Padma Purana · Chapter 6.250

śrīrudra uvāca-
rukmiṇyāṃ kṛṣṇasya pradyumno madanāṃśena jajñe

asau madanasaṃbhūto mahābalaḥ śaṃbaraṃ jaghnivān

tasya rukmiṇaḥ sutāyāmaniruddho jajñe

so'pi bāṇaputrīmuṣāṃ nāma kanyāmupayeme

sā tu svapne nīlotpaladalaśyāmaṃ puṃḍarīkanibhekṣaṇaṃ mahābāhuṃ vicitrābharaṇopetaṃ ṣoḍaśasamāyathāvadupabhujya prabudhya taṃ purato na dṛṣṭvā madanenapīḍitā bhrāṃtacittā māṃ tu tyaktvā vayaskaṃ raktāraviṃdavaktraṃ kvāsi kva yāsīti bahudhā vilalāpa

tatastasyāḥ sakhī citralekheti nāma kanyāṃ tādṛśīmavasthāṃ gatāṃ vilokya kiṃnimitta vibhrāṃtacittāsīti papraccha

sāpi svapnalabdhaṃ patiṃ yathāvadācaṣṭa

sāpi sakaladevamānuṣādiśreṣṭhānpaṭe vilikhya tasyai darśayāmāsa

yaduvaṃśasaṃbhūtānkṛṣṇasaṃkarṣaṇapradyumnāniruddhādīnapi samyaṅinavedayāmāsa

sā teṣāṃ kṛṣṇamanumānya pradyumnānaṃtaramaniruddhaṃ dṛṣṭvā sa ityeṣa ityāliliṃga

atha citralekhā bahvībhirmāyāvatībhirdaityastrībhirdvāravatīṃ gatvā rātrāvaṃtaḥpure suptamaniruddhaṃ/
dṛṣṭvā gṛhītvā mohayitvā māhiṣmatyāṃ bāṇasyāṃtaḥpure caityaprāsādādiyukte tasyā bāṇaputryāḥ śayyāyāṃ cikṣepa

so'pi prabuddhotiramye'naṃgapāvake saṃsthitāmuṣāṃ sarvalakṣaṇalakṣitāṃ vicitrābharaṇavasanagaṃdhamālyālaṃkṛtāṃ kāṃcanavarṇāṃ sukeśīṃ sujātastanīṃ dṛṣṭvā gāḍhamāliṃgya kariṇyā gaṃdhahastīva tayātiprītisaṃyuktayā yathāsukhaṃ ramayāmāsa

evaṃ māsamātraṃ niraṃtaratayāniruddhaṃ ramamāṇaṃ kadācidaṃtaḥpuranivāsinyo vṛddhā daityastriyo jñātvā rājñe nivedayāmāsuḥ

sa rājā krodhatāmrākṣaḥ paraṃ vismayaṃ gatvā tamihānayateti puraḥ kiṃkarānpreṣayāmāsa

te'pi tūrṇaṃ nṛpaprāsādamāruhya rājaputryāḥ śayane saṃsthitamaniruddhaṃ grahītumājagmuḥ

sa tānsamārabdhāndṛṣṭvā prāsādastaṃbhamekaṃ helayotpāṭya niyutasaṃkhyākān kiṃkarānmuhūrtamātraṇaiva staṃbhena cūrṇitamātraṃ cakāra

atha daityapatirnihatānkiṃkarāndṛṣṭvā kautūhalaṃ gatvā asau śrīkṛṣṇapautra iti devarṣiṇā prokto dhanurādāya svayamevāniruddhaṃ grahītuṃ tatsamīpamājagāma

aniruddho'pi yodbhumāyāṃtaṃ sahasrabāhuṃ rājānaṃ dṛṣṭvā tatparighaṃ bhrāmayitvā bāṇasyopari cikṣepa

svacāpanirmuktena bāṇena taṃ parighaṃ ciccheda

anaṃtaramuragāstreṇa aniruddhaṃ nibiḍaṃ baddhvā svāṃtaḥpure niveśayāmāsa

atha kṛṣṇopyevaṃvidhameva devarṣiṇā jñātvā baladevapradyumnasahitaḥ svasenayā vihaṃgameṃdramāruhya tasyabāṇasya bhujavanaṃ chettumājagāma

