પદ્મ પુરાણ · અધ્યાય 6.50

યુધિષ્ઠિર ઉવાચ-
જ્યેષ્ઠસ્ય કૃષ્ણપક્ષે તુ કિં નામૈકાદશી ભવેત્ ।
શ્રોતુમિચ્છામિ માહાત્મ્યં તદ્વદસ્વ જનાર્દન

શ્રીકૃષ્ણ ઉવાચ-
સાધુ પૃષ્ટં ત્વયા રાજન્લોકાનાં હિતકામ્યયા ।
બહુપુણ્યપ્રદા હ્યેષા મહાપાતકનાશિની

અપરા નામ રાજેંદ્ર અપરા પુત્રદાયિની ।
લોકે પ્રસિદ્ધિતાં યાતિ અપરાં યસ્તુ સેવતે

બ્રહ્મહત્યાભિભૂતોઽપિ ગોત્રહા ભ્રૂણહા તથા ।
પરાપવાદવાદી ચ પરસ્ત્રી રસિકોઽપિ ચ

અપરા સેવનાદ્રાજન્વિપાપ્મા ભવતિ ધ્રુવમ્ ।
કૂટસાક્ષ્યં કૂટમાનં તુલાકૂટં કરોતિ યઃ

કૂટવેદં પઠેદ્યસ્તુ કૂટશાસ્ત્રં તથૈવ ચ ।
જ્યોતિષી ગણકઃ કૂટઃ કૂટાયુર્વૈદિકો ભિષક્

કૂટસાક્ષ્ય સમાયુક્તો વિજ્ઞેયા નરકૌકસઃ ।
અપરા સેવનાદ્રાજન્પાપૈર્મુક્તા ભવંતિ તે

ક્ષત્ત્રિયઃ ક્ષાત્રધર્મં યસ્ત્યક્ત્વા યુદ્ધાત્પલાયતે ।
સ યાતિ નરકં ઘોરં સ્વીયધર્મબહિષ્કૃતઃ

અપરા સેવનાત્સોઽપિ પાપં ત્યક્ત્વા દિવં વ્રજેત્ ।
વિદ્યાવાન્યઃ સ્વયં શિષ્યો ગુરુનિંદાં કરોતિ ચ

સ મહાપાતકૈર્યુક્તો નિરયં યાતિ દારુણમ્ ।
અપરા સેવનાત્સોઽપિ સદ્ગતિં પ્રાપ્નુયાન્નરઃ

મહિમાનમપરાયાઃ શૃણુ રાજન્વદામ્યહમ્ ।
મકરસ્થે રવૌ માઘે પ્રયાગે યત્ફલં નૃણામ્

કાશ્યાં યત્પ્રાપ્યતે પુણ્યમુપરાગે નિમજ્જનાત્ ।
ગયાયાં પિંડદાનેન પિતૄણાં તૃપ્તિદો યથા

સિંહસ્થિતે દેવગુરૌ ગૌતમ્યાં સ્નાતકો નરઃ ।
કન્યાગતે ગુરૌ રાજન્કૃષ્ણવેણી નિમજ્જનાત્

યત્ફલં સમવાપ્નોતિ કુંભકેદાર દર્શનાત્ ।
બદર્યાશ્રમયાત્રાયાં તત્તીર્થસેવનાદપિ

યત્ફલં સમવાપ્નોતિ કુરુક્ષેત્રે રવિગ્રહે ।
ગજાશ્વ હેમદાનેન યજ્ઞં કૃત્વા સદક્ષિણમ્

તાદૃશં ફલમાપ્નોતિ અપરા વ્રતસેવનાત્ ।
અર્ધપ્રસૂતાં ગાં દત્વા સુવર્ણં વસુધાં તથા

નરો યત્ફલમાપ્નોતિ અપરાયા વ્રતેન તત્ ।
પાપદ્રુમકુઠારીયં પાપેંધન દવાનલઃ

પાપાંધકારતરણિઃ પાપસારંગ કેસરી ।
બુદ્બુદા ઇવ તોયેષુ પુત્તિકા ઇવ જંતુષુ

જાયંતે મરણાયૈવ એકાદશ્યા વ્રતં વિના ।
અપરાં સમુપોષ્યૈવ પૂજયિત્વા ત્રિવિક્રમમ્

સર્વપાપવિનિર્મુક્તો વિષ્ણુલોકે મહીયતે ।
લોકાનાં ચ હિતાર્થાય તવાગ્રે કથિતં મયા ।
પઠનાચ્છ્રવણાદ્રાજન્ગોસહસ્રફલં લભેત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે જ્યેષ્ઠકૃષ્ણાપરૈકાદશીનામ પંચાશત્તમોઽધ્યાયઃ