Padma Purana · Chapter 6.195

sūta uvāca-
atha devaṛṣistatra kumārānanumānya ca /
uvāca praṇato vākyaṃ jñānayajña kṛtādaraḥ

nārada uvāca-
jñānayajñaṃ kariṣyāmi śukaśāstra kathojvalam /
bhakti jñāna virāgāṇāṃ sthāpanārthe prayatnataḥ

yatra kāryo mayā yajñaḥ sthānaṃ tatkathyatāṃ dvijāḥ /
catvāro yajñavāhāśca yūyameva vṛtā mayā

kiyadbhirdivasaiḥ śrāvyā śrīmadbhāgavatī kathā /
ko vidhistatra kartavyo jñānayajñaviśāradāḥ

kumārā ūcuḥ/
śṛṇu nārada vakṣyāmastubhyaṃ yatra kathā nṛṇām /
śṛṇvatāṃ pāparāśighno bhavetpuṇyavibardvinī

gaṃgādvāra samīpe tu kāmadākhyaṃ puraṃ mahat

svarṇadyāścottare puṇye taṭamānaṃdanāmakam /
nānāṛṣigaṇairjuṣṭaṃ devasiddhaniṣevitam

nānā tarulatākīrṇaṃ svacchakomala vālukam /
ramyamekāṃtadeśasthaṃ svarṇapaṃkaja śobhitam

yatsamīpasthajīvānāṃ kṣetrasyaiva prabhāvataḥ /
mithaḥ saṃsnigdhacittānāṃ vairaṃ cetasi na sthitam

jñānayajñastvayā tatra karttavyo hi prayatnataḥ /
apūrva rasadātrī ca kathā tatra bhaviṣyati

vṛṃdāvanapratolisthaṃ jarājīrṇa kalevaram /
sutadvayaṃ puraskṛtya bhaktistatrāgamiṣyati

yatra bhāgavatī vārtā bhaktistatra sahātmajā /
kṛṣṇakīrtisudhāṃ pītvā taruṇī vā bhaviṣyati

sūta uvāca-
evamuktvā kumārāste nāradena samaṃtataḥ /
gaṃgādvāre samājagmurjñānayajñāya satvarāḥ

yadā prāptāstaṭaṃ te tu gaṃgāyā bhārgavarṣabha /
tadā kolāhalaścāsīdbhūrlokādika saptasu

śrīmadbhāgavatāsvādalaṃpaṭā sāptalaukikāḥ /
dhāvaṃ dhāvaṃ samājagmuḥ prācīnā vaiṣṇavāśca ye

bhṛgurvasiṣṭhaścyavanaśca gautamo medhātithirdebaladevarātau /
rāmastathāgādhija śākalau ca mṛkaṃḍaputrātrija pippalādāḥ

yogeśvarau vyāsaparāśarau ca śukādayo bhāgavatapradhānāḥ /
śiṣyairupetā bahuśāstravijñāḥ kṛṣṇāmṛtāsvāda kṛtau pradhānāḥ

vedāṃtāni ca vedāśca maṃtrāstaṃtrāṇi saṃhitāḥ /
daśasaptapurāṇāni ṣaṭśāstrāṇi tathāyayuḥ

gaṃgādyāḥ saritastatra puṣkarādi sarāṃsi ca /
kṣetrāṇi ca diśaḥ sarvā daṃḍakādi vanāni ca

himādayo nagāstatra devagaṃdharvakinnarāḥ /
dvīpāḥ samudrā dikpālāḥ pātālasthāstathāyayuḥ

dīkṣāyāṃ nāradenātha dattamāsanamuttamam /
kumārā vaṃditā sarve niṣeduḥ kṛṣṇatatparāḥ

vaiṣṇavāḥ suviraktāśca nyāsino brahmacāriṇaḥ /
mukhyā hyagresthitā steṣāṃ purato nāradaḥ sthitaḥ

vāmabhāgemunigaṇādakṣiṇecadivaukasaḥ /
vedopaniṣado'nyatratīrthānicabhṛgūdvaha

jayaśabdonamaḥ śabdaḥśaṃkhaśabdastathaivaca /
babhūvākāśasaṃsparśīghoṣayanvidiśodaśa

vimānānisamāruhyaprahṛṣṭānākavāsinaḥ /
kalpavṛkṣaprasūnaiścatāṃsabhāṃsamavākiran

sūtauvāca-
evaṃteṣuniviṣṭeṣubhṛgvādiṣuyathārhataḥ /
śrībhāgavatamāhātmyamūcirenāradāyate

kumārā ūcuḥ/
śṛṇu nārada vakṣyāmo mahimānaṃ mahādbhutam /
śrīmadbhāgavatākhyasya śāstrasya vidhipūrvakam

sadā naraiḥ sukṛtibhiḥ sevyā bhāgavatī kathā /
yasyāḥ śravaṇamātreṇa kṛtārthatvaṃ prayāṃti te

