Padma Purana · Chapter 6.194

sūta uvāca-
evaṃ saṃprārthito viprāstayā bhaktyātidīnayā/
yataścākathayaṃ tadvai tacchṛṇudhvaṃ dayālavaḥ

nārada uvāca-
mā khidastvaṃ vṛthā bāle samādhāya mano hṛdi /
śrīkṛṣṇacaraṇāṃbhojaṃ smara saukhyaṃ labhiṣyasi

draupadī ca paritrātā yena kauravakaśmalāt /
pālitā gopasuṃdaryaḥ sa kṛṣṇaḥ kvāpi no gataḥ

tvaṃ tu bhaktiḥ priyā tasya satataṃ prāṇato'dhikā /
tvayāhūtastu bhagavānyāti nīcagṛheṣvapi

satyādi triyuge bodho virāgo muktisādhakau /
kalau tu kevalā bhaktirbrahmasāyujyakāriṇī

iti niścitya vidrūpī svakāṃ gāttvāṃ sasarja ha /
paramānaṃdacinmūrtiḥ svapriyāṃ prītamānasaḥ

badhvāṃjali tvayā pṛṣṭaḥ kiṃ karomīti vai hariḥ /
tvāṃ tadājñāpayatkṛṣṇo madbhaktānpoṣayeti ca

aṃgīkṛtaṃ tvayā tadvai prasanno'bhūddharistadā /
muktidāsīṃ dadau tubhyaṃ jñānavairāgya ātmajau

bhaktānāṃ poṣaṇaṃ nityaṃ vaikuṃṭhasthā karoṣi ca /
bhūmau ca bhaktapoṣāya chāyārūpaṃ samāśritā

vimukti jñānavairāgyaiḥ saha caivāgatātra hi /
kṛtādidvāparāṃte hi kāle mukti mudāsthitā

kalau tu saṃkṣayaṃ prāptā pāṣaṃḍāmayapīḍitā /
tvadājñayā gatā śīghraṃ vaikuṃṭhe punareva sā /
smṛtamātrā tvayādyāpi muktirāyāti satvaram

putrīkṛtya tvayaimau ca svapārśve parirakṣitau /
upekṣātaḥ kalau maṃdau vṛddhau jātau sutau tava

tathāpi ciṃtāṃ muṃcatvamupāyaṃ ciṃtayāmyaham /
kalinā sadṛśaḥ ko'pi yugo nāsti varānane

tasmiṃstvāṃ khyāpayiṣyāmi gehe gehe jane jane /
anyadharmāṃstiraskṛtya puraskṛtya mahotsavān

yadi pravarttaye na tvāṃ tadā dāso harernahi /
tvadanvitāśca ye jīvā bhaviṣyaṃti kalāviha

pāpino'pi gamiṣyaṃti nirbhayā harimaṃdiram /
yeṣāṃ citte bhavedbhaktiḥ sarvadā premarūpiṇī

na te paśyaṃti kīnāśaṃ svapne'pyamalamūrttayaḥ /
na preto na piśāco vā rākṣaso vāsuropi ca

bhaktiyuktamanaskānāṃ sparśane darśane prabhuḥ /
na tapobhirna vedaiśca na jñānenāpi karmaṇā

harirhi sādhyate bhaktyā pramāṇaṃ tatra gopikāḥ /
nṛṇāṃ janmasahasreṇa bhaktiḥ sukṛtināṃ bhavet

kalau bhaktiḥ kalau bhaktirbhaktyākṛṣṇaḥ puraḥ sthitaḥ /
bhaktidrohakarā ye ca te sīdaṃti jagattraye

durvāsā duḥkhamāpannaḥ purā bhaktiviniṃdakaḥ /
alaṃ vṛttairalaṃtīrthairalaṃ yogairalaṃ makhaiḥ

alaṃ jñānakathālāpairbhaktirekaiva muktidā /
evamuktaṃ mayā sā tu svamāhātmyaṃ niśamya vai

sarvāṃgaharṣasaṃyuktā māṃ punarvākyamabravīt /
aho nārada dhanyo'si prītiste mayi niścalā

na kadācinvimuṃcāmi cittaṃ te mayi saṃgatam /
kṛpālunā tvayā sādho madbādhā dhvaṃsitā kṣaṇāt

putrayoścetanā nāsti mamemau pratibodhaya /
tasyāstadvacanaṃ śrutvā kāruṇyenānvito hyaham

tayoḥ prabodhanaṃ kartuṃ pravṛttaḥ pāṇinā spṛśan /
mukhaṃ saṃsṛjya karṇāṃte śabdamuccaiḥ samuccaran

