પદ્મ પુરાણ · અધ્યાય 6.190

ઈશ્વર ઉવાચ-
અતઃ પરં પ્રવક્ષ્યામિ ષોડશાધ્યાયગૌરવમ્ ।
આકર્ણય કુરંગાક્ષિ હર્ષોત્કંઠપ્રવર્ષિણિ

અસ્તિ સૌરાષ્ટ્રિકં નામ્ના પુરં ગુર્જરમંડલે ।
તત્રાસીત્ખઙ્ગબાહુશ્ચ રાજા ચંદ્ર ઇવાપરઃ

યદીય કુસુમામોદમાલાસુરભિતોદરે ।
વારાંનિધૌ હરિઃ સ્વાસ્થ્યાદશેત સહ પદ્મયા

યદીય કીર્તિકર્પૂરકણાભાંતિનભોંગણે ।
કીર્ણા વૈરિકૃતશ્વાસ મારુતૈસ્તારકાછલાત્

યસ્યાસિધારા તીર્થેષુ સ્નાતા વૈ રિપુભૂભુજઃ ।
વ્યાવર્ત્તં તે દિવોઽદ્યાપિ સ્વર્ગસ્ત્રીવાગ્વિમોહિતાઃ

તસ્યારિમર્દનોનામ મદહસ્તી મદોદ્ધુરઃ ।
મદાંબુધારા સલિલે ગુંજદ્ભ્રમરમંડલઃ

કપોલફલકોત્તીર્ણ મદધારાજલાવિલઃ ।
બભૌ યો નિર્ઝરોદ્ગોરૈરંજનાદ્રિરિવાચ્ચકૈઃ

યસ્યાંગેષુ વ્યરાજંત ચામરાશ્ચંદ્રિકોજ્જ્વલાઃ ।
કિરણાઇવ શીતાંશોઃ પતિતાઃ કાનનોદરે

સિંદૂરપાંસુપટલી રાજત્કુંભસ્થલો બભૌ ।
યઃ સંધ્યાવારિદવ્યાપ્તં વિયત્ખંડમિવ સ્થિતમ્

સ કદાચિન્મોચયિત્વા શૃંખલાન્નિગડાનપિ ।
ભંક્ત્વા લૌહદૃઢસ્તંભં પ્રસહ્ય નિશિ નિર્ગતઃ

આધોરણગણાન્સર્વાન્પાર્ષ્ણિવિસ્ફૂર્જદંકુશાન્ ।
ક્રોધાદવગણય્યૈવ નિજશાલાં બભંજ સઃ

તીક્ષ્ણાંકુશમુખૈર્વિષ્વખન્યમાનોઽપિ વૈણવૈઃ ।
દંડૈસ્તુ ત્રાસયામાસુઃ સાદિનો ન મનાગપિ

તતો રાજા સમાગત્ય નિશમ્યેદં કુતૂહલમ્ ।
તત્ર હસ્તિકલાભિજ્ઞૈઃ સમં રાજકુમારકૈઃ

અદૃશ્યત સમાગત્ય રાજ્ઞા દંતાવલો બલી ।
મોહયન્નુદ્ભટાટોપો હૃતાટ્ટાલિકમાલિકઃ

દદૃશુસ્તં મહાભીમં પૌરા દૂરતરં સ્થિતાઃ ।
ગોપાયંતઃ શિશૂન્ભીત્યા નિવૃત્તાન્યકુતૂહલાઃ

રુદ્ધેષુ તત્ર માર્ગેષુ પલાયનપરૈર્જનૈઃ ।
વાસિતેષુ તદીયોગ્રદાનધારાંબુસીકરૈઃ

સ્નાત્વા તેનાધ્વના યાતઃ સરસઃ કશ્ચન દ્વિજઃ ।
ગીતાનાં ષોડશાધ્યાયશ્લોકાન્કતિપયાઞ્જપન્ ૧૭ ભગવદ્ગીતા।દૈવાસુરસમ્પદ્વિભાગયોગઃ।
નિષિદ્ધ્યમાનો બહુધા પૌરૈરાધોરણૈરપિ

અમન્યમાનઃ કરિણો ભીતાન્ચલિતવાંસ્તતઃ ।
ફૂત્કારેણ સ આવૃણ્વઞ્જનાન્વિપરિમર્દયન્

સ્પૃશન્દાનાંબુજં તસ્ય સ્વસ્તિમાન્નિર્ગતો દ્વિજઃ ।
તતો મહાનભૂત્તત્ર વિસ્મયો વાગગોચરઃ

માનસે ભૂમિપાલસ્ય પૌરાણામપિ પશ્યતામ્ ।
સમાહૂય તતો રાજા ફુલ્લરાજીવલોચનઃ

તમાપૃચ્છદ્દ્વિજં વાહાદવતીર્ય પ્રણમ્ય ચ

રાજોવાચ-
અલૌકિકમિદં વિપ્ર ત્વયાદ્યાચરિતં મહત્ ।
કૃતાંતકલ્પાદેતસ્માત્કથં નિર્યાતવાન્ગજાત્

કમર્ચયસિ ગીર્વાણં કં મંત્રં જપસિ પ્રભો ।
કા ચ સિદ્ધિસ્તવાસ્તીતિ દ્વિજન્મન્સમુદીરય

દ્વિજ ઉવાચ ।
ગીતાયાઃ ષોડશોધ્યાયઃ શ્લોકાન્કતિપયાનહમ્ ।
જપામિ પ્રત્યહં ભૂપ તેનૈતાઃ સર્વસિદ્ધયઃ

તતો વિહાય દ્વિરદં કૌતૂહલરસં નૃપઃ ।
આજગામ દ્વિજન્માનમાદાય નિજમંદિરમ્

શુભં મુહૂર્તમન્વીક્ષ્ય તોષયિત્વા દ્વિજોત્તમમ્

સુવર્ણૈર્લક્ષ્યસંખ્યાકૈર્ગીતામંત્રમુપાદદે ।
ગીતાયાઃ ષોડશાધ્યાયશ્લોકાન્કતિપયાનપિ

સમભ્યસ્ય તતો રાજા સત્કારેણ સકૌતુકઃ ।
અથૈકદા વિનિર્ગત્ય બાહ્યાલીં સહ સૈનિકૈઃ

તમેવામોચયદ્રાજા મત્તમાધોરણાદ્ગજમ્ ।
વિસ્પષ્ટમિતિ વાક્યાનિ રાજ્યસૌખ્યમમાનયન્

તૃણવજ્જીવિતં રાજા ગજસ્યાગ્રેવિશત્તતઃ ।
આદાય ગંડફલકં મદપંક્તિનિરંકુશમ્

આયયૌ મંત્રિવિશ્વાસાન્નૃપઃ સાહસિકાગ્રણીઃ ।
રાહોરિવ મુખાદિંદુઃ કાલાસ્યાદિવ ધાર્મિકઃ

સાધુઃ ખલસ્ય વદનાન્નૃયોનિરગમદ્ગજાત્ ।
આગત્ય નગરં રાજા ત્વભિષિચ્ય કુમારકમ્

ગીતાયાઃ ષોડશાધ્યાયાદવાપ પરમાં ગતિમ્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરંખડે ગીતામાહાત્મ્યે નવત્યધિકશતતમોઽધ્યાયઃ