graṃtho 'ṣṭādaśasāhasro dvādaśaskaṃdha saṃyutaḥ /
parīkṣicchukasaṃvādaḥ śrīmadbhāgavatābhidhaḥ

tāvatsaṃsāracakresminbhramatyajñānamohitaḥ /
yāvatkarṇagataṃnosyācchukaśāstraṃ janasya ca

kiṃ śrutairbahubhiḥ śāstraiḥ purāṇaiḥ saṃhitāgamaiḥ /
yadi bhāgavataṃ puṃbhirna śrutaṃ bhaktibhāvanaiḥ

kathā bhāgavatasyāpi nityaṃ bhavati yadgṛhe /
tadgṛhaṃ tīrtharūpaṃ hi nṛṇāṃ pāpavināśanam

aśvamedhasahasrāṇi rājasūyaśatāni ca /
bhāgavatyāḥ kathāyāśca kalāṃ nārhaṃti ṣoḍaśīm

tāvatpāpāni tiṣṭhaṃti dehe'sminmunipuṃgava /
yāvanna śrūyate samyakśrīmadbhāgavataṃ naraiḥ

na gaṃgā na gayā kāśī pratiṣṭhānaṃ na puṣkaraḥ /
kathāyā bhāgavatyāśca samā puṇyaphalena ca

ślokārddhaṃ ślokapādaṃ vā nityaṃ bhāgavatodbhavam /
paṭhasva svamukhenāpi yadīcchasi bhavakṣayam

vedādirvedamātā ca pauruṣaṃsūktameva ca /
trayī bhāgavataṃ caiva dvādaśāṣṭākṣarau manū

dvādaśātmā prayāgaśca kālaḥ saṃvatsarātmakaḥ /
brāhmaṇaścāgnihotraṃ ca surabhirdvādaśī tithiḥ

tulasī ca vasaṃtartuḥ puruṣottama eva ca /
eteṣāṃ vastuto nāsti pṛthagbhāvo munīśvara

yaśca bhāgavataṃ śāstraṃ vyākuryādanvahaṃ dvija /
janmakoṭikṛtaṃ pāpaṃ tasya naśyati nārada

śrutaṃ ca paṭhitaṃ dhyātaṃ śrīmadbhāgavataṃ nṛbhiḥ /
dadāti muktiṃ bhaktiṃ vā tulasyagnyośca sevanam

aṃtakāle tu saṃprāpte bhayaṃ tyaktvā sudūrataḥ /
śrīmadbhāgavataṃ bhaktyā śṛṇuyādyaḥ sa muktibhāk

prauṣṭhapadyāṃ ca rākāyāṃ hemasiṃha samanvitam /
alaṃkṛtya dvijāgryāya śrīmadbhāgavataṃ dadet

bhaktiyukto vimānaśca mitāśī ca jiteṃdriyaḥ /
śrutvāditaḥ sa kṛṣṇasya sāyujyaṃ lokamāpnuyāt

ājanmamātramapi yena śaṭhena cittaṃ samyaṅniyamya bhuvi kṛṣṇakathā na pītā /
cāṃḍālavacca paśuvadbata tena nītaṃ mithyā svajanma jananī bhṛśamarditā ca

yairna śrutaṃ bhāgavataṃ purāṇamārādhito no puruṣaḥ purāṇaḥ /
mukhe hutaṃ naiva dharāmarāṇāṃ teṣāṃ vṛthā janma gataṃ narāṇām

cittaṃ na yasya tu narasya hareḥ kathāyāṃ saṃprīyate duritaduṣṭamasatprasaṃgāt /
dhiktaṃ naraṃ paśusamaṃ bhuvibhārabhūtamevaṃ vadaṃti munayaḥ kila pūrvasiddhāḥ

durllabhaiva kathā loke śrīmadbhāgavatodbhavā /
koṭijanmasamutthena puṇyenaiva tu labhyate

tena yoganidhe sādho śrotavyā sātvatī kathā /
pratyahaṃ niyamo nāsti dinānāṃ vastuto dvija

satyena brahmacaryeṇa yato'sya śravaṇaṃ matam /
tataḥ kalau viśeṣo hi vidhiḥ saptadinātmakaḥ

manasaścājayādrogātpuṃsāṃ caivāyuṣaḥ kṣayāt /
kalerdoṣabahutvācca saptāhaśravaṇaṃmatam

manaso nigrahaścaiva niyamācaraṇaṃ tathā /
kartuṃ saptadinaṃ śakyaṃ tato niyamakalpanā

śraddhayā śravaṇe nityamādyaṃtāvadhi yatphalam /
tatphalaṃ śukadevena saptāhaśravaṇe kṛtam

yatphalaṃ nāsti tapasā na yogena samādhinā /
anāyāsena tatsarvaṃ saptāha śravaṇāllabhet

yajñādvratācca tapaso dhyānājjñānācca tīrthataḥ /
śrībhāgavatasaptāha niyamo hyuttamo mataḥ

yadā kṛṣṇo bhuvaṃ tyaktvā svapadaṃ gaṃtumudyataḥ /
tadājñāyoddhavo dhīmāngoviṃdaṃ vākyamabravīt

uddhava uvāca-
bhagavanbhavatā sarvaṃ devakāryaṃ prasādhitam /
adhunā gaṃtumicchustvaṃ svaṃpadaṃ tamasaḥ param

ataściṃtā mamotpannā tvadviyoga bhiyā vibho /
tāmapākuru deveśa tvāmahaṃ śaraṇaṃ gataḥ

