Padma Purana · Chapter 6.251

śrīrudra uvāca-
atha pauṃḍraka vāsudevaḥ kāśirājo vārāṇasyāṃ vivikte dvādaśavarṣaṃ maheśamarccayannirāhāraḥ paṃcākṣaraṃ jajāpa

pauraścaraṇakāle śaṃkaraṃ svanetrakamalena pūjayāmāsa

tataḥ śūlapāṇirumāpatiḥ prasanno varaṃ vṛṇīṣveti tamāha

asau paṃcavaktraṃsarvabhūtapatiṃ śivaṃ prasannaṃ varada mama vāsudevasamānarūpaṃ prayacchetyuvāca

śivastasmai śaṃkha cakra gadā padmayuta caturbhujaṃ puṃḍarīkadalanibhalocanaṃ vāsudevasamānakirīṭa/
lalita kuṃtalaṃ pītavastrakaustubhābharaṇādi cihnānyapi mahyaṃ dehīti yācitaḥ śivaḥ sarvamapi tasmai pradadau

sa tu vāsudevo'hamiti sarvalokānmohayāmāsa

kadācitsvargataḥ madabalotkaṭaṃ taṃ kāśipatiṃ nārado'bhyetya vasudevasutamajitvā vāsudevatvaṃ na vidyate ityuvāca

sa tu tasminneva kṣaṇe garuḍapatākāyutarūpaṃ rathamāropya caturaṃgākṣauhiṇībalena dvārakāmavāpa

tatra puradvāri svarṇayāne saṃsthito vāsudevo'haṃ yuddhārthaṃ saṃprāptosmi māmajitvāta vavāsudevatvaṃ nāstīti dūtaṃ preṣayāmāsa

viṣṇurapi tacchrutvā vainateyamāruhya pauṃḍrakeṇa yoddhuṃ puradvāri viniṣkramyākṣauhiṇībalena syaṃdane samāsīnaṃ śaṃkhacakragadāpadmahastaṃ pauṃḍrakaṃ dadarśa

kṛṣṇo'tha śārṅgamādāya saṃvartāgniprabhairbāṇaistathāśvagajapadātiyuktaṃ mahadakṣauhiṇībalaṃ muhūrtamātreṇa niḥśeṣaṃ dadāha

śareṇaikena tasya hastāvasaktaśaṃkhacakragadādihetīrapi līlayaiva ciccheda

pavitreṇa sudarśanena kirīṭakuṃḍalayutaṃ tasya śiraḥ kamalaṃ chittvā vārāṇasyāmaṃtaḥ pure nipātayāmāsa

taddṛṣṭvā sarve kāśīnivāsinaḥ kimetadityāśaṃkya vismitā babhūvuḥ

tasya pauṃḍrakasya suto daṃḍapāṇiriti vāsudevena bhagavatā nihataṃ svapitaraṃ śrutvā mātrā mṛtyunā samādiṣṭaḥ svapurohitenābhiyukto māheśvareṇa kratunā śaṃkaramiyāja

sa tu prasannaḥ kṛṣṇajighāṃsayā samarthāṃ māheśvarīṃ kṛtyāṃ tasmai saṃprītyā ca dattavān

sa kāśirājastāṃ mahośvarīṃ jvālākulopacitavigrahāṃ saṃdīptasaṭākalāpāṃ piṃgalanetrāṃ jvalatkarālavadanāṃ triśūlahastāṃ bhasmāṃgarāgaliptāṃ naramuṃḍamālāvibhūṣitāṃ sarvadevabhayaṃkarīṃ rudradattāṃ samīkṣya saputradārabāṃdhavasahitaṃ kṛṣṇaṃ jahīti prerayāmāsa

sā tu sarvalokabhayāvahā sarvāṃ pṛthvīṃ svatejasā nirdahaṃtī pralayāśaninirbharasvanaṃ nadaṃtī dvārakāmavāpa

tatratyāḥ sarvejanāstāṃ dṛṣṭvā mahāpralayamiti matvā hāhākāraṃ kurvaṃtaḥ kṛṣṇaṃ nivedayāmāsuḥ

kṛṣṇo'pi tānsarvānna bhetavyamityuktvā prākāratoraṇe sthitāṃ mahāraudrāṃ kṛtyāṃ tathāvidhāṃ dṛṣṭvā sakalaśastrāstrānivāraṇasamarthaṃ sahasrāraṃ sudarśanaṃ tasyā kṛtyāyāṃ sahasā mumoca

sā tu kalpāntārkakoṭisamavarcasā śatayojanodgataṃ sakaladīptāstrayutaṃ hiraṇmayaṃ prabhāpūrṇaṃ sakalajagatpralayasthitisamarthaṃ sahasrāraṃ sarvadevanamaskṛtaṃ jagaccharaṇabhūtaṃ mahāsudarśanaṃ vilokya vinaṣṭatejā bhayārtā krośaṃtī vārāṇasīṃ pratidudrāva

sudarśanamapi tāṃ kṛtyāṃ bhṛśamanvagāt

sāpi bhayārtā krośaṃtī kāśipatestasyāṃtaḥpuraṃ praviveśa

sudarśano'pi tāṃ vārāṇasīṃ purīṃ prāpya sabhṛtyabalavāhanaṃ pauṃḍrakasutaṃ daṃḍapāṇiṃ nāmakāśirājaṃ bahuprāsādaharmyamālinīṃ purīṃ māheśvarīmapi bhasmāvaśeṣāṃ kṛtvā sakaladevamaharṣibhiḥ pūjyamānaḥ punareva dvāravatyāṃ kṛṣṇahastaṃ susaumyaṃ kalpamiva āviveśa

atra ca ślokā gīyaṃte /
śastrāstramokṣamajaraṃ dagdhvā tadbalamojasā /
kṛtyāṃ bhasmāvaśeṣaṃ tāṃ tato vārāṇasīṃ purīm

prabhūtarathamātaṃgāṃ sāśvāṃ puṃstrīsamanvitām /
sāśeṣakoṣakoṣṭhāṃ tāṃ durnirīkṣyāṃ surairapi

dvāropalakṣitāśeṣa gṛhaprākāracatvarām /
pradadāha hareścakraṃ sakalāmeva tāṃ purīm

akṣīṇagatisāmarthyamasādhyakṛtasādhanam /
taccakraṃ prajvaladbhāsaṃ viṣṇorabhyāyayau karam

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde śrīkṛṣṇacarite pauṃḍrakaputrakṛtyāvidhvaṃsanaṃ nāmaikapaṃcāśadadhika dviśatatamo'dhyāyaḥ