Padma Purana · Chapter 6.254

vasiṣṭha uvāca-
evamuktā tu sā devi patinā śūlapāṇinā /
praṇipatya mahātmānamuvāca prāṃjalistadā

pārvatyuvāca-
sādhūktaṃ hi tvayā nātha vaiṣṇavaṃ dharmamuttamam /
guhyādguhyatamaṃ viṣṇoḥ svarūpaṃ paramātmanaḥ

dhanyāsmi kṛtakṛtyāsmi sarvadevanamaskṛta /
tava prasādāddeveśamarcayāmi sanātanam

vasiṣṭhauvāca-
tatastadvacanaṃ śrutvā sa bhavastripurāṃtakaḥ /
samāśliṣyāvadaddevīṃ prahṛṣṭenāṃtarātmanāḥ

rudra uvāca-
sādhusādhu mahādevi sādhusādhu varānane /
arcayasva hṛṣīkeśaṃ lakṣmībharttāramacyutam

kṛtakṛtyo'smyahaṃ bhadre vaiṣṇavyā bhāryayā tvayā /
guruṇā tava cārvaṃgi vāmadevena dhīmatā

anujñātārcayasveśaṃ purāṇaṃ puruṣottamam /
gurūpadeśamārgeṇa pūjayitvaiva keśavam /
prāpnoti vāchitaṃ sarvaṃ nānyathā bhūdharātmaje

vasiṣṭha uvāca-
evamuktā tadā devi vāmadevāṃtikaṃ nṛpa /
jagāma sahasā hṛṣṭā viṣṇupūjanalālasā

sametya taṃ guruṃ devi pūjayitvā praṇamya ca /
vinītā prāṃjalirbhūtvā uvāca munisattamam

pārvatyuvāca-
bhagavaṃstvatprasādena samyagārādhanaṃ hareḥ /
kariṣyāmi dvijaśreṣṭha tvamanujñātumarhasi

vasiṣṭha uvāca-
ityuktastu tayā devyā vāmadevo mahāmuniḥ /
tasyai maṃtravaraṃ śreṣṭhaṃ dadau sa vidhinā guruḥ

nāmnāṃ sahasraṃ viṣṇośca proktavānmunisattamaḥ /
nivedayitvā pūjāyā vidhānamapi deśikaḥ /
uvāca paramaprītyā pārvatīṃ saṃśitavratām

vāmadeva uvāca-
arcayitvā hṛṣīkeśaṃ prātarnityaṃ varānane /
sahasranāmapaṭhanaṃ kuruṣva tadanaṃtaram

vasiṣṭha uvāca-
dvatyuktā tena guruṇā prahṛṣṭenāṃtarātmanā /
pūjayitvā namaskṛtya punarāyātsvamālayam

śikṣitā guruṇā tena vāmadevena pārvatī /
tataḥ katipayāhastu dvādaśyāṃ vṛṣabhadhvajaḥ

kailāsaśikhare ramye viṣṇumārādhya śaṃkaraḥ /
upaviṣṭastato bhoktuṃ pārvatīṃ śaṃkaro'bravīt

śaṃkara uvāca-
pārvatye himayā sārddhaṃ bhoktuṃ bhuvanavaṃdite /
vasiṣṭha uvāca-
tamāha pārvatī devī japtvā nāmasahasrakam

tato bhokṣyāmyahaṃ deva bhujyatāṃ bhavatā prabho /
tatastāṃ pārvatīṃ prāha prahasanparameśvaraḥ

śaṃkara uvāca-
dhanyāsi kṛtakṛtyāsi viṣṇubhaktāsi pārvati /
durlabhā vaiṣṇavī bhaktirbhāgadheyaṃ vineśvari

rāmarāmeti rāmeti rame rāme manorame /
sahasranāmatattulyaṃ rāmanāma varānane

rakārādīni nāmāni śṛṇvato mama pārvati /
manaḥ prasannatāṃ yāti rāmanāmābhiśaṃkayā

rāmetyuktvā mahādevi bhuṃkṣva sārdhaṃ mayādhunā /
vasiṣṭha uvāca-
tato rāmeti nāmoktvā saha bhuṃktvā'tha pārvatī

rāmetyuktā mahādevī śaṃbhunā saha saṃsthitā /
papraccha śaṃkaraṃ devaṃ prītipraṇavamānasā

pārvatyuvāca-
sahasranāmabhistulyaṃ rāmanāma tvayoditam /
tasyāparāṇi nāmāni saṃti cedrāvaṇadviṣaḥ /
kathyatāṃ mama deveśa tatra me bhaktirutthitā

