Padma Purana · Chapter 6.174

mahādeva uvāca/
śṛṇu devi pravakṣyāmi vrataṃ trailokyadurlabham /
yaṃ śrutvā mucyate loko brahmahatyādipātakāt

utpatiḥ svaprakāśasya bhaktānāṃ sukhahetave /
tithirvāpi samāso vai saṃjātaḥ puṇyakārakaḥ

yasya nāma gṛṇandevi muktiṃ labhati śāśvatīm /
sa eva paramātmā ca kāraṇānāṃ ca kāraṇam

viśvātmā viśvarūpī ca sarveṣāṃ bhagavānprabhuḥ /
dvādaśārkā dhṛtā yena nṛsiṃhena mahātmanā /
sa eva prakaṭījāto bhaktānāṃ śamabhīpsayā

pārvatyuvāca/
avatārā hyasaṃkhyātāḥ kathitāḥ surasattama /
nṛsiṃhākhyaṃ paraṃ dhāma vada viśveśvara prabho /
yena vijñānamātreṇa sukha lokamavāpnuyāt

mahādeva uvāca/
hiraṇyakaśipuṃ hatvā devadevaṃ jagadgurum /
sukhāsīnaṃ tadutsaṃge sthito vacanamabravīt

prahlādo jñānināṃ śreṣṭhaḥ pitṝhaṃtāramuttamam

prahlāda uvāca/
namaste bhagavanviṣṇo nṛsiṃhādbhutarūpiṇe /
tvadbhaktohaṃ suraśreṣṭha tvāṃ pṛcchāmi ca tatvataḥ

svāmiṃstvayi mamābhinnā bhaktirjātā hyanekadhā /
kathaṃ te'haṃ priyo jātaḥ kāraṇaṃ vada me prabho

nṛsiṃha uvāca/
kathayāmi mahāprājña śṛṇuṣvaikāgramānasaḥ /
bhakteryatkāraṇaṃ vatsa priyatvasya ca yatpunaḥ

purā kasya dvijasyāpi jātastvaṃ nāpyadhītavān /
nāmnā tu vasudevo hi veśyāyāmati laṃpaṭaḥ

tasminjanmani naivaṃ ca cakāra sukṛtaṃ kiyat /
bhuktvā madhu ghṛtaṃ caiva veśyāsaṃgamalālasaḥ

madvratasya prabhāvena bhaktirjātā tavānagha /
prahlādovāca/
vistarādvada deveśa kasya putrasya kiṃ vratam

veśyāyāṃ vartamānena kathaṃciddhi kṛtaṃ mayā /
mamopari kṛpāṃ kṛtvā sarvaṃ kathaya sāṃpratam

nṛsiṃha uvāca/
sṛṣṭyarthaṃ tu purā brahmā cakre hyetadanuttamam /
madvratasya prabhāvena nirmitaṃ sacarācaram

īśvareṇa vrataṃ cīrṇaṃ vadhārthaṃ tripurasyaca /
vratasyāsyaprabhāvena tripurastu nipātitaḥ

anyaiśca bahubhirdevairṛṣibhiśca purātanaiḥ /
rājabhiśca mahāprājñairvihitaṃ vratamuttamam

vratasyāsya prabhāvena sarve siddhimavāpnuyuḥ /
mama te vai priyā jātā divi bhogānanekaśaḥ

bhuktvā mayi vilīnāstu prahlāda tvaṃ viśasva mām /
kāryārthamavatāraste maccharīratpṛthagyataḥ

na teṣāṃ punarāvṛttirmahākalpaśatairapi /
daridro labhate lakṣmīṃ dhanadasya ca yādṛśī

tataḥ kāmī labhetkāmaṃ rājyārthī rājyamuttamam /
āyuṣkāmo labhedāyuryādṛśaṃ ca śivasya hi

avaidhavyakaraṃ strīṇāṃ putradaṃ bhāgyadaṃ tathā /
dhanadhānyakaraṃ caiva tathāśokavināśanam

striyo vā puruṣā vāpi kurvaṃti vratamuttamam /
tebhyo dadāmyahaṃ saukhyaṃ bhukti mukti phalaṃ tathā

bahunoktena kiṃ vatsa vratasyāsya phalasya hi /
madvratasya phalaṃ vaktuṃ nāhaṃ śakto na śaṃkaraḥ

