Padma Purana · Chapter 6.178

śrībhagavānuvāca/
caturthasyāpi māhātmyamākhyāsyāmyadhunā śṛṇu /
badarītvaṃ samutsṛjya yena kanye divaṃ gate

śrīruvāca/
kathaṃ kanye divaṃ yāte badarītvaṃ visṛjya vai /
te kacāstāṃ purā deva kathaṃ prāpte tu mukhyatām

etadveditumicchāmi nātha vaktuṃ tvamarhasi /
na tu tṛpyāmi śṛṇvaṃtī paramāṃ ca kathāmimām

śrībhagavānuvāca/
asti bhāgīrathī tīre nāmnā vārāṇasī purī /
bharato nāma yuktātmā tatra viśveśvarālaye

nityamātmaratasturyaṃ japatyadhyāyamādarāt /
tadabhyāsādaduṣṭātmā na dvaṃdvairabhibhūyate

kāle kadācana krīḍanyayau sa nagarādbahiḥ /
upāṃtyavartino devāndidṛkṣuḥ sa tapodhanaḥ

viśaśrāma tayormūle badaryornyapatatphale /
upadhāya tayorekāmanyāmālaṃbya cāṃghriṇā

tapasvini tato yāte badaryośca tathārdvayam /
śuṣkaṃ niṣpatraśākhaṃ ca divasaiḥ paṃcaṣairabhūt

gṛhe kvacana viprāṇāṃ jajñāte kanyake tataḥ /
varddhamānaṃ tayoryugmaṃ saptabhiḥ parivatsaraiḥ

vihṛtya dūradeśebhyo yatimāyāṃta maikṣyata /
gṛhītvā caraṇau tasya vacaḥ sūnṛtamabravīt

tvatprasādādeva mune mocitaṃ dvaṃdvamāvayoḥ /
utsṛjya badarībhāvaṃ mānuṣyaṃ pratipadyate

evamukto munistābhyāṃ vismṛtaḥ pratyuvāca saḥ /
kadā vatse yuvāṃ kena hetunā mocite mayā

yuvayorbadarītve ca hetuṃ brūtāṃ na vedmyaham /
ūcatuḥ kanyake tasmai bādarye hetumātmanaḥ

ādau vimocane tasmāddustyajādapi kāraṇam /
asti godāvarī tīre tīrthaṃ puṇyapradaṃ nṛṇām

cchinnapāpamiti khyātaṃ parāṃ koṭimavāpayat /
tatra satyatapā nāma tapastepe sudāruṇam

grīṣme mahati dīptānāṃ madhyago jātavedasām /
varṣāsu jaladhārābhirnityamāsiktamūrddhajaḥ

śiśire ca vasannapsu bibhratkaṃṭakitāṃ tanum /
viśuddhaḥ satataṃ kāle tapastaptvā sa saṃyamī

ātmanyeva matiṃ cakre parāṃ prāpya sunirvṛtim /
sadā phalāni bibhratsu sāṃdracchāyeṣu śākhiṣu

nirmatsareṣu satveṣu badhvā prītiparāmapi /
tapaḥphalānusaṃdhāne vaiduṣyenopapāditam

brahmāpyenaṃ svayaṃ pṛcchannupatasthe tamanvaham /
tena saṃkocahīnatvādbrahyaṇyanugatenvaham

taddhyānānugatavyakti vavṛdhe tasya tattapaḥ /
vimuktakalpaṃ manvānaḥ samṛddhādātmanaḥ padāt

aṃtarāyaśataṃ cakre tato bhītaḥ puraṃdaraḥ /
āhūyāpsarasāṃ madhyādāvāṃ tulyaṃ samādiśat

kurutaṃ tattapovighnamanenācaritaṃ yuvām /
yo māṃ padādavaṣṭabhya svarājyaṃ bhoktumicchati

iti saṃdeśamāpanne purastācca biḍaujasaḥ /
godāvarīmagacchāvaḥ sa muniryatra vartate

mṛdaṃgairmaṃdagaṃbhīrairveṇubhiḥ kalavādibhiḥ /
kalaṃ gītaṃ samārabdhaṃ tanvaṃgībhiḥ samanvitam

udvahaṃtyau pṛthuśroṇīṃ ghanapīnapayodhare /
smayasmeramukhāṃbhoje kiṃcidākuṃcitālake

maṇikuṃḍaladṛṣṭāṃse puṃḍarīkojjvalekṣaṇe /
tanumadhye suvṛttoru vahaṃtyau ca same pade

ānartāṃ yo vanasyārthe svaratālalayānugām /
darśayaṃtyau svataḥ kṛtsnāṃ gatiṃ bhāvānugāminīm

mṛdūpakramamutpannaṃ maṃdaṃ maṃdaṃ vivarddhanam /
garjayāmāsa dikcakraṃ tattayornṛtyamānayoḥ

tatoṃgahāravegena vāyurvāsaḥ suśītalaḥ /
īṣaducchvasite caile darśayaṃtyau payodharau

udvardhayaṃtī kaṃdarppamulbaṇā gatirāvayoḥ /
kopamutpādayāmāsu mune ravikṛtātmanaḥ

tataḥ śāpaṃ dadau kopājjalamutsṛjya pāṇinā /
badarītvaṃ prapadyethāṃ jāhnavī rodhasīti nau

āvābhyāṃ pārataṃtryeṇa yadduścaritamāsthitam /
tatkṣamasva vinamrābhyāṃ muniḥ paścātprasāditaḥ

tataḥ śāpavimokṣaṃ nau kalpayāmāsa puṇyadhīḥ /
bharatāgamanāṃtoyamiti satyatayā muniḥ

martyeṣu janmalābhaśca smṛtiścātītajanmanām /
āvayoraṃtikaṃ gatvā badarībhūtayostataḥ

smaratā turyamadhyāyaṃ bhavatā niṣkṛtiḥ kṛtā /
tattāvatpraṇamāvastvāṃ śāpādeva na kevalāta

ghorādeva tu saṃsārāttvayaitena vimocite /
śrībhagavānuvāca/
evamukto munistābhyāmatiprītamanāstataḥ

pūjitaste samāmaṃtrya yathāgatamasau yayau /
kanye caturthamadhyāyaṃ japetāṃ nityamādarāt

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe gītāmāhātmye aṣṭasaptatyadhikaśatatamo'dhyāyaḥ

bhagavadgītāyāḥ caturthodhyāyaḥ(jñānakarmasaṃnyāsayoga)