śrīmahādeva uvāca-
śṛṇu nāmāni vakṣyāmi rāmacaṃdrasya pārvati /
laukikā vaidikāḥ śabdāḥ ye kecitsaṃti pārvati

nāmāni rāmacaṃdrasya sahasraṃ teṣu cādhikam /
teṣu cātyaṃtamukhyaṃ hi nāmnāmaṣṭottaraṃ śatam

viṣṇorekaikanāmaiva sarvavedādhikaṃ matam /
tādṛṅnāmasahasrāṇi rāmanāmasamāni ca

yatphalaṃ sarvavedānāṃ maṃtrāṇāṃ japataḥ priye /
tatphalaṃ koṭiguṇitaṃ rāmanāmnaiva labhyate

nāmāni śṛṇu rāmasya mukhyāni śubhadarśane /
ṛṣibhiḥ parigītāni tāni vakṣyāmi te priye

ॐ śrīrāmo rāmacaṃdraśca rāmabhadraśca śāśvataḥ /
rājīvalocanaḥ śrīmānrājeṃdro raghupuṃgavaḥ

jānakīvallabho jaitro jitāmitro janārdanaḥ /
viśvāmitrapriyo dāṃtaḥ śaraṇya trāṇatatparaḥ

vālipramathano vāgmī satyavāksatyavikramaḥ /
satyavrato vrataphalaḥ sadā hanumadāśrayaḥ

kauśaleyaḥ kharadhvaṃsī virādhavadhapaṃḍitaḥ /
vibhīṣaṇaparitrātā daśagrīvaśiroharaḥ

saptatālaprabhettā ca harakodaṃḍa khaṃḍanaḥ /
jāmadagni mahādarppadalanastāḍakāṃtakṛt

vedāṃtapāro vedātmā bhavabaṃdhaikabheṣajam /
dūṣaṇatriśiroriśca trimūrttistriguṇastrayī

trivikramastrilokātmā puṇyacāritrakīrttanaḥ /
trilokarakṣako dhanvī daṃḍakāraṇyavāsakṛt

ahalyāpāvanaścaiva pitṛbhakto varapradaḥ /
jiteṃdriyo jitakrodho jitalobho jagadguruḥ

ṛkṣavānarasaṃghātī citrakūṭasamāśrayaḥ /
jayaṃtatrāṇavaradaḥ sumitrāputrasevitaḥ

sarvadevādhidevaśca mṛtavānarajīvanaḥ /
māyāmārīcahaṃtā ca mahābhāgo mahābhujaḥ

sarvadevastutaḥ saumyo brahmaṇyo munisattamaḥ /
mahāyogī mahodāraḥ sugrīvasthirarājyadaḥ

sarvapuṇyādhikaphalaḥ smṛtaḥ sarvāghanāśanaḥ /
ādipuruṣo mahāpuruṣaḥ paramaḥ puruṣastathā

puṇyodayo mahāsāraḥ purāṇapuruṣottamaḥ /
smitavaktro mitabhāṣī pūrvabhāṣī ca rāghavaḥ

anaṃtaguṇagaṃbhīro dhīro dāṃtaguṇottaraḥ /
māyāmānuṣacāritro mahādevādhipūjitaḥ

setukṛjjitavārīśaḥ sarvatīrthamayo hariḥ /
śyāmāṃgaḥ suṃdaraḥ śūraḥ pītavāsā dhanurddharaḥ

sarvayajñādhipo yajño jarāmaraṇavarjitaḥ /
śivaliṃgapratiṣṭhātā sarvādyaguṇavarjitaḥ

paramātmā parabrahma saccidānaṃdavigrahaḥ /
paraṃjyotiḥ paraṃdhāma parākāśaḥ parātparaḥ

pareśaḥ pāragaḥ pāraḥ sarvabhūtātmakaḥ śivaḥ /
iti śrīrāmacandrasya nāmnāmaṣṭottaraṃ śatam