prahlāda uvāca/
bhagavaṃstvatprasādena śrutaṃ vratamanuttamam /
vratasyāsya phalaṃ śrotuṃ tvayi me bhakti kāraṇam

adhunā śrotumicchāmi vratasyāsya vidhiṃ param /
kasminmāse bhavedeva kasmiṃścidvāsare prabho

etadvistarato deva vaktumarhasi sāṃpratam /
vidhinā yena vai svāminsamagraphalabhāgbhavet

nṛsiṃha uvāca/
prahlāda vatsa bhadraṃ te śṛṇuṣvaikamanā vratam /
vaiśākhesita pakṣe tu caturdaśyāṃ samācaret

mamāvirbhāvasaṃyuktaṃ mama saṃtuṣṭikāraṇam /
śṛṇu putra mamotpattiṃ bhaktānāṃ sukhahetave

paścimāyāṃ diśāyāṃ ca saṃjātaṃ kāraṇāṃtarāt /
maulistānamidaṃ kṣetraṃ pavitraṃ pāpanāśanam

tasminkṣetre tu vikhyāto brāhmaṇo vedapāragaḥ /
hārīta iti nāmnā ca jñānadhyānaparāyaṇaḥ

tasya strī tu mahāpuṇyā satīrūpā sadā prabho /
līlāvatī tu nāmnā ca bharturvaśaparā sadā

tābhyāṃ tapo mahattaptaṃ kālaṃ bahutaraṃ suta /
ekaviṃśayugāścaiva yātāstatra na saṃśayaḥ /
tasminkṣetre tu vai tābhyāṃ pratyakṣo vābhavattadā

nṛsiṃha uvāca/
yaṃ yaṃ vāṃchayase brahmaṃstaṃ dadāmi na saṃśayaḥ /
tābhyāmuktaṃ tadā tasmai dīyate cedvaro mama

tvādṛśo mama putrastu hyadhunaiva bhavatviti /
mayoktaṃ tu tadā vatsa putro'haṃ te na saṃśayaḥ

viśvakarmā hyahaṃ sākṣātparamātmā parātparaḥ /
udare'haṃ na vatsyāmi yato'haṃ vai sanātanaḥ

hārītena tadā coktaṃ bhavatvevaṃ na saṃśayaḥ /
tadāprabhṛti vai kṣetre sthito'haṃ bhaktakāraṇāt

atrāgatya prakurvīta darśanaṃ bhaktasattamaḥ /
tasyāhaṃ sakalāṃ bādhāṃ nāśayāmi niraṃtaram

etasmātkāraṇāccaiva vrataṃ vai vidhipūrvakam /
ye kurvaṃti naraśreṣṭhā na teṣāṃ vidyate bhayam

bālarūpamayaṃ dhyātvā tābhyāṃ saha viśeṣataḥ /
pūjanaṃ kurute rātrau sa vai nārāyaṇo bhavet

caturbhujaṃ mahādaṃṣṭraṃ kālarūpaṃ durāsadam /
sūryakoṭipratīkāśaṃ yamakoṭidurāsadam /
siṃhavacca mukhaṃ yasya naravaccāṃgasaṃyutam

śrīnṛsiṃhaṃ divyasiṃhaṃ kālarūpaṃ bhajetsadā /
evaṃ jñātvā viśeṣeṇa yaḥ sthānaṃ māmakaṃ vrajet

vrataṃ pavitraṃ paramaṃ śrīkadaṃba pradaṃ mahat /
aṃte muktipradaṃ caiva bhaktānāṃ ca na saṃśayaḥ

yena vai kriyamāṇena sahasradvādaśī phalam /
svātī nakṣatra saṃyoge śanivāre tu madvratam

siddhiyogasya saṃyoge vaṇije karaṇe tathā /
yogaiḥ sarvaiśca saṃyogaṃ hatyākoṭi vināśanam

etadanyatarairyoge maddinaṃ pāpanāśanam /
vijñāya maddinaṃ yastu laṃghayetsa tu pāpakṛt

akarttā narakaṃ yāti yāvaccaṃdra divākarau /
prāpte mama dine vatsa daṃtadhāvanapūrvakam

mamāgre vratasaṃkalpaṃ madbhakto vijiteṃdriyaḥ /
adyāhaṃ te vidhāsyāmi vrataṃ nirvighnatāṃ naya

