Padma Purana · Chapter 6.225

śaṃkara uvāca-
ūrddhvapuṃḍrasya māhātmyaṃ vakṣyāmi śubhadarśane /
dhāraṇādeva mucyeta bhavabaṃdhāddvijottamaḥ

ūrddhvapuṃḍrasya madhye tu viśāle sumanohare /
lakṣmyā sārddhaṃ samāsīno devadevo janārdanaḥ

tasmādyasya śarīre tu ūrddhvapuṃḍraṃ dhṛto bhavet /
tasyadehaṃ bhagavato vimalaṃ maṃdiraṃ śubham

sa snātaḥ sarvatīrtheṣu sarvayajñeṣu dīkṣitaḥ /
dhārayedūrddhvapuṃḍraṃ yo mṛdāśubhreṇa vaiṣṇavaḥ

ūrddhvapuṃḍradharo vipraḥ sarvalokeṣu pūjitaḥ /
vimānavaramāruhya yāti viṣṇoḥ paraṃ padam

dhārayedūrddhvapuṃḍraṃ tu trisaṃdhyaṃ tu dvijottamaḥ /
sarvapāpaviśuddhyarthamiṣṭāpūrtaphalāptaye

ūrddhvapuṃḍradharaṃ dṛṣṭvā sarvapāpaiḥ pramucyate /
namaskṛtvāthavā bhaktyā sarvadānaphalaṃ labhet

ūrddhvapuṃḍradharaṃ vipraṃ yaḥ śrāddhe bhojayiṣyati /
ākalpakoṭipitarastasya tṛptā na saṃśayaḥ

ūrddhvapuṃḍradharo yastu kuryāchrāṃddhaṃ śubhānane /
kalpakoṭisahasrāṇi gayāśrāddhaphalaṃ labhet

yajñadānatapaścaryā japahomādikaṃ ca yat /
ūrddhvapuṃḍradharaḥ kuryāttasya puṇyamanaṃtakam

ūrddhvapuṃḍravihīnastu kiṃcitkarma karoti yaḥ /
iṣṭāpūrtādikaṃ sarvaṃ niṣphalaṃ syānna saṃśayaḥ

yaccharīraṃ manuṣyāṇāmūrddhvapuṃḍra vivarjitam /
draṣṭavyaṃ naiva tatkiṃcitśmaśānasadṛśaṃ bhavet

ūrddhvapuṃḍravihīnastu sandhyākarmādikaṃ caret /
tatsarvaṃ rākṣasairnītaṃ narakaṃ cāvagacchati

ūrddhvapuṃḍradharodvipro mṛdāśubhreṇa vaidikaḥ /
na tiryagdhārayedvidvānāpadyapi kadācana

viprāṇāmūrddhvapuṃḍraṃ syāttilakaṃ tu mahībhṛtaḥ /
paṭṭākāraṃ tu vaiśyānāṃ śūdrāṇāṃ vai tripuṃḍrakam

ūrddhvapuṃḍraṃ mṛdā kāryaṃ kastūryyāstilakaṃ tathā /
paṭṭākāraṃ tu gaṃdhena bhasmanaiva tripuṃḍrakam

ūrddhvapuṃḍraṃ tu sarveṣāṃ na niṣiddhaṃ kadācana /
dhārayetkṣatriyādyo'pi viṣṇubhakto bhavedyadi

viprāṇāṃ naiva kāryyaṃ syāttiryyakpaṭṭādidhāraṇam /
nārāyaṇātpareśānādanyeṣāmarcanaṃ na tu

brāhmaṇaḥ kulajo vidvānbhasmadhārī bhavedyadi /
varjayettādṛśaṃ devi madyocchiṣṭaṃ ghaṭaṃ yathā

tripuṃḍraṃ śūdrakalpānāṃ śūdrāṇāṃ ca vidhistathā /
tripuṃḍra dhāraṇādvipraḥ patitaḥ syānna saṃśayaḥ

ekāṃtino mahābhāgāḥ sarvabhūtahite ratāḥ /
sāṃtarālaṃ prakurvīranpuṃḍraṃ haripadākṛtim

hareḥ pādākṛtiṃ kuryādūrddhvapuṃḍraṃ vidhānataḥ /
madhyachidreṇa saṃyuktaṃ taddhi vai maṃdiraṃ hareḥ

ūrddhvapuṃḍramṛjuṃ saumyaṃ supārśvaṃ sumanoharam /
daṃḍākāraṃ suśobhāḍhyaṃ madhyechidraṃ prakalpayet

tasmācchidrānvitaṃ puṃḍraṃ daṇḍākāraṃ suśobhanam /
viprāṇāṃ satataṃ kāryaṃ strīṇāṃ ca śubhadarśane

ūrdhvapuṇḍrasya madhye tu viśāle sumanohare /
sāntarāle samāsīno harirasti śriyā saha

nirantarālaṃ yaḥ kuryādūrddhvapuṃḍraṃ dvijādhamaḥ /
sa hi tatrasthitaṃ viṣṇuṃ śriyaṃ caiva vyapohati

acchidramūrddhvapuṃḍraṃ tu ye kurvaṃti dvijādhamāḥ /
teṣāṃ lalāṭe satataṃ śunaḥpādo na saṃśayaḥ

tasmācchidrānvitaṃ puṃḍraṃ saharidraṃ śubhānvitam /
dhārayedbrāhmaṇo nityaṃ harisālokyasiddhaye

ādāya parayā bhaktyā veṅkaṭādrau hṛde mṛdam /
dhārayedūrdhvapuṇḍrāṇi harisāyujyasiddhaye

