Padma Purana · Chapter 6.177

śrībhagavānuvāca/
janasthāne jaḍo nāma dvijanmā kauśikānvayī /
hitvā jātyucitaṃ dharmaṃ vaṇigvṛttyāṃ mano dadhe

vyasanī paradāreṣu dīvyannakṣaiḥ pibanmadhu /
mṛgayā nirato nityaṃ kālamevaṃ nināya saḥ

kṣīṇe vitte tato rātrau cauryāmārabdhavāṃstataḥ /
pratipede dhanaṃ tena yajvanāṃ yaṣṭumarthinām

sa dūramagamattena vāṇijyāyottarāṃ diśam /
kastūrimaguruṃ kṛṣṇaṃ cāmarāṃścaṃdrikojjvalān

gṛhītvā vṛtya cāninye paṃcaṣādadhvayojanāt /
athāparasminnahani priyādarśanadohani

dūramadhvānamullaṃghya ravāvastamite sati /
dhvāṃte prasarpati svairaṃ diśo daśa tarostale

gato vaśaṃ sadasyūnāṃ nijaghne taiśca satvaram /
dharmalopādasau jajñe ghoraścogrataro grahaḥ

pipāsito bubhukṣārto lelihānaśca sṛkkiṇī /
urdhvakeśo'tijaṃghāluḥ pṛṣṭalagnodaro mahat

asthimātraśarīro'bhūddurvṛttanayano bhṛśam /
atrāṃtare sutastasya dharmātmā vedakovidaḥ

paryapālayadatyarthaṃ didṛkṣustaṃ tadāgamat /
nityamanveṣayanvārttāṃ pāṃthebhyo nopalabdhavān

tataḥ kadācidāyāte sahāyini ca mānave /
tasmādviditavṛttāṃtaḥ śuśoca pitaraṃ bahu

tato vimṛśya medhāvī cikīrṣuḥ pāralaukikam /
vārāṇasīṃ sasaṃbhāraḥ sa gaṃtumupacakrame

mārge nivāsānsaptāṣṭau nītvā tasya tarostale /
saṃdhyāṃ pracakrame kartuṃ yatrāsya nihataḥ pitā

tatrādhyāyaṃ sa gītānāṃ tṛtīyaṃ saṃjajāpa ha /
tato ghorasvarastatra vyomamadhye parāmṛśat

dadarśa ghoramākāśātpataṃtaṃ pitaraṃ tataḥ /
vismayena bhayenāpi vikalīkṛtacetanaḥ

tejasā bhūyasā vyāptamāluloke puro'mbare /
kiṃkiṇīkoṭisaṃkīrṇaṃ tejasā vyāptadiṅmukham

vimānamagrato'paśyaddivyamadhyagracetanaḥ /
tatrāpaśyatsamārūḍhaṃ divyābhiḥ strībhirāvṛtam

saṃstūyamānaṃ munibhiḥ pitaraṃ pītavāsasam /
praṇatastaṃ samālokya yuyuje tena cāśiṣā

tato'pṛcchadidaṃ vṛttaṃ sa ca tasmai nyavedayat /
dustyajātkarmaṇo vatsa vapuṣo puṇyakāraṇāt

mocito'smi tvayā daivādadhyāyaṃ japatāṃtike /
tannivarttasva japataḥ sāṃprataṃ tvāmupasthitam

vārāṇasīṃ yadarthaṃ yattadanuṣṭhitamātmanaḥ /
śrībhagavānuvāca/
evamuktaḥ sa ca prāha pitaraṃ dīptatejasam

suta uvāca/
hitaṃ mamānuśādhi tvaṃ kāryamanyanmayānu kim /
śrībhagavānuvāca/
tataḥ prāha pitā putraṃ kāryametattvayānagha

yanmayācaritaṃ karma bhrātrā mama tu tatkṛtam /
sa yāto narakaṃ ghoraṃ taṃ mocayitumarhasi

anye madanvaye ye vai nirayaṃ pratipedire /
te ca mocayitavyāste iti me'sti manorathaḥ

ityevamuktaḥ putrastaṃ punaḥ prāha kṛtāṃjali /
karmaṇā kena tānsarvānmocayāmi tadādiśa

evaṃ nivedito vākyaṃ pitā sutamuvāca ha /
pitovāca/
yenāhaṃ mocito vatsa tadanuṣṭhātumarhasi

anuṣṭhāya tadutpannaṃ tebhyaḥ puṇyaṃ samutsṛja /
tato'hamiva te sarve pūrve saṃtyajya yātanām

gamiṣyaṃtyacireṇaiva tadviṣṇoḥ paramaṃ padam /
sa saṃdiṣṭovadatputro yadyevaṃ tāta nārakān

sarvānapi vimokṣyāmi yadi te rocate vacaḥ /
evamastu śivaṃ bhūyādupapannaṃ mahatpriyam

