Padma Purana · Chapter 6.81

pārvatyuvāca-
gaṃgāyāścaiva māhātmyaṃ punarvada mahāmate /
yacchrutvā munayaḥ sarve vītarāgāḥ punaḥ punaḥ

māhātmyaṃ kīdṛśaṃ caiva tasyāḥ sarveśvara prabho /
utpattiśca śrutā pūrvaṃ mahimā na śruto mayā /
tvamādyaḥ sarvabhūtānāṃ tvaṃ devaśca sanātanaḥ

mahādeva uvāca-
bṛhaspatisamaṃ buddhyā śakratulyaparākramam /
śaratalpagataṃ bhīṣmaṃ ṛṣayo draṣṭumāyayuḥ

atrirvasiṣṭhaśca bhṛguḥ pulastyaḥ pulahaḥ kratuḥ /
aṃgirāvagautamo'gastyaḥ sumatistvāpurātmavān

viśvāmitraḥ sthūlaśirāḥ sarvajñaḥ pramathādhipaḥ /
raibhyo bṛhaspatirvyāsaḥ pāvanaḥ kaśyapo dhruvaḥ

durvāsā jamadagniśca mārkaṃḍeyo'tha gālavaḥ /
uśanātha bharadvājaḥ kraturāstīka eva ca

sthūlākṣaḥ sarvalokākṣaḥ kaṇvo medhātithiḥ kuśaḥ /
nāradaḥ parvataścaiva sudhanvā cyavano dvijaḥ

matibhūrbhuvano dhaumyaḥ śatānaṃdokṛtavraṇaḥ /
jāmadagnyo'tha rāmaśca ṛcīkaścaivamādayaḥ

tānpraṇamya yathānyāyaṃ dharmaputraḥ sahānujaḥ /
pūjayāmāsa vidhivajjagatpūjyāṃstu tejasaḥ

te pūjitā mahātmānaḥ sukhāsīnāstapodhanāḥ /
bhīṣmāśritāḥ kathāścakrurdivyadharmāśritāstathā

kathāṃte tu tatasteṣāṃ ṛṣīṇāṃ bhāvitātmanām /
praṇamya śirasā bhīṣmaṃ papracchedaṃ yudhiṣṭhiraḥ

yudhiṣṭhira uvāca-
ke deśāstu mahāpuṇyāḥ ke śailāḥ ke'picāśramāḥ /
sevyā dharmārthibhirnityaṃ tanme brūhi pitāmaha

bhīṣma uvāca-
atraivodāharaṃtīmamitihāsaṃ narottama /
śiloṃchavṛtteḥ saṃvādaṃ siddhasya ca yudhiṣṭhira

kaścitsiddhaḥ parikramya samastāṃ pṛthivīmimām /
uṃchavṛtteḥ śiberājangṛhaṃ prāpto mahātmanaḥ

ātmavidyāsu tatvajñaḥ sarvadā sa jiteṃdriyaḥ /
rāgadveṣaparityaktaḥ kuśalī jñānakarmasu

vaiṣṇaveṣu sadā śreṣṭho viṣṇudharmaparāyaṇaḥ /
aniṃdako vaiṣṇavānāṃ sadā dharmaparāyaṇaḥ

yogābhyāsarato nityaṃ śaṃkhacakravidhārakaḥ /
trikālapūjā tatvajñaḥ śrīkaṃṭhe'nurataḥ sadā

vedavidyāsu viduṣo dharmādharmavicārakaḥ /
vedapāṭhavrato nityaṃ nityaṃ cātithipūjakaḥ

satīrthamatiyuktastu śiloṃcheṣu sthitaḥ sadā /
caturvedeṣu yaddhyānaṃ gītaṃ yadyatsvayaṃbhuvā

tatsarvaṃ sa ca jānāti dvijo viṣṇusvarūpadhṛk /
nānādharmārthaviśado hyavyayeṣṭamatiḥ sadā

ekasminneva kāle tu gato'sau vai śibergṛham /
taṃ dṛṣṭvā vidhivaccaiva kṛtvātithyaṃ mahāmanāḥ

śibiḥ saṃpṛcchayāmāsa deśānāṃ hitakāraṇam

uṃchavṛttiruvāca-
ke deśāḥ ke janapadāḥ ke śailāḥ ke'pi cāśramāḥ /
puṇyā dvijavara prītyā mahyaṃ nirdeṣṭumarhasi

siddha uvāca-
te deśāste janapadāste śailāste'pi cāśramāḥ /
puṇyāstripathagā yeṣāṃ madhye nityaṃ saridvarā

tapasā brahmacaryeṇa yajñaistyāgena vā punaḥ /
gatiṃ tāṃ na labhejjaṃturgaṃgāṃ saṃsevya yāṃ labhet

snātānāṃ tatra payasi gāṃgeye niyatātmanām /
tuṣṭirbhavati yā puṃsāṃ na sā kratuśatairapi

apahṛtya tamastīvraṃ yathā bhātyudaye raviḥ /
tathāpahṛtya pāpmānaṃ bhāti gaṃgājalāplutaḥ

agniṃ prāpya yathā vipra tūlarāśirvinaśyati /
tathā gaṃgāvagāhaśca sarvaṃ pāpaṃ vyapohati

yastu sūryāṃśusaṃtaptaṃ gāṃgeyaṃ salilaṃ pibet /
sa gonīhāranirmuktaḥ pāvakāddhi viśiṣyate

cāṃdrāyaṇasahasraṃ tu pādenaikena yaḥ pumān /
saṃplutaścāpi gaṃgāyāṃ yo naraḥ sa viśiṣyate

laṃbedadhaḥśirā yastu varṣāṇāmayutaṃ naraḥ /
māsamekaṃ tu gaṃgāṃbhaḥ sevate yo narottamaḥ

brahmahatyāvinirmukto yāti viṣṇoranāmayam /
iyaṃ veṇīsamā puṇyā pavitrā pāpanāśinī

yasyāḥ smaraṇamātreṇa bālahā mucyate kṣaṇāt /
sa prayāgastīrtharājo vaiṣṇavānāṃ hi durllabhaḥ

snātvā yatra naraśreṣṭha vaikuṃṭhe satvaraṃ vrajet /
priyāpriye na jānāti dharmādharmau na viṃdati

snātvā caiva tu gaṃgāyāṃ mahāpāpātpramucyate

gaṃgāgaṃgeti yo brūyādyojanānāṃ śatairapi /
mucyate sarvapāpebhyo viṣṇulokaṃ sa gacchati

brahmahā caiva goghno vā surāpī bālaghātakaḥ /
mucyate sarvapāpebhyo divaṃ yāti ca satvaram

darśanaṃ mādhavasyātha varasya darśanaṃ tathā /
veṇyāṃ snānaṃ prakurvāṇo vaikuṃṭhaṃ prati gacchati

udite ca yathā sūrye vilayaṃ yāti vai tamaḥ /
tathaiva tasyāṃ pāpāni naśyaṃti snānamātrataḥ

gaṃgādvāre kuśāvarte gallike(bilvake?) nīlaparvate /
snātvā kanakhale tīrthe punarjanma na vidyate

evaṃ jñātvā naraśreṣṭho gaṃgāsnāyī punaḥpunaḥ /
snānamātreṇa bho rājanmucyate kilbiṣādataḥ

devānāṃ pravaro viṣṇuryajñānāṃ cāśvamedhakaḥ /
aśvatthaḥ sarvavṛkṣāṇāṃ nadī bhāgīrathī sadā

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde gaṃgāmāhātmyaṃnāmaikāśītitamo'dhyāyaḥ