Padma Purana · Chapter 6.175

pārvatyuvāca/
bhagavansarvatatvajña śrīviṣṇostvatprasādataḥ/
śrutā nānāvidhā dharmā lokanistārahetavaḥ

adhunā śrotumicchami gītāmāhātmyamapyaham/
śrutena yena deveśa harau bhaktirvivarddhate/
tadvadasvādhunā deva yadyahaṃ tava vallabhā

īśvara uvāca/
atasīpuṣpasaṃkāśaṃ khageṃdrāsanamacyutam/
śayānaṃ śeṣaśayyāyāṃ mahāviṣṇumupāsmahe

kadācidāsane ramye sukhāsīnaṃ muradviṣam/
ānaṃdayitrī lokānāṃ lakṣmīḥ papraccha sādarāt

śrīruvāca/
śayālurasi dugdhābdhau bhagavankena hetunā/
udāsīna ivaiśvaryaṃ jagaṃti sthāpayanniva

īśvara uvāca/
iti devyā vacaḥ śrutvā murabhijjñānagarvitam/
uvāca ślakṣṇayā vācā vismayasmeralocanaḥ

śrībhagavānuvāca/
nāhaṃ sumukhi nidrālurnijaṃ māheśvaraṃ vapuḥ/
dṛśā tatvānuvarttinyā paśyāmyaṃtarnimagnayā

kuśāgrayā dhiyā devi yadaṃtaryogino hṛdi/
paśyaṃti yacca vedānāṃ sāraṃ mīmāṃsate bhṛśam

tadevamakṣaraṃ jyotirātmarūpamanāmayam/
akhaṃḍānaṃda saṃdoha niṣpādi dvaitavarjitam

yadāśrayā jagadvṛttiryanmayā cānubhūyate/
na yena rahitaṃ kiṃcijjagattatvaṃ carācaram

nirmathya bahudhālokya vedaśāstrāṃbudhiṃ sudhīḥ/
dvaipāyano yadāsādya gītāśāstraṃ nisṛṣṭavān

yadāsthāya mahānaṃdamānaṃdīkṛtamānasaḥ/
nidrāluriva deveśi dugdhābdhau pratibhāmi vai

iti tasya murārātermitamānaṃdavadvacaḥ/
sā harṣotphullalolākṣī lakṣmī śrutvā visismire

śrīruvāca/
bhavāneva hṛṣīkeśa dhyeyo'si yamināṃ sadā/
tasmāttvattaḥ paraṃ yattacchrotuṃ kautūhalaṃ hi me

carācarāṇāṃ lokānāṃ karttā harttā svayaṃ prabhuḥ/
yathāsthitastato'nyatvaṃ yadi māṃ bodhayācyuta

śrībhagavānuvāca/
māyāmayamidaṃ devi vapurme na tu tātvikam/
sṛṣṭisthityopasaṃhārakriyājālopabṛṃhitam

ato'nyadātmanorūpaṃ dvaitādvaitavivarjitam/
bhāvābhāvavinirmuktamādyaṃtarahitaṃ priye

śuddhasaṃvitprabhālābhaṃ parānaṃdaikasuṃdaram/
rūpamaiśvaramātmaikyagamyaṃ gītāsu kīrtitam

ityākarṇya vaco devi devasyāmitatejasaḥ/
śaṃkamānā ha vākyeṣu parasparavirodhiṣu

svayaṃ cetparamānaṃdamavāṅmanasagocaram/
kathaṃ gītā bodhayati iti me cchiṃdhi saṃśayam