baliputreṇa purā śaṃkaro'rcitaḥ prasanno varaṃ vṛṇīṣvetyuvāca

tamīśvaraṃ bāṇo mama puradvārirakṣārthaṃ sarvadopaviśya samāgataṃ parasainyaṃ jahītyevaṃ varamayācata

taṃ tathetyuktvā śaṃkaro'pi tasya puradvāri sāyudhaḥ saputraḥ sagaṇaḥ samāsīnastasminneva kāle ruṣā svasenayā samāgataṃ vāsudevaṃ dṛṣṭvā vṛṣamāruhya sarvāyudhopetaḥ svaputragaṇasaṃvṛto yoddhuṃ niścakrāma

kṛṣṇo'pi taṃ bhūtapatiṃ gajacarmakapālabhasmadharaṃ jvalitoragākalpaṃ piṃgalaṃ trilocanaṃ triśūladharaṃ sarvabhūtagaṇasaṃhṛtikarttāraṃ sarvabhūtabhayāvahaṃ saṃvarttāgniprabhaṃ putradvayasamanvitaṃ samastagaṇāvṛtaṃ tripurāṃtakaṃ dṛṣṭvā senāṃ sudūre pṛṣṭhato niveśya balabhadra pradyumnasahitastena rudre ṇa saha prahasanniva yoddhumārebhe

prathamaṃ tadabhūdghoraṃ kṛṣṇaśaṃkarayostadā /
pinākaśārṅganirmuktairbāṇaiḥ saṃvarttakopamaiḥ

rāmo'pi cakre bāṇena pradyumnaḥ ṣaṇmukhena ca /
yuyudhāte mahāvīryau siṃhāviva balotkaṭau

vināyakaḥ svadaṃtena jaghānorasi yādavam /
rāmo muśalamādāya tasya daṃtamatāḍayat

nirbhinnadaṃtaḥ sahasā pradudrāvākhuvāhanaḥ /
tadāprabhṛti loke'sminhatadaṃto gaṇeśvaraḥ

devadānavagaṃdharvairekadaṃtaitīritaḥ /
pradyumnena samaṃ yuddhaṃ cakāra śikhivāhanaḥ

gaṇānvidrāvayāmāsa muśalena halāyudhaḥ /
kṛṣṇena suciraṃ kālaṃ yuddhāsau nīlalohitaḥ

tāpajvaraṃ mahādīptamasminsaṃyojya sāyake /
kopānmumoca tadasau bhṛśaṃ saṃraktalocanaḥ

tadastraṃ vārayāmāsa kṛṣṇaḥ śītajvareṇa tu /
tābhyāṃ hariharābhyāṃ tu visṛṣṭau tāvimau jvarau

viśaturmānuṣe loke tayorevājñayā bhṛśam /
hariśaṃkarayoryuddhaṃ ye tu śṛṇvaṃti mānavāḥ

te sarve jvaranirmuktāḥ prāpnuvaṃti nirāmayam /
tataḥ sa tu hṛṣīkeśo mohanāstraṃ durāsadam

niyujya bāṇaṃ bhūteśe mumoca madhusūdanaḥ /
muhurmuhurvyajṛṃbhadvai tenāstreṇa vimohitaḥ

papāta mūrcchito bhūmau śaṃkarastridaśeśvaraḥ /
pitaraṃ mohitaṃ dṛṣṭvā śaktimudyamya vīryavān

yoddhumabhyāyayau kṛṣṇaṃ ṣaṇmukhaḥ śikhivāhanaḥ /
huṃkāreṇaiva taṃ kṛṣṇaścakārātra parāṅmukham

evaṃ jitvā yaduśreṣṭhaḥ śūlapāṇiṃ trilocanam /
mahāsvanaṃ pāṃcajanyaṃ śaṃkhaṃ dadhmau pratāpavān

kṛṣṇena nirjitaṃ śrutvā sātmajaṃ śaṃkaraṃ tadā /
bāṇaḥ syaṃdanamāsthāya yayau yuddhāya keśavam

sa dṛṣṭvā sahasā kṛṣṇaṃ garuḍoparisaṃsthitam /
chādayāmāsa goviṃdaṃ bahuśastrāstravṛṣṭibhiḥ

