પદ્મ પુરાણ · અધ્યાય 6.49

યુધિષ્ઠિર ઉવાચ-
વૈશાખ શુક્લપક્ષે તુ કિન્નામૈકાદશી ભવેત્ ।
કિં ફલં કો વિધિસ્તત્ર કથયસ્વ જનાર્દન

શ્રીકૃષ્ણ ઉવાચ-
ઇદમેવ પુરા પૃષ્ટં રામચંદ્રેણ ધીમતા ।
વસિષ્ઠં પ્રતિ રાજેંદ્ર યત્ત્વં મામનુપૃચ્છસિ

રામ ઉવાચ-
ભગવઞ્છ્રોતુમિચ્છામિ વ્રતાનામુત્તમં વ્રતમ્ ।
સર્વપાપક્ષયકરં સર્વદુઃખનિકૃંતનમ્

મયા દુઃખાનિ ભુક્તાનિ સીતાવિરહજાનિ તુ ।
તતોઽહં ભયભીતોઽસ્મિ પૃચ્છામિ ત્વાં મહામુને

વસિષ્ઠ ઉવાચ-
સાધુ પૃષ્ટં ત્વયા રામ તવૈષા નૈષ્ઠિકી મતિઃ ।
ત્વન્નામગ્રહણેનૈવ પૂતો ભવતિ માનવઃ

તથાપિ કથયિષ્યામિ લોકાનાં હિતકામ્યયા ।
પવિત્રં પાવનાનાં ચ વ્રતાનામુત્તમં વ્રતમ્

વૈશાખસ્ય સિતે પક્ષે રામ ચૈકાદશી ભવેત્ ।
મોહિની નામ સા પ્રોક્તા સર્વપાપહરાપરાઃ

મોહજાલાત્પ્રમુચ્યંતે પાતકાનાં સમૂહતઃ ।
અસ્યા વ્રત પ્રભાવેન સત્યં સત્યં વદામ્યહમ્

અતઃ કારણતો રામ કર્તવ્યૈષા ભવાદૃશૈઃ ।
પાતકાનાં ક્ષયકરી મહાદુઃખવિનાશિની

શૃણુષ્વૈકમના રામ કથાં પાપહરાં પરામ્ ।
યસ્યાઃ શ્રવણમાત્રેણ મહાપાપં પ્રણશ્યતિ

સરસ્વત્યાસ્તટે રમ્યે પુરી ભદ્રાવતી શુભા ।
દ્યુતિમાન્નામ નૃપતિસ્તત્ર રાજ્યં કરોતિ વૈ

ચંદ્રવંશોદ્ભવો નામ ધૃતિમાન્સત્યસંગરઃ ।
તત્ર વૈશ્યો નિવસતિ ધનધાન્યસમૃદ્ધિમાન્

ધનપાલ ઇતિ ખ્યાતઃ પુણ્યકર્મપ્રવર્ત્તકઃ ।
પ્રપા કૂપ મઠારામ તડાગ ગૃહકારકઃ

વિષ્ણુભક્તિરતઃ શાંતસ્તસ્યાસન્પંચપુત્રકાઃ ।
સુમના દ્યુતિમાંશ્ચૈવ મેધાવી સુકૃતસ્તથા

પંચમો ધૃષ્ટબુદ્ધિશ્ચ મહાપાપરતઃ સદા ।
પરસ્ત્રીસંગનિરતો વિટગોષ્ઠી વિશારદઃ

દ્યૂતાદિ વ્યસનાસક્તઃ પરસ્ત્રી રતિલાલસઃ ।
ન ચ દેવાર્ચને બુદ્ધિર્નપિતૄન્ન દ્વિજાન્પ્રતિ

અન્યાયવર્તી દુષ્ટાત્મા પિતુર્દ્રવ્યક્ષયંકરઃ ।
અભક્ષ્યભક્ષકઃ પાપી સુરાપાને રતઃ સદા

વેશ્યાકંઠે ક્ષિપ્તબાહુર્ભ્રમન્દુષ્ટશ્ચતુષ્પથે ।
પિત્રા નિષ્કાસિતો ગેહાત્પરિત્યક્તશ્ચ બાંધવૈઃ

સ્વદેહભૂષણાન્યેવ ક્ષયં નીતાનિ તેન વૈ ।
ગણિકાભિઃ પરિત્યક્તો નિંદિતશ્ચ ધનક્ષયાત્

તતશ્ચિંતાપરો જાતો વસ્ત્રહીનઃ ક્ષુધાર્દિતઃ ।
કિં કરોમિ ક્વગચ્છામિ કેનોપાયેન જીવ્યતે

