇuprapūjakaḥ /
śṛṇoti bahudhā caiva purāṇaṃ vedasaṃmitam

6.82.35

sa śūdro haridāsastu ityukto naganaṃdini /
paṃcavarṣatvamāśritya kṛtā bhaktiranekadhā

6.82.36

sa vai bhakta iti proktaḥ sarvasādhuṣu saṃmataḥ /
dhruvādayaste vijñeyā aṃbarīṣādayaśca ye

6.82.37

bhaktāśca munibhiḥ proktāḥ sarvakāleṣu bhāmini /
kalau dhanyatamāḥ śūdrā viṣṇudhyānaparāyaṇāḥ

6.82.38

ihaloke sukhaṃ bhuktvā yāṃti viṣṇoḥ sanātanam /
śaṃkhacakrāṃkito yastu viṣṇubhaktiprakārakaḥ

6.82.39

caturvidhamahotsāhakarttā caiva viśeṣataḥ /
sa śūdro viṣṇudāsastu yathādṛṣṭaṃ yathāśrutam

6.82.82

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde dāsavaiṣṇavānāṃ mahimānāma dvyaśītitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0