gadābhiḥ parighaiḥ śūlaiḥ śaktibhistomarairapi /
bhiṃḍipālaiśca khaṅgaiśca cakrairbāṇairniraṃtaram

tāni sarvāṇi ciccheda cakreṇaiva janārdanaḥ /
sasarja tasya bāhūnāṃ chedanārthaṃ sudarśanam

muktaṃ danujarājasya sahasrāraṃ sudarśanam /
tadbāhukānanaṃ tūrṇaṃ chinnaṃ cakre sahasradhā

etasminnaṃtare devi pārvatī saṃśitavratā /
hareḥ samīpamāgatya kṛtāṃjalirabhāṣata

pārvatyuvāca-
kṛṣṇakṛṣṇa jagannātha nārāyaṇa dayānidhe /
dāsyasmi tava deveśa pūrvabhāve yadūttama

tvayā dattaṃ varaṃ mahyaṃ tadā kauśalaparvate /
saubhāgyaṃ śāśvataṃ saumya prasannena mahātmanā

tava mukhyaṃ sahasrasya nāmnāmanyatamaṃ vibho /
gaurīsaubhāgyadāteti munibhiḥ parikīrtitam

tatsatyaṃ kuru goviṃda garuḍārūḍha śāśvata /
tasmānmama patiṃ deva tvaṃ jīvayitumarhasi

rudra uvāca-
evamuktastato devyā kṛṣṇaḥ kamalalocanaḥ /
astraṃ saṃhārayāmāsa yenāsau mohitaḥ patiḥ ५०

kṛṣṇāstreṇa vinirmuktaḥ sarvabhūtapatiḥ śivaḥ /
utthāya prāṃjalirbhūtvā tuṣṭāva jagatāṃ patim

śaṃkara uvāca-
kṛṣṇakṛṣṇa jagannātha bhagavanpuruṣottama /
pareśa parameśāna anādinidhanāvyaya

tīvravīryaṃ manuṣyeṣu śarīragrahaṇātmikā /
sarvasya tava ceṣṭeyaṃ mānalakṣaṇameva tat

prasīda me namastubhyaṃ prasīda mama śāśvata /
prasīda me jagatsvāminprasīdācyuta keśava

tvameva jagatāṃ sraṣṭā dhātā harttā jagadguruḥ /
tvameva cidacidvasturūpaṃ brahma sureśvara

tvamādistvamanādistvamīśvaraḥ śeṣa eva ca /
tvaṃ mahattvaṃ paraṃ brahma pratyagātmā tvameva hi

samastāmaravaryyastvamamartyastvaṃ sureśvara /
tvaṃ marttyeśaḥ sayonistvaṃ sauśīlyena tava prabho

tava śvāsasamutpannau parajīvau sanātanau /
tataśca pālyate caiva tava vātsalyagauravāt

kṣarākṣare pare dhāmni ruco nityaṃ surāśraye /
adhi viśve nidheṣi tvāṃ dāsyakarmaṇi nānyathā

yastvāṃ na vedaloke'sminsa mūḍhaḥ sarvabhāvanaḥ /
parāvareśvaraṃ dhāma vidurdāsye manīṣiṇaḥ

te vai samāsate yuktāstatpadaṃ tridaśaiḥ samam /
sāmānyo bhajate dūrenaṃtuṃ nityaṃ padaṃ tava

tasya turyā cārukeśī cāvasthā ghaṭate tava /
mithunāni tavādhyakṣa bruvate yaduśāśvata

tava nāmāni karmāṇi guṇāni śāśvatāni ca /
aiśvaryāṇi guṇātīta bruvate cottame ime

karmajñānamaye rūpe ime pūrvottare śrute /
sasutau yuvatīśasya stotārau tava keśava

tvaṃ prajñānaṃ paraṃ brahma tvayā prājñena śāśvata /
jīvayaitena prajñena pareṇaivātmanā tvayā

tasmāccharīrādutkramya kṛpayā tava kevalam /
āmuṣmike pare svarge tvayā dattātmabodhavān

