Padma Purana · Chapter 6.49

yudhiṣṭhira uvāca-
vaiśākha śuklapakṣe tu kinnāmaikādaśī bhavet /
kiṃ phalaṃ ko vidhistatra kathayasva janārdana

śrīkṛṣṇa uvāca-
idameva purā pṛṣṭaṃ rāmacaṃdreṇa dhīmatā /
vasiṣṭhaṃ prati rājeṃdra yattvaṃ māmanupṛcchasi

rāma uvāca-
bhagavañchrotumicchāmi vratānāmuttamaṃ vratam /
sarvapāpakṣayakaraṃ sarvaduḥkhanikṛṃtanam

mayā duḥkhāni bhuktāni sītāvirahajāni tu /
tato'haṃ bhayabhīto'smi pṛcchāmi tvāṃ mahāmune

vasiṣṭha uvāca-
sādhu pṛṣṭaṃ tvayā rāma tavaiṣā naiṣṭhikī matiḥ /
tvannāmagrahaṇenaiva pūto bhavati mānavaḥ

tathāpi kathayiṣyāmi lokānāṃ hitakāmyayā /
pavitraṃ pāvanānāṃ ca vratānāmuttamaṃ vratam

vaiśākhasya site pakṣe rāma caikādaśī bhavet /
mohinī nāma sā proktā sarvapāpaharāparāḥ

mohajālātpramucyaṃte pātakānāṃ samūhataḥ /
asyā vrata prabhāvena satyaṃ satyaṃ vadāmyaham

ataḥ kāraṇato rāma kartavyaiṣā bhavādṛśaiḥ /
pātakānāṃ kṣayakarī mahāduḥkhavināśinī

śṛṇuṣvaikamanā rāma kathāṃ pāpaharāṃ parām /
yasyāḥ śravaṇamātreṇa mahāpāpaṃ praṇaśyati

sarasvatyāstaṭe ramye purī bhadrāvatī śubhā /
dyutimānnāma nṛpatistatra rājyaṃ karoti vai

caṃdravaṃśodbhavo nāma dhṛtimānsatyasaṃgaraḥ /
tatra vaiśyo nivasati dhanadhānyasamṛddhimān

dhanapāla iti khyātaḥ puṇyakarmapravarttakaḥ /
prapā kūpa maṭhārāma taḍāga gṛhakārakaḥ

viṣṇubhaktirataḥ śāṃtastasyāsanpaṃcaputrakāḥ /
sumanā dyutimāṃścaiva medhāvī sukṛtastathā

paṃcamo dhṛṣṭabuddhiśca mahāpāparataḥ sadā /
parastrīsaṃganirato viṭagoṣṭhī viśāradaḥ

dyūtādi vyasanāsaktaḥ parastrī ratilālasaḥ /
na ca devārcane buddhirnapitṝnna dvijānprati

anyāyavartī duṣṭātmā piturdravyakṣayaṃkaraḥ /
abhakṣyabhakṣakaḥ pāpī surāpāne rataḥ sadā

veśyākaṃṭhe kṣiptabāhurbhramanduṣṭaścatuṣpathe /
pitrā niṣkāsito gehātparityaktaśca bāṃdhavaiḥ

svadehabhūṣaṇānyeva kṣayaṃ nītāni tena vai /
gaṇikābhiḥ parityakto niṃditaśca dhanakṣayāt

tataściṃtāparo jāto vastrahīnaḥ kṣudhārditaḥ /
kiṃ karomi kvagacchāmi kenopāyena jīvyate

taskaratvaṃ samārabdhaṃ tatraiva nagare pituḥ /
gṛhīto rājapuruṣairmuktaśca pitṛgauravāt

punarbaddhaḥ punastyaktaḥ punarbaddhaḥ sasaṃbhramaiḥ /
dhṛṣṭabuddhirdurācāro nibadhya nigaḍai rdṛḍhaiḥ

kaśāghātaistāḍitaśca pīḍitaśca punaḥ punaḥ /
na sthātavyaṃ hi maṃdātmaṃstvayā maddeśagocare

evamuktvā tato rājñā mocito dṛḍhabaṃdhanāt /
nirjagāma bhayāttasya gato'sau gahanaṃ vanam

kṣuttṛṣāpīḍitaścāyamitaścetaśca dhāvati /
siṃhavannijaghānāsau mṛga śūkara citralān

āmiṣāhāra nirato vane tiṣṭhati sarvadā /
kare śarāsanaṃ kṛtvā niṣaṃgaṃ pṛṣṭha saṃgatam

araṇyacāriṇo haṃti pakṣiṇaśca padācaran /
cakorāṃśca mayūrāṃśca kaṃka tittira mūṣikān

etānanyānhinastyaṃdho dhṛṣṭabuddhistu nirghṛṇaḥ /
pūrvajanmakṛtaiḥ pāpairnimagnaḥ pāpakardame

duḥkhaśokasamāviṣṭaḥ pīḍyamāno divāniśam /
kauṃḍinyasyāśramapadaṃ prāptaḥ puṇyāgamātkvacit

mādhave māsi jāhnavyāḥ kṛtasnānaṃ tapodhanam /
āsasāda dhṛṣṭabuddhiḥ śokabhāreṇa pīḍitaḥ

tadvastrabiṃdusparśena gatapāpo hatāśubhaḥ /
kauṃḍinyasyāgrataḥ sthitvā pratyuvāca kṛtāṃjali

dhṛṣṭabuddhiruvāca-
bho bho brahmandvijaśreṣṭha dayāṃ kṛtvā mamopari /
yena puṇyaprabhāvena muktirbhavati tadvada

kauṃḍinya uvāca-
śṛṇuṣvaikamanābhūtvā yena pāpakṣayastava /
vaiśākhasya site pakṣe mohinī nāma viśrutā

ekādaśīvrataṃ tasyāḥ kuru madvākyanoditaḥ /
merutulyāni pāpāni kṣayaṃ gacchaṃti dehinām

bahujanmārjitānyeṣā mohinī samupoṣitā /
iti vākyaṃ muneḥ śrutvā dhṛṣṭabuddhiḥ prasannadhīḥ

vrataṃ cakāra vidhivatkauṃḍinyasyopadeśataḥ /
kṛte vrate nṛpaśreṣṭha gatapāpo babhūva saḥ

divyadehastato bhūtvā garuḍoparisaṃsthitaḥ /
jagāma vaiṣṇavaṃ lokaṃ sarvopadrava varjitam

itīdṛśaṃ rāmacaṃdra uttamaṃ mohinī vratam /
nātaḥ parataraṃ kiṃcittrailokye sacarācare

yajñāditīrthadānāni kalāṃ nārhaṃti ṣoḍaśīm /
paṭhanācchravaṇādrājangosahasra phalaṃ labhet

iti śrīpādmemahāpurāṇe paṃcapaṃcāśatsāhasryāṃ sahitāyāmuttarakhaṃḍe umāpatināradasaṃvāde vaiśākhaśukle mohanyekādaśīnāma ekonapaṃcāśattamo'dhyāyaḥ