Padma Purana · Chapter 6.190

īśvara uvāca-
ataḥ paraṃ pravakṣyāmi ṣoḍaśādhyāyagauravam /
ākarṇaya kuraṃgākṣi harṣotkaṃṭhapravarṣiṇi

asti saurāṣṭrikaṃ nāmnā puraṃ gurjaramaṃḍale /
tatrāsītkhaṅgabāhuśca rājā caṃdra ivāparaḥ

yadīya kusumāmodamālāsurabhitodare /
vārāṃnidhau hariḥ svāsthyādaśeta saha padmayā

yadīya kīrtikarpūrakaṇābhāṃtinabhoṃgaṇe /
kīrṇā vairikṛtaśvāsa mārutaistārakāchalāt

yasyāsidhārā tīrtheṣu snātā vai ripubhūbhujaḥ /
vyāvarttaṃ te divo'dyāpi svargastrīvāgvimohitāḥ

tasyārimardanonāma madahastī madoddhuraḥ /
madāṃbudhārā salile guṃjadbhramaramaṃḍalaḥ

kapolaphalakottīrṇa madadhārājalāvilaḥ /
babhau yo nirjharodgorairaṃjanādririvāccakaiḥ

yasyāṃgeṣu vyarājaṃta cāmarāścaṃdrikojjvalāḥ /
kiraṇāiva śītāṃśoḥ patitāḥ kānanodare

siṃdūrapāṃsupaṭalī rājatkuṃbhasthalo babhau /
yaḥ saṃdhyāvāridavyāptaṃ viyatkhaṃḍamiva sthitam

sa kadācinmocayitvā śṛṃkhalānnigaḍānapi /
bhaṃktvā lauhadṛḍhastaṃbhaṃ prasahya niśi nirgataḥ

ādhoraṇagaṇānsarvānpārṣṇivisphūrjadaṃkuśān /
krodhādavagaṇayyaiva nijaśālāṃ babhaṃja saḥ

tīkṣṇāṃkuśamukhairviṣvakhanyamāno'pi vaiṇavaiḥ /
daṃḍaistu trāsayāmāsuḥ sādino na manāgapi

tato rājā samāgatya niśamyedaṃ kutūhalam /
tatra hastikalābhijñaiḥ samaṃ rājakumārakaiḥ

adṛśyata samāgatya rājñā daṃtāvalo balī /
mohayannudbhaṭāṭopo hṛtāṭṭālikamālikaḥ

dadṛśustaṃ mahābhīmaṃ paurā dūrataraṃ sthitāḥ /
gopāyaṃtaḥ śiśūnbhītyā nivṛttānyakutūhalāḥ

ruddheṣu tatra mārgeṣu palāyanaparairjanaiḥ /
vāsiteṣu tadīyogradānadhārāṃbusīkaraiḥ

snātvā tenādhvanā yātaḥ sarasaḥ kaścana dvijaḥ /
gītānāṃ ṣoḍaśādhyāyaślokānkatipayāñjapan १७ bhagavadgītā/daivāsurasampadvibhāgayogaḥ/
niṣiddhyamāno bahudhā paurairādhoraṇairapi

amanyamānaḥ kariṇo bhītāncalitavāṃstataḥ /
phūtkāreṇa sa āvṛṇvañjanānviparimardayan

spṛśandānāṃbujaṃ tasya svastimānnirgato dvijaḥ /
tato mahānabhūttatra vismayo vāgagocaraḥ

mānase bhūmipālasya paurāṇāmapi paśyatām /
samāhūya tato rājā phullarājīvalocanaḥ

tamāpṛcchaddvijaṃ vāhādavatīrya praṇamya ca

rājovāca-
alaukikamidaṃ vipra tvayādyācaritaṃ mahat /
kṛtāṃtakalpādetasmātkathaṃ niryātavāngajāt

kamarcayasi gīrvāṇaṃ kaṃ maṃtraṃ japasi prabho /
kā ca siddhistavāstīti dvijanmansamudīraya

dvija uvāca /
gītāyāḥ ṣoḍaśodhyāyaḥ ślokānkatipayānaham /
japāmi pratyahaṃ bhūpa tenaitāḥ sarvasiddhayaḥ

tato vihāya dviradaṃ kautūhalarasaṃ nṛpaḥ /
ājagāma dvijanmānamādāya nijamaṃdiram

śubhaṃ muhūrtamanvīkṣya toṣayitvā dvijottamam

suvarṇairlakṣyasaṃkhyākairgītāmaṃtramupādade /
gītāyāḥ ṣoḍaśādhyāyaślokānkatipayānapi

samabhyasya tato rājā satkāreṇa sakautukaḥ /
athaikadā vinirgatya bāhyālīṃ saha sainikaiḥ

tamevāmocayadrājā mattamādhoraṇādgajam /
vispaṣṭamiti vākyāni rājyasaukhyamamānayan

tṛṇavajjīvitaṃ rājā gajasyāgreviśattataḥ /
ādāya gaṃḍaphalakaṃ madapaṃktiniraṃkuśam

āyayau maṃtriviśvāsānnṛpaḥ sāhasikāgraṇīḥ /
rāhoriva mukhādiṃduḥ kālāsyādiva dhārmikaḥ

sādhuḥ khalasya vadanānnṛyoniragamadgajāt /
āgatya nagaraṃ rājā tvabhiṣicya kumārakam

gītāyāḥ ṣoḍaśādhyāyādavāpa paramāṃ gatim

iti śrīpādme mahāpurāṇe paṃcapaṃcāśatsahasrasaṃhitāyāmuttaraṃkhaḍe gītāmāhātmye navatyadhikaśatatamo'dhyāyaḥ