guhyādguhyataraṃ devi tava snehātprakīrtitam /
yaḥ paṭhecchṛṇuyādvāpi bhaktiyuktena cetasā

sarvaiḥ pramucyate pāpaiḥ kalpakoṭiśatodbhavaiḥ /
jalāni sthalatāṃ yāṃti śatravo yāṃti mitratām

rājāno dāsatāṃ yāṃti vahnayo yāṃti saumyatām /
ānukūlyaṃ ca bhūtāni sthairyaṃ yāṃti calāḥ śriyaḥ ५०

anugrahaṃ grahā yāṃti śāṃtimāyāṃtyupadravāḥ /
paṭhato bhaktibhāvena narasya girisaṃbhave

paṭhetparamayā bhaktyā tasya vaśyaṃ jagattrayam /
yaṃyaṃ kāmaṃ prakurute taṃtamāpnoti kīrttanāt

kalpakoṭisahasrāṇi kalpakoṭiśatāni ca /
vaikuṃṭhe modate nityaṃ daśapūrvairdaśāparaiḥ

rāmaṃ dūrvādalaśyāmaṃ padmākṣaṃ pītavāsasam /
stuvaṃti nāmabhirddivyairna te saṃsāriṇo janāḥ

rāmāya rāmabhadrāya rāmacaṃdrāya vedhase /
raghunāthāya nāthāya sītāyāḥ pataye namaḥ

imaṃ maṃtraṃ mahādevi japanneva divāniśam /
sarvapāpavinirmukto viṣṇusāyujyamāpnuyāt

iti te rāmacaṃdrasya māhātmyaṃ vedasaṃmitam /
kathitaṃ vai mayā subhrūstava prītyā śubhāhvayam

vasiṣṭha uvāca-
tacchratvā śaṃkareṇoktaṃ māhātmyaṃ paramātmanaḥ /
praharṣamatulaṃ lebhe ānaṃdāśrujalāplutā

praṇamya prāha deveśaṃ bhartāraṃ vṛṣabhadhvajam /
pārvatyuvāca-
aho māhātmyamatulaṃ rāmasya paramātmanaḥ /
śrotratṛptirhi me na syātkalpāyutaśatairapi

dhanyāhaṃ kṛtakṛtyāsmi sarvamuktaṃ tvayānagha /
tvatprasādāddharerbhaktirjanmajanmani cāstu me

vasiṣṭha uvāca-
evamuktvā svabhartāraṃ gaurī bhāgavatottamā /
rāmāya rāmabhadrāya rāmacaṃdrāya vedhase /
raghunāthāya nāthāya sītāyāḥ pataye namaḥ

imameva japanmaṃtraṃ sarvāvasthāsu pārvatī /
uvāsa ca sukhenaiva kailāse patinā saha

etatte sarvamākhyātaṃ guhyādguhyatamaṃ nṛpa /
rudraproktāni śāstrāṇi tāmasānyeva pārthiva

saṃmohanārthaṃ lokānāṃ proktavānvṛṣabhadhvajaḥ /
rahasi proktavāndevyā idamekaṃ haraḥ prabhuḥ

yathārthamarthaṃ guhyaṃ ca sāraṃ maṃtrasya bhūpate /
devyā prītyai mahādevaḥ kathayāmāsa tatparaḥ

umāmaheśvaraṃ rājansaṃvādamimamadbhutam /
yaḥ paṭhecchṛṇuyādvāpi bhaktiyuktena cetasā

sa sarvavaṃdyaḥ sarvajño mahābhāgavato bhavet /
sarvadharmavinirmuktaḥ prāpnoti paramaṃ padam

dhanyaḥ khalu bhavānloke pārthiveṃdra mahābala /
tvadanvaye hariḥ śrīmānpurāṇaḥ puruṣottamaḥ

utpatsyate dāśarathiḥ sarvalokahitāya vai /
tasmādikṣvākavaḥ pūjyāḥ surāṇāmapi pārthiva

yeṣāṃ jāto hi bhagavānrāmo rājīvalocanaḥ /
iti śrīpādme mahāpurāṇe paṃcapacāśatsāhasryāṃ saṃhitāyāmuttarakhaṃḍe umāmaheśvarasaṃvāde rāmacaṃdrāṣṭottaraśatanāmakathanaṃ nāma catuḥpaṃcāśadadhika dviśatatamo'dhyāyaḥ