vratasthena na karttavyaṃ duṣṭasaṃbhāṣaṇādikam /
tato madhyāhnasamaye nadyādau vimale jale

gṛhe vā devakhāte vā taḍāge vātha śobhane /
vaidikena tu maṃtreṇa snānaṃ kuryādvicakṣaṇaḥ

mṛttikā gomayenaiva tathā dhātrīphalena ca /
tilaiśca vidhivatsnāyātsarvapāpaugha śāṃtaye

paridhāya śubhe vastre nityakarma samārabhet /
tato gṛhaṃ vilipyātha kuryādaṣṭadalaṃ śubham

kalaśaṃ tatra saṃsthāpya tāmraṃtrasamanvitam /
tasyopari nyasetpātraṃ taṃḍulaiḥ paripūritam

haimīṃ ca tatra manmūrti sthāpya lakṣmyā samanvitām /
nirmāya śaktyā svarṇena snāpya paṃcāmṛtaistataḥ

tato brāhmaṇamāhūya ācāryaṃ nātilolupam /
śāstrajñamagrataḥ kṛtvā tato devaṃ samarcayet

maṃḍapaṃ kārayettatra puṣpastabaka śobhitam /
ṛtukālodbhavaiḥ puṣpaiḥ pūjyo'haṃ ca yathāvidhi

upacāraiḥ ṣoḍaśabhirmaṃtrairniyamaiśca yaḥ /
tataḥ paurāṇikairmaṃtraiḥ pūjanīyo viśeṣataḥ

caṃdanaṃ ca sakarpūraṃ ghanakuṃkumamiśritam /
kālodbhavāni puṣpāṇi tathā tulasīdalāni ca

śrīnṛsiṃhāya yo dadyātsa mukto nātra saṃśayaḥ /
kṛṣṇāgurumayaṃ dhūpaṃ sarvadā harivallabham

haraye gurave dadyātsarvakāmārthasiddhaye /
mahādīpaḥ prakarttavyo hyajñānadhvāṃta nāśanaḥ /
mahānīrājanaṃ kuryādghaṃṭānāda puraḥsaram

naivedyaṃ śarkarāṃ cāpi bhakṣyabhaujyasamanvitam /
dadāmi te ramākāṃta sarvapāpakṣayaṃ kuru

naivedya maṃtra/
nṛsiṃhācyuta deveśa tava janmadine śubhe /
upavāsaṃ kariṣyāmi sarvabhogavivarjitaḥ

tena prīto bhava svāminpāpaṃ janma nirākuru /
rātrau jāgaraṇaṃ kāryaṃ gītavāditra niḥsvanaiḥ

purāṇapaṭhanaṃ nityaṃ śrīnṛsiṃkathāśrayam /
tataḥ prabhātasamaye snānaṃ kṛtvā hyanaṃtaram

pūrvoktena vidhānena pūjayenmāṃ pratarpayan /
vaiṣṇavaṃ kārayecchrāddhaṃ madagre svasthamānasaḥ

tato dānāni deyāni vakṣyamāṇāni yānyuta /
pātrebhyaḥ sa dvijebhyo hi lokadvaya jigīṣayā

sahasvarṇamayo devo mama saṃtoṣakārakaḥ /
gobhūtilahiraṇyādi pradadāti dvijātaye

śayyā satūlikā deyā saptadhānyasamanvitā /
anyāni ca yathāśaktyā deyāni nijaśaktitaḥ

vittaśāṭhyaṃ na kurvīta yathoktaphalakāṃkṣayā /
brāhmaṇānbhojayetpaścāttebhyo dadyātsudakṣiṇām

nirdhanairapi karttavyaṃ deyaṃ śaktyanusārataḥ /
sarveṣāmeva varṇānāmadhikāro'sti madvrate /
madbhaktaistu viśeṣeṇa karttavyaṃ matparāyaṇaiḥ

tataḥ prārthanā maṃtraḥ /
madvaṃśe yena rājā tā ye bhaviṣyāśca mānavāḥ /
tānuddharasva deveśa duḥkhadādbhavasāgarāt

pātakārṇavamagnasya vyādhibhiścāṃbucāribhiḥ /
jīvaistu paribhūtasya mahāduḥkhagatasya me