jñāna prabuddhytāṃ śīghraṃ vairāgyapratibudhyatām /
vedavedāṃtaghoṣaiśca gītā pāṭhairmuhurmuhuḥ

bodhyamānau tadā tena kathaṃcidbodhamāgatau /
netrairanavalokaṃtau jṛṃbhaṃtau sālasāvubhau

bakavatpalitau prāyaḥ śuṣkakāṣṭhasamāṃgakau /
kṣutkṣāmau tau nirīkṣyaiva punaḥ svāpamupāgatau

tadā ciṃtāparo'bhūvaṃ kiṃ vidheyaṃ mayeti ca /
aho nidrā kathaṃ yāti vṛddhatvaṃ cānayoḥ param

ciṃtayannita goviṃdaṃ smarannāsaṃ dvijottamāḥ /
vyomavāṇī tadaivābhūnmā ṛṣe khidyatāmiti

udyamassaphalaste tu bhaviṣyati na saṃśayaḥ /
etadarthaṃ tu satkarma surarṣe tvaṃ samācara

tatkarmate'bhidhāsyaṃti sādhavaḥ sādhubhūṣaṇāḥ /
satkarmaṇi kṛte tasminsvapanaṃ vṛddhatānayoḥ

gamiṣyati kṣaṇādbhaktiḥ sarvataḥ prasariṣyati /
ityākāśavacaḥ spaṣṭaṃ niśamyāpi mayā dvijāḥ

na jñātaṃ yannabhovāṇyā gopyatvena nirūpitaṃ /
kiṃ tatkarma ca yenaitau bhavato jñānasaṃyutau

kva bhaviṣyaṃti te saṃtaḥ kathaṃ vakṣyaṃti karma sat /
mayātra kiṃ prakarttavyaṃ yaduktaṃ vyomabhāṣayā

atha tau tatra saṃsthāpya nirgato'haṃ bahirdvijāḥ /
vṛṃdāraṇyādapṛcchaṃ ca yatra tatra dvijottamān

vṛttāṃtaṃ sarva evātha śrutvā vismitamānasāḥ /
naivottaraṃ prayacchaṃti hyanabhijñānabhogiraḥ

asādhyaṃ kecana procurāvijñeyamathāpare /
mūkī babhūvuranye tu ciṃtayānāḥ punaḥ punaḥ

vedavedāṃtaghoṣaiśca gītāpāṭhairmuhurmuhuḥ /
bodhyamānaṃ trikaṃ tattu nodatiṣṭhadaho vidhiḥ

yoginā nāradenāpi svayaṃ na jñāyate tu yat /
tatkathaṃ śakyate kartumitarairiha mānuṣaiḥ /
tataściṃtāturaścāhaṃ badarīvanamāgataḥ

tapaścarāmi cātraiva tadarthaṃ kṛtaniścayaḥ /
tāvaddadarśa purataḥ sanakādyānmunīśvarān /
koṭisūryasamābhāsānuvāca munisattamān

idānīṃ bhūribhāgena bhavatāṃ darśanaṃ hyabhūt /
tadupāyaṃ mahābhāgā vadaṃtu prītamānasāḥ

bhavaṃto yogināṃ śreṣṭhā buddhimaṃto bahuśrutāḥ /
kumārā evapaṃcābdāḥ pūrveṣāmapipūrvajāḥ

sadā vaikuṃṭhanilayā harikīrttanatatparāḥ /
līlāmṛtakathonmattā harismaraṇatatparāḥ

ato hi kāladuhitā yuṣmānnaiva prabādhate /
yeṣāṃ bhrūbhaṃgamātreṇa dvārapālau hareḥ purā

daityau bhūtvā trijanmāni punastatsthānamāsthitau /
aśarīragiroktaṃ yatkiṃtatsādhanamucyatām

anuṣṭheyaṃ yathā yatra prabruvaṃtu kṛpālavaḥ /
bhaktijñānavirāgāṇāṃsukhamutpadyateyathā /
khyātirvaḥ sarvalokeṣu tathā sādhūcyatāṃ budhāḥ

kumārā ūcuḥ-
mā ciṃtāṃ kuru devarṣe svacitte harṣamāvaha /
upāyaḥ sukhāsādhyo'tra vidyate viśvasaukhyadaḥ

aho nārada dhanyo'si viraktānāṃ śiromaṇiḥ /
śrīkṛṣṇapremapātrāṇāmagraṇīrvadatāṃ varaḥ

tvayi citraṃ na devarṣe bhaktisādhanatatpare /
ucitaṃ kṛṣṇadāsānāṃ bhakteḥ saṃcāraṇaṃ bhuvi