prajñānaṃ caiva vijñānaṃ medhāṃ dṛṣṭiṃ tathā dhṛtim /
sarvānkāmānavāpnoti amṛtaṃ sa bhavettadā

etatsaṃjñānamātmānaṃ yadetaddhṛdi yanmanaḥ /
manīṣā caiva yuktiśca smṛtiḥ saṃkalpa eva ca

tapaśca kratavaḥ kāmo daśa ityādi te prabho /
bhavaṃti nāmadheyāni prajñānasya ghṛṇānidheḥ

eṣa tvaṃ paramaṃ brahma eṣa tvaṃ vai prajāpatiḥ /
eṣa tvamiṃdro rudraśca eṣa tvaṃ sarvadevatāḥ

etāni sarvabhūtāni tvameva parameśvara /
suta mitrāṇi jīvāyustathānyāni sanātana

jarāyujāṇḍajātāni svedajodbhidyajāni ca /
aśvā gāvaśca puruṣā hastinaścetarāṇi ca

yatkiṃcitprāṇijātaṃ ca jaṃgamāścaiva jaṃtavaḥ /
sthāvarā ye ca vai nātha sarve tvatto bhavaṃti ca

tvāṃ hi sarvaṃ gataṃ cetthaṃ vadaṃti śrutayo harim /
tvayaiva preritā lokāśceṣṭaṃte sādhvasādhuṣu

tasmānmayā kṛtaṃ yacca aparādhamidaṃ prabho /
kṣamasva karuṇāsiṃdho guṇaiḥ śubhatamaistava

namaste puṃḍarīkākṣa goviṃdācyuta mādhava /
vāsudeva jagadvaṃdya nārāyaṇa namostu te

namasyāmi jagatsvāminnṛsiṃhakaruṇākara /
śrīśa sarvagata śrīmanparamātmannamostu te

nijāvasathavaikuṃṭha nityamuktārcitaprabho /
trayīnātha namastubhyaṃ rāmarājīvalocana

bhūbhārakavināśāya kṛṣṇānaṃdasvarūpiṇe /
viṣṇave jiṣṇave tubhyaṃ namaste yadunaṃdana

evaṃ stutvātha goviṃdaṃ praṇipatya umāpatiḥ /
prāṃjaliḥ prāha bhūteśo vākyaṃ gaṃbhīrayā girā

rudra uvāca-
mayā dattavaro hyeṣa bāṇo balisutaḥ prabho /
ahaṃ ca dattavāṃstasmai purānenārthito varam

amaratvaṃ yaduśreṣṭha sarvaṃ kartuṃ tvamarhasi /
tasmādenaṃ balisutaṃ trātumarhasi me priyam

tathetyuktvā ca bhagavānbāṇaṃ balisutaṃ tadā /
prāṇasaṃśayamāpannaṃ cchinnabāhumasṛkcitam

saṃhṛtya cakraṃ goviṃdo mumoca karuṇānidhiḥ /
mocayitvā balisutaṃ śaṃkaraḥ saṃśitavrataḥ

vṛṣabheṃdraṃ samāruhya pārvatyāsahitaḥ prabhuḥ /
yayau ca vasatisthānaṃ kailāsaṃ dharaṇīdharam

sa tu bāṇo namaskṛtya rāmakṛṣṇau mahābalau /
tābhyāṃ vai nagarīṃ gatvā mumoca madanātmajam

vastrairābharaṇairdivyaiḥ pūjayitvā yathārhataḥ /
uṣāṃ saṃpradadau tasmai kṛṣṇapautrāya śauraye

udvāhya rāmakṛṣṇau tamaniruddhaṃ yathāvidhi /
bāṇena pūjitau tatra pradyumnasahitau tadā

uṣayāsahitaṃ tatrāniruddhaṃ vai janārdanaḥ /
āropya syaṃdane divye yayau dvāravatīṃ tadā

rāmapradyumnasahitaḥ senayā sahito hariḥ /
praviveśa purīṃ ramyāṃ tridaśairmaghavāniva

aniruddho bāṇaputryā nānāratnamaye gṛhe /
aniśaṃ ramayāmāsa nānābhogairmudānvitaḥ

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde bāṇāsurasaṃgrāmakathanaṃnāma paṃcāśadadhikadviśatatamo'dhyāyaḥ