Padma Purana · Chapter 6.50

yudhiṣṭhira uvāca-
jyeṣṭhasya kṛṣṇapakṣe tu kiṃ nāmaikādaśī bhavet /
śrotumicchāmi māhātmyaṃ tadvadasva janārdana

śrīkṛṣṇa uvāca-
sādhu pṛṣṭaṃ tvayā rājanlokānāṃ hitakāmyayā /
bahupuṇyapradā hyeṣā mahāpātakanāśinī

aparā nāma rājeṃdra aparā putradāyinī /
loke prasiddhitāṃ yāti aparāṃ yastu sevate

brahmahatyābhibhūto'pi gotrahā bhrūṇahā tathā /
parāpavādavādī ca parastrī rasiko'pi ca

aparā sevanādrājanvipāpmā bhavati dhruvam /
kūṭasākṣyaṃ kūṭamānaṃ tulākūṭaṃ karoti yaḥ

kūṭavedaṃ paṭhedyastu kūṭaśāstraṃ tathaiva ca /
jyotiṣī gaṇakaḥ kūṭaḥ kūṭāyurvaidiko bhiṣak

kūṭasākṣya samāyukto vijñeyā narakaukasaḥ /
aparā sevanādrājanpāpairmuktā bhavaṃti te

kṣattriyaḥ kṣātradharmaṃ yastyaktvā yuddhātpalāyate /
sa yāti narakaṃ ghoraṃ svīyadharmabahiṣkṛtaḥ

aparā sevanātso'pi pāpaṃ tyaktvā divaṃ vrajet /
vidyāvānyaḥ svayaṃ śiṣyo guruniṃdāṃ karoti ca

sa mahāpātakairyukto nirayaṃ yāti dāruṇam /
aparā sevanātso'pi sadgatiṃ prāpnuyānnaraḥ

mahimānamaparāyāḥ śṛṇu rājanvadāmyaham /
makarasthe ravau māghe prayāge yatphalaṃ nṛṇām

kāśyāṃ yatprāpyate puṇyamuparāge nimajjanāt /
gayāyāṃ piṃḍadānena pitṝṇāṃ tṛptido yathā

siṃhasthite devagurau gautamyāṃ snātako naraḥ /
kanyāgate gurau rājankṛṣṇaveṇī nimajjanāt

yatphalaṃ samavāpnoti kuṃbhakedāra darśanāt /
badaryāśramayātrāyāṃ tattīrthasevanādapi

yatphalaṃ samavāpnoti kurukṣetre ravigrahe /
gajāśva hemadānena yajñaṃ kṛtvā sadakṣiṇam

tādṛśaṃ phalamāpnoti aparā vratasevanāt /
ardhaprasūtāṃ gāṃ datvā suvarṇaṃ vasudhāṃ tathā

naro yatphalamāpnoti aparāyā vratena tat /
pāpadrumakuṭhārīyaṃ pāpeṃdhana davānalaḥ

pāpāṃdhakārataraṇiḥ pāpasāraṃga kesarī /
budbudā iva toyeṣu puttikā iva jaṃtuṣu

jāyaṃte maraṇāyaiva ekādaśyā vrataṃ vinā /
aparāṃ samupoṣyaiva pūjayitvā trivikramam

sarvapāpavinirmukto viṣṇuloke mahīyate /
lokānāṃ ca hitārthāya tavāgre kathitaṃ mayā /
paṭhanācchravaṇādrājangosahasraphalaṃ labhet

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde jyeṣṭhakṛṣṇāparaikādaśīnāma paṃcāśattamo'dhyāyaḥ