śrīkṛṣṇatulasīmūle mṛdamādāya bhaktimān /
dhārayedūrddhvapuṃḍrāṇi haristatra prasīdati

dvāravatyāṃ śubhe ramye vāsudevahṛde tathā /
tatrodbhavāṃ mṛdaṃ ramyāmādāya dvijasattamaḥ

dhārayedūrddhvapuṃḍrāṃṇi sarvakāmaphalāptaye /
ādāya parayā bhaktyā gaṃgātīrodbhavāṃ mṛdam

tayā dhṛtorddhvapuṃḍrāṇi sarvayajñaphalo labhet /
caṃdanaṃ ca haridrā ca tathā bhasmāgnihotrajam

sarvavaśyakaraṃ proktamūrddhvapuṃḍrasya dhāraṇāt /
yatra puṇyaṃ harikṣetraṃ tatra vai mṛdamāharet

parvatāgre nadītīre bilvamūle jalāśaye /
siṃdhutīre ca valmīke harikṣetre viśeṣataḥ

viṣṇoḥ snānodakaṃ yatra pravāhayati nityaśaḥ /
puṃḍrāṇāṃ dhāraṇārthāya gṛhṇīyāttatra mṛttikām

śrīraṅge veṅkaṭādrau ca śrīkūrme dvārake śubhe /
prayāgenārasiṃhādrau vārāhe tulasīvane

gṛhītvā mṛttikāṃ bhaktyā viṣṇupādajalaiḥ saha /
dhṛtvā puṃḍrāṇi cāṃgeṣu viṣṇusāyujyamāpnuyāt

yasminkasminmahābhāgā vaiṣṇavā dhārayaṃti vai /
tasminvai mṛttikā grāhyā ūrddhvapuṃḍrasya dhāraṇe

śyāmaṃ śāṃtikaraṃ proktaṃ raktaṃ vaśyakaraṃ tathā /
śrīkaraṃ pītamityāhuḥ śvetaṃ mokṣakaraṃ śubham

vartulaṃ tiryagachidraṃ hrasvaṃ dīrghaṃ tataṃ tanum /
vakraṃ virūpaṃ baddhāgraṃ chinnamūlaṃ padacyutam

aśubhaṃ rūkṣamāsaktaṃ tathānaṃgulikalpitam /
vigaṃdhamavasahyaṃ ca puṃḍramāhuranarthakam

ārabhya nāsikāmūlaṃ lalāṭaṃ taṃ likhenmṛdā /
samārabhya bhruvormadhyamaṃtarālaṃ prakalpayet

aṃtarālaṃ dvyaṃgulaṃ syātpārśvāvaṃgulimātrakau /
mṛdā śubhreṇa vilikhetpuṇḍraṃ ṛjutaraṃ śubham

lalāṭe keśavaṃ dhyāyennārāyaṇamathodare /
vakṣasthale mādhavaṃ ca goviṃdaṃ kaṃṭhakūbare

viṣṇuṃ ca dakṣiṇe kukṣau bāhau ca madhusūdanam /
trivikramaṃ kaṃdhare tu vāmanaṃ vāmapārśvake

śrīdharaṃ bāhuke vāme hṛṣīkeśaṃ tu kaṃdhare /
pṛṣṭhe vai padmanābhaṃ tu trike dāmodaraṃ nyaset

tatprakṣālanatoyena vāsudevaṃ tu mūrddhani /
lalāṭe bhujayugme tu pṛṣṭhayoḥ kaṃṭhakūbare

dhārayedūrddhvapuṃḍraṃ tu caturaṃgulamātrataḥ /
kukṣau tatpārśvayoḥ proktamāyataṃ tu daśāṃgulam

bāhvorvakṣasthale puṃḍraṃmaṣṭāṃgulamudāhṛtam /
evaṃ dvādaśapuṃḍrāṇi brāhmaṇaḥ satataṃ dharet

tattatpuṇḍrāṇi tanmūrtīrdhyātvā maṃtreṇa dhārayet /
aṃtarāleṣu sarveṣu haridrāṃ dhārayecchriyām

catvāri bhūbhṛtāmāhuḥ puṃḍrāṇi dve viśāṃ smṛte /
ekapuṃḍraṃ tu nārīṇāṃ śūdrāṇāṃ ca vidhīyate

lalāṭe hṛdi bāhvośca catuḥpuṃḍrāṇi dhārayet /
lalāṭe hṛdaye dve tu phāletvekaṃ vidhīyate

ūrddhvapuṃḍraṃ lalāṭe tu sarveṣāṃ prathamaṃ smṛtam /
lalāṭādikrameṇaiva dhāraṇaṃ tu vidhīyate

mūrtīstu vāsudevādyāścatuḥpuṃḍreṣu dhārayet /
dvayorgoviṃdakṛṣṇau tu ekaṃ nārāyaṇaṃ dharet

evaṃ puṃḍravidhiḥ proktaḥ sarveṣāṃ girije mayā /
aśvatthapatrasaṃkāśo veṇupatrākṛtistathā

padmakuḍmalasaṃkāśo mohanaṃ tritayaṃ smṛtam /
mahābhāgavataḥ śuddhaḥ puṃḍraṃ haripadākṛtim

daṃḍākāraṃ tu vā devi dhārayedūrddhvapuṃḍrakam /
sudarśanenāṃkitabāhumūlāstathorddhvapuṃḍrāṃkita sarvagātrāḥ

mālāraviṃdākṣadharā viśuddhā rakṣaṃti lokānduritaughasaṃgāt

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde ūrddhvapuṃḍramāhātmyaṃnāma paṃcaviṃśatyadhikadviśatatamo'dhyāyaḥ