āgato'yaṃ kalirghoro'tra sarve'pi janāḥ khalāḥ /
bhaviṣyaṃti tato nātha kiṃ vidheyaṃ tadādiśa

iyaṃ bhāravatī bhūmiḥ śaraṇaṃ kiṃ prayāsyati /
tvadanyo dṛśyate nātra trātā syād yadunaṃdana

ato'smāsu dayāṃ kṛtvā tiṣṭhātraiva dayānidhe /
sādhūnāṃ rakṣaṇāyaiva tvamāvirabhavaḥ prabho

nirguṇo'pi nirākāraḥ saccidānaṃdavigrahaḥ /
tvadviyogena te bhaktāḥ kathaṃ sthāsyaṃti bhūtale

nirguṇopāsane kaṣṭamato'smaddhitamācara /
sūta uvāca-/
ityuddhavavacaḥ śrutvā ciṃtayitvā kṣaṇaṃ hariḥ

dadau bhāgavataṃ tasmai kṛpayā parayā yutaḥ /
nijaṃ tejaḥ samādhāya śrīmadbhāgavate dvija

datvoddhavāya bhagavānsvakīyaṃ padamāviśat /
teneyaṃ vāṅmayī mūrtirvarttate śrīhareriha

sevanātsatataṃ cāsyāḥ pāpaṃ naśyennṛṇāṃ kṣaṇāt /
saptāhaśravaṇaṃ tena kathitaṃ sarvato'dhikam

śrotā vaktā pṛcchakaśca yāṃti tanmayatāṃ dvija /
duḥkhadāridrya daurbhāgya pāpa prakṣālanāya ca

kāmakrodha jayārthaṃ ca kalau bhāgavataṃ kṣamam /
anyathā vaiṣṇavī māyā devānāmapi durjayā /
kathaṃ nivartate puṃsāṃ śrīmadbhāgavataṃ vinā

sūta uvāca-
ityevamuktvā māhātmyaṃ śrīmadbhāgavatasya te /
kathāṃ bhāgavatīṃ divyāṃ pravaktumupacakramuḥ

vedopaniṣadāṃ sāre śrīmadbhāgavate dvijaiḥ /
ārabhyamāṇe tatraiva bhaktirāvirabhūtkṣaṇāt

premānvitā cārutanurmudānvitau sutau gṛhītvā taruṇau svadorbhyām /
śrīkṛṣṇa goviṃda hare murāre nātheti nāmāni muhurvadaṃtī

tāmāgatāṃ bhāgavatārthabhūṣāṃ sucāruveṣāṃ dadṛśuḥ sadasyāḥ /
vyatarkayaṃścāpi kathaṃ kutāsau kāstīti sarve'pi suvismitākṣāḥ

tataḥ kumārā jagaduḥ kṛtārthā kathārthato niṣpatitādhuneyam /
evaṃ giraḥ sā sasutā niśamya jagāda namrābjabhuvaḥ kumārāt

bhaktiruvāca-/
bhavadbhiradyaiva kṛtāsmi puṣṭā kalau praṇaṣṭāpi kathārasena /
tiṣṭhāmi kutrāhamabhīṣṭamābhyāṃ sahāspadaṃ mahyamupādaśadhvam

sūta uvāca-
tadvākyamākarṇya vidheḥ kumārā vicārya samyakpraṇidhāya citte /
ucuśca bhaktiṃ bhavarogahartrīṃ premaikadātrīṃ haribhaktibhājām

kumārā ūcuḥ /
bhakteṣu goviṃda parāyaṇeṣu sādhuṣvatho dīnadayā pareṣu /
mano niyamyotpathasaṃpravṛttaṃ kṛtvaikatānaṃ haripādapadme

tato hi doṣāḥ kalijā ime tvāṃ draṣṭuṃ na śaktāḥ prabhavopi loke /
kalau tvamekaiva jagaddhitāya bhaviṣyase nārada saṃpraṇītā

sakalabhuvanamadhye nirdhanāścātidhanyā nivasati hṛdi yeṣāṃ śrīharerbhaktirekā /
harirapi nijalokaṃ satvaraṃ saṃvihāya praviśati hṛdi yeṣāṃ premasūtrāpinaddhaḥ

iti śrīpādme mahāpurāṇe pacaṃpaṃcāśatsāhasryāṃ saṃhitāyāmuttarakhaṃḍe/
śrībhāgavatamāhātmye paṃcanavatyadhikaśatatamo'dhyāyaḥ