ityādiśya pitā putraṃ yayau viṣṇoḥ paraṃ padam /
so'pi tasmātparāvṛttya janasthānaṃ prapadya ca

suṃdarasya puraḥ śaureścālaye kālamabhyagāt /
sa kurvāṇoḥsamādīni pitrā ca yadudīritam

utsasarja kṛtaṃ puṇyaṃ mocayiṣyansa nārakān /
atrāṃtare pade viṣṇoryātanāpadamīyuṣaḥ

nārakānmocayiṣyaṃtaḥ kiṃkarā yamamabhyayuḥ /
tena te pūjitāḥ sarve satkriyābhiranekadhā

kuśalaṃ paripṛṣṭāste sarvataḥ sukhamūcire /
emaṃ satkṛtya medhāvī pitṛloka maheśvaraḥ

hetumāgamane pṛcchatte ca tasmai nyavedayan /
viddhi kīnāśanātha tvaṃ śeṣaparyaṃkaśāyinā

śauriṇā prahitānasmānsamādeṣṭuṃ tvadaṃtike /
asmanmukhena devastvāṃ kuśalaṃ paripṛcchati

nārakānprāṇinaḥ sarvānvimoktuṃ ca niyacchati /
ityākarṇya samādiṣṭaṃ viṣṇoramitatejasaḥ

na tena mūrdhnā saṃbhāvya dadhyau kiṃcana cetasā /
vimuktānnirayātsarvāṃstānvilokya madotkaṭān

sa tairanugataḥ sarvairviṣṇorāyatanaṃ tataḥ /
yayau sa varayānena yatrāste dugdhavāridhiḥ

tadaṃta uditānekasūryakoṭisamaprabham /
iṃdīvaradalaśyāmamāluloka jagadgurum

śayyāphaṇiphaṇāratnamarīcyāmiśratejasam /
vilokyamānamānaṃdanirbharaṃ prītamānasam

bhāvānugairdṛgālīkaiḥ śriyā premṇekṣitaṃ muhuḥ /
yogibhiḥ parito juṣṭaṃ dhyānaniṣpaṃdatārakaiḥ

stūyamānaṃ maheṃdreṇa parājetuṃ virodhinaḥ/
āmnāyavacasāmaṃte brahmaṇo niḥsṛtairmukhāt

mūrtimadbhirvacobhiśca gīyamānaṃ guṇotkaram /
saṃprītaṃ cāpyudāsīnamapi sarvāsu yoniṣu

yogasaṃcitapuṇyānāṃ yaugapadyena jaṃtuṣu /
vilokamānamātmānamakhilaṃ sacarācaram

āmodyannamālokairātmānaṃ dīptipūritaiḥ /
ābibhrāṇaṃ vapurvyāpi dyotitaṃ bhoginasviṣā

iṃdīvaradalaśyāmaṃ jyotsnayeva nabhastalam /
vilokya taṃ sa tuṣṭāva dhiyā bahulayānataḥ

yama uvāca/
namaḥ samastanirmāṇanirmalībhūtacetase /
vada nodgīrṇavedāya viśvarūpāya vedhase

balavegasudurddharṣa dānaveṃdra madadruhe /
namaḥ sthitau ca satvāya viśvādhārāya viṣṇave

namaḥ pātakasaṃghāta jiṣṇave'khiladehinām /
īṣadunmīlallālāṭanetrāgniprabhavārciṣe

tvaṃ hi sarvasya lokasya gururātmā maheśvaraḥ /
visṛjya vaiṣṇavānsarvānatastvamanukaṃpase

vyāpayannakhilaṃ lokaṃ māyayā paribṛṃhitam /
na tayā paribhūto'si na ca tatprabhavairguṇaiḥ

aṃtarāvartamāno'pi na tābhyāmabhibhūyase /
dṛśā viṣayavartinyā nigrahītamanā api

tayā phalābhigāminyā ātmanyevābhilīyase /
na tavāsti mahimnoṃto yathā niravadhiḥ svayam

maunamevātrayuktaṃ me viṣayo'si kathaṃ girām /
iti stutvā tato vākyamidamāha kṛtāṃjali

viniyogādamī yuktā dehino nirguṇā mayā /
samādiśa yadanyanme kāryamasti jagadguro

iti vijñāpitastena tamāha madhusūdanaḥ /
meghagaṃbhīrayā vācā siṃcanniva sudhārasaiḥ

pāpāduddhārya te loko mayā samayavartinā /
tvayi vinyastabhāro'haṃ nānuśocāmi dehinaḥ

tadācara nijaṃ karma prayāhi svaṃ niketanam /
śrībhagavānuvāca/
ityuktvāṃtardadhe devaḥ so'pi svapuramāyayau

so'pi svajātijānsarvānnirayasthānanekaśaḥ /
uddhṛtya varayānena viṣṇulokaṃ yayau svayam

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe gītāmāhātmye saptasaptatyadhikaśatatamo'dhyāyaḥ