ṛṣibhirbahudhā loke upāyāḥ siddhaye kṛtāḥ /
śramasādhyāśca te sarve prāyaḥ svargaphalapradāḥ

vaikuṃṭhasādhakaḥ paṃthā gupto lokeṣu varttate /
tasyopadeśakaḥ sādhuḥ prāyo bhāgyena labhyate

yatte satkarma nirdiṣṭaṃ vyomavācā munīśvara /
tajjñeyamiha sarvajñairjñānayajñaḥ purātanaiḥ

śrīmadbhāgavatālāpo jñānayajñaḥ śukoditaḥ /
bhaktijñānavirāgāṇāṃ sukhadaḥ pratibhāti naḥ

kalidoṣā ime sarve śrīmadbhāgavata dhvaneḥ /
prabhītāḥ pralayāyaṃte siṃhaśabdādvṛkā iva

jñānavairāgyasaṃyuktā bhaktiḥ premarasāvahā /
pratigehaṃ pratijanaṃ sukhakrīḍāṃ kariṣyati

sūta uvāca-
kumāroktaṃ samākarṇya nāradaḥ prītamānasaḥ /
punaḥ provāca bhagavāṃstadutkarṣaṃ vibhāvayan

nārada uvāca-
vedavedāṃtaghoṣaiśca gītāpāṭhaiḥ prabodhitam /
nodatiṣṭhattrikaṃ tattu kalidoṣatiraskṛtam

kathaṃ bhāgavatālāpāttadvibodhamihaiṣyati /
chiṃdaṃtu saṃśayaṃ hyenaṃ bhavaṃto'moghadarśanāḥ

vilaṃbo nātra karttavyaḥ śaraṇāgatavatsalāḥ /
tataste sanakādyāstu viraktā hyūrddhvaretasaḥ

siddhāḥ sanātanā viprā nāradaṃ procurādarāt

kumārā ūcuḥ /
vedopaniṣadāṃ sārājjātā bhāgavatī kathā /
atyuttamā tato bhāti pṛthagbhūtā phalonnatiḥ

āmūlāgraṃ rasostyeva rasālasya yathā phale /
pṛthagbhūtaṃ tu pānena yathā viśvamanoharaḥ

yathā dugdhesthitaṃ sarpirna ca svādūpakalpyate /
pṛthagbhūtaṃ tu taddivyaṃ devānāṃ prītivarddhanam

ikṣuṣvivādimadhyāṃtaṃ śarkarā vyāpya tiṣṭhati /
pṛthagbhūtā tu sā miṣṭā tathā bhāgavatī kathā

śrīmadbhāgavataṃ nāma purāṇaṃ rasameva hi /
bhaktijñānavirāgāṇāṃ saukhyāyaiva prakāśitam

kṛṣṇena brahmaṇe nābhikaṃjasthāya hṛdaiva hi /
taccatuḥślokamakhilaṃ brahmaiva pratibhāsate

tubhyaṃ ca brahmaṇā proktaṃ taccaritranidarśanam /
tvayāpi vyāsadevāya proktaṃ tattāpahānaye

yadīyasmaraṇātsadyo nirviṇṇo bādarāyaṇaḥ /
cakāra mahadākhyātumātmārāma manoharam

atra te vismayaḥ kena yena pṛccheḥ punaḥ punaḥ /
śrīmadbhāgavataṃ śāstraṃ kṣamaṃ kṛṣṇānukarṣaṇe

sūta uvāca-
etanniśamya vacanaṃ samudāhṛtaṃ tu yogīśvaraiḥ sanakamukhyatamairabhīṣṭam /
bhaktyā vidhṛtya caraṇaṃ ca praṇamya mūrdhnā hṛṣṭo jagāda jagadādhinivarttakāṃstān

nārada uvāca-/
saṃdarśanaṃ ca bhavatāṃ vinihaṃtyaghaughaṃ śreyastanoti bhavaduḥkhadavārditānām /
niḥśeṣaśeṣamukhagītakathaikapānātpremaprakāśanakṛte śaraṇaṃ gato vaḥ

puṇyodayena bahujanmasamarjitena satsaṃgamo yadi bhavetkṛtino janasya /
ajñānahetukṛtamohamahāṃdhakāro naśyettadā hyudayameti mahānvivekaḥ

iti śrīpādmemahāpurāṇe paṃcapaṃcāśatsāhasrayāṃ saṃhitāyāmuttarakhaṃḍe/
śrībhāgavatamāhātmye caturnavatyadhikaśatatamo'dhyāyaḥ