તસ્કરત્વં સમારબ્ધં તત્રૈવ નગરે પિતુઃ ।
ગૃહીતો રાજપુરુષૈર્મુક્તશ્ચ પિતૃગૌરવાત્

પુનર્બદ્ધઃ પુનસ્ત્યક્તઃ પુનર્બદ્ધઃ સસંભ્રમૈઃ ।
ધૃષ્ટબુદ્ધિર્દુરાચારો નિબધ્ય નિગડૈ ર્દૃઢૈઃ

કશાઘાતૈસ્તાડિતશ્ચ પીડિતશ્ચ પુનઃ પુનઃ ।
ન સ્થાતવ્યં હિ મંદાત્મંસ્ત્વયા મદ્દેશગોચરે

એવમુક્ત્વા તતો રાજ્ઞા મોચિતો દૃઢબંધનાત્ ।
નિર્જગામ ભયાત્તસ્ય ગતોઽસૌ ગહનં વનમ્

ક્ષુત્તૃષાપીડિતશ્ચાયમિતશ્ચેતશ્ચ ધાવતિ ।
સિંહવન્નિજઘાનાસૌ મૃગ શૂકર ચિત્રલાન્

આમિષાહાર નિરતો વને તિષ્ઠતિ સર્વદા ।
કરે શરાસનં કૃત્વા નિષંગં પૃષ્ઠ સંગતમ્

અરણ્યચારિણો હંતિ પક્ષિણશ્ચ પદાચરન્ ।
ચકોરાંશ્ચ મયૂરાંશ્ચ કંક તિત્તિર મૂષિકાન્

એતાનન્યાન્હિનસ્ત્યંધો ધૃષ્ટબુદ્ધિસ્તુ નિર્ઘૃણઃ ।
પૂર્વજન્મકૃતૈઃ પાપૈર્નિમગ્નઃ પાપકર્દમે

દુઃખશોકસમાવિષ્ટઃ પીડ્યમાનો દિવાનિશમ્ ।
કૌંડિન્યસ્યાશ્રમપદં પ્રાપ્તઃ પુણ્યાગમાત્ક્વચિત્

માધવે માસિ જાહ્નવ્યાઃ કૃતસ્નાનં તપોધનમ્ ।
આસસાદ ધૃષ્ટબુદ્ધિઃ શોકભારેણ પીડિતઃ

તદ્વસ્ત્રબિંદુસ્પર્શેન ગતપાપો હતાશુભઃ ।
કૌંડિન્યસ્યાગ્રતઃ સ્થિત્વા પ્રત્યુવાચ કૃતાંજલિ

ધૃષ્ટબુદ્ધિરુવાચ-
ભો ભો બ્રહ્મન્દ્વિજશ્રેષ્ઠ દયાં કૃત્વા મમોપરિ ।
યેન પુણ્યપ્રભાવેન મુક્તિર્ભવતિ તદ્વદ

કૌંડિન્ય ઉવાચ-
શૃણુષ્વૈકમનાભૂત્વા યેન પાપક્ષયસ્તવ ।
વૈશાખસ્ય સિતે પક્ષે મોહિની નામ વિશ્રુતા

એકાદશીવ્રતં તસ્યાઃ કુરુ મદ્વાક્યનોદિતઃ ।
મેરુતુલ્યાનિ પાપાનિ ક્ષયં ગચ્છંતિ દેહિનામ્

બહુજન્માર્જિતાન્યેષા મોહિની સમુપોષિતા ।
ઇતિ વાક્યં મુનેઃ શ્રુત્વા ધૃષ્ટબુદ્ધિઃ પ્રસન્નધીઃ

વ્રતં ચકાર વિધિવત્કૌંડિન્યસ્યોપદેશતઃ ।
કૃતે વ્રતે નૃપશ્રેષ્ઠ ગતપાપો બભૂવ સઃ

દિવ્યદેહસ્તતો ભૂત્વા ગરુડોપરિસંસ્થિતઃ ।
જગામ વૈષ્ણવં લોકં સર્વોપદ્રવ વર્જિતમ્

ઇતીદૃશં રામચંદ્ર ઉત્તમં મોહિની વ્રતમ્ ।
નાતઃ પરતરં કિંચિત્ત્રૈલોક્યે સચરાચરે

યજ્ઞાદિતીર્થદાનાનિ કલાં નાર્હંતિ ષોડશીમ્ ।
પઠનાચ્છ્રવણાદ્રાજન્ગોસહસ્ર ફલં લભેત્

ઇતિ શ્રીપાદ્મેમહાપુરાણે પંચપંચાશત્સાહસ્ર્યાં સહિતાયામુત્તરખંડે ઉમાપતિનારદસંવાદે વૈશાખશુક્લે મોહન્યેકાદશીનામ એકોનપંચાશત્તમોઽધ્યાયઃ