karāvalaṃbanaṃ dehi śeṣaśāyī jagatpate /
vratenānena deveśa bhuktimuktiprado bhava

evaṃ prārthya tato devaṃ visṛjya ca yathāvidhi /
upahārādikaṃ sarve ācāryāya nivedayet

dakṣiṇābhiśca saṃtoṣyā brāhmaṇāṃśca visarjayet /
mama dhyāna samāyukto bhuṃjīta saha baṃdhubhiḥ

akiṃcanopi niyatamupoṣyati caturdaśīm /
sapta janma kṛtātpāpānmucyate nātra saṃśayaḥ

ya idaṃ śṛṇuyādbhaktyā vrataṃ pāpapraṇāśanam /
tasya śravaṇamātreṇa brahmahatyāṃ vyapohati

pavitraṃ paramaṃ guhyaṃ kīrtayedyastu mānavaḥ /
sarvakāmānavāpnoti vratasyāsya phalaṃ sadā

ya idaṃ kurute śaktyā kāle madhyāhna saṃjñake /
līlāvatyā saha ṛṣiṃ śrīnṛsiṃha prasādataḥ

pūjayetparayā bhaktyā muktiṃ prāpnoti śāśvatīm /
tasminkṣetre tu yo gatvā śrīnṛsiṃhaṃ prapūjayet

vāṃcchitaṃ labhate nityaṃ śrīnṛsiṃha prasādataḥ /
śrīnṛsiṃha mahadrūpa kālakoṭidurāsada

bhairaveśa harārtighna bālarūpa namostu te /
śrīnṛsiṃhāya rūpāya bālāya bālarūpiṇe

vyāpakāya sunaṃdāya svātmaprakaṭa rūpiṇe /
sarvajīvātmakāyaiva viśveśāya svarātmane

mārtaṃḍa maṃḍalasthāya dayāsiṃdho namostu te /
caturviṃśasvarūpāya kālarudrāgnirūpiṇe

jagadekasvarūpāya nṛsiṃhāya namostu te /
bhāle dadhāra yo devo nṛsiṃho vīrabhadra jit

dvādaśādityabiṃbāni sutaptāni pramāṇataḥ /
tatra siṃdhu mahāpuṇyā nadī ramyā viśeṣataḥ

tasyāḥ samīpe nagaraṃ varttate'dyāpi suṃdari /
maulistāneti vikhyātaṃ sarvadā devanirmitam

vasatirvarttate tatra hārītasya mahātmanaḥ /
līlāvatī tu tatraiva tiṣṭhate nātra saṃśayaḥ

pratiśabdo bhavettatra siṃdhunadyāḥ samīpataḥ /
kalau yuge tu saṃprāpte mlecchā vai pāpacāriṇaḥ

nivasaṃti tu tatraiva bahavo nātra saṃśayaḥ /
nṛsiṃhajanmani yathā śabdo'bhūdadbhutaḥ paraḥ

nṛsiṃheti nṛsiṃheti ya uccairnadate naraḥ /
tādṛśaḥ pratiśabdo vai jāyate naganaṃdini

brahmahā hemahārī vā surāpo gurutalpagaḥ /
siṃdhau gatvā viśeṣeṇa snānaṃ kurvaṃti ye janāḥ

mucyate nātra saṃdehaḥ śrīnṛsiṃha prasādataḥ /
daśārātripramāṇena mānavā ye vasaṃti hi

te jñeyāḥ puṇyakarmāṇo nāsatyaṃ māmakaṃ vacaḥ /
nivasaṃti kalau tatra varṇā ye dvijapūrvakāḥ

mlecchavatte'pi vijñeyā vedabāhyāḥ surottamaiḥ /
māṃsaṃ khādaṃti te tatra madyapānaṃ papuḥ sadā

ato hyadharmarūpāste pāpiṣṭhā nātra saṃśayaḥ /
saṃdhyāhīnā yathā viprā vedabāhyāstathaiva ca

nivasaṃti pure tasminpaścimāyāṃ sureśvari /
ekameva paraṃ tīrthaṃ nṛsiṃhākhyaṃ suvistaram /
yaṃ śrutvā mucyate pāpānnaraḥ sadyo na saṃśayaḥ

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe nṛsiṃhotpattirnāma catuḥsaptatyadhikaśatatamo'dhyāyaḥ