īśvara uvāca/
śriyaḥ śrutvā vacoyuktamitihāsapuraḥsaram/
ātmānugāminīṃ dṛṣṭiṃ gītāṃ bodhitavānprabhuḥ

ahamātmā pareśāni parāparavibhedataḥ/
dvidhā tataḥ paraḥ sākṣī nirguṇo niṣkalaḥ śivaḥ

aparaḥ paṃcavaktro'haṃ dvidhā tasyāpi saṃsthitiḥ/
śabdārthabhedato vācyo yathātmāhaṃ maheśvaraḥ

gītānāṃ vākyarūpeṇa yannirucchidyate dṛḍhaḥ/
madīyapāśabaṃdho'yaṃ saṃsāraviṣayātmakaḥ

yadābhyāsaparādhīnau paṃcavaktramaheśvarau/
iti tasya vacaḥ śrutvā gītāsāramahodadheḥ

idaṃ paravibhedena budhyate bhavabhīrubhiḥ/
tamapṛcchadidaṃ lakṣmīraṃgapratyaṃgasaṃsthitam

māhātmyaṃ setihāsaṃ ca sarvaṃ tasyai nyavedayat/
śrībhagavānuvāca/
śṛṇu suśroṇi vakṣyāmi gītāsu sthitimātmanaḥ

vaktrāṇi paṃca jānīhi paṃcādhyāyānanukramāt/
daśādhyāyā bhujāścaika udaraṃ dvau padāṃbuje

evamaṣṭādaśādhyāyā vāṅmayī mūrtiraiśvarī/
vijñeyā jñānamātreṇa mahāpātakanāśinī

atodhyāyaṃ tadardhaṃ vā ślokamarddhaṃ tadardhakam/
abhyasyati sumedhā yaḥ suśarmeva samucyate

śrīruvāca/
suśarmā nāma ko deva kiṃ jātīyaḥ kimātmakaḥ/
kutastasya ca vai muktiḥ kenājāyata hetunā

śrībhagavānuvāca/
suśarmā nāma durmedhāḥ sīmā pāpātmanāmabhūt/
jāto nātmavidāṃ vaṃśe viprāṇāṃ krūrakarmaṇām

na dhyānaṃ na japo homo na caivātithipūjanam/
kevalaṃ viṣayeṣveva balāḍhyenābhivarttate

kṛṣikarmarato nityaṃ parṇajīvī surāpriyaḥ/
māṃsopahārī suciraṃ kālamevaṃ nināya saḥ

ānetukāmaḥ parṇāni paryaṭanṛṣivāṭikām/
tataḥ sa tatra daṣṭo'bhūtkālasarpeṇa mūḍhadhīḥ

kāladharmaṃ samāsādya gatvā ca nirayānbahūn/
punarāgatya martyeṣu balīvardatvamīyivān

paṃgunā kena vikrītaḥ sa svajīvanahetave/
nayanpṛṣṭhena śaradaḥ saptāṣṭau kaṣṭatonayat

kadācitpaṃgunāso'pi ciramāvartito javāt/
papāta tarasā bhūmau mūrcchāṃ ca pratipedivān

vikalāṃgo vivṛttākṣaḥ phenasaṃtatimudgiran/
na jīvati na mṛtyuṃ vā pratipede svakarmaṇā

kautukākṛṣṭaloke'smiṃstasminjanasamāgame/
śreyase tasya sukṛtī kaścitpuṇyaṃ vitīrṇavān

karmāṇi svānyanusmṛtya daduranye ca kecana/
gaṇikā kāpi tatrasthā lokayātrānuvartinī

ajñāta nijapuṇyā sā kiṃcidutsṛṣṭavatyabhūt/
paretanagarīmādau sa nītaḥ kālakiṃkaraiḥ

gaṇikādattapuṇyena puṇyavāniti mocitaḥ/
punarāgatya bhūrlokaṃ kulaśīlavatāṃ gṛhe

dvijanmanāmasau jajñe jātiṃ svāmanusaṃsmaran/
kāle mahati jijñāsuḥ śreyaḥ svājñānanodanam

upetya gaṇikāṃ dattaṃ khyāpayitvā sa pṛṣṭavān/
ācaṣṭa māṃ śuko nityaṃ paṃjarasthaḥ paṭhatyasau

tena pūtāṃtarātmāhaṃ tatpuṇyaṃ paryakalpayam/
tābhyāṃ śukastu pṛṣṭo'sau vyākhyātumupacakrame

ākhyāyikāṃ purāvṛttāṃ smṛtvā jātiṃ nijāmapi/
śuka uvāca/
purā vidvānahaṃ bhūtvā vaiduṣya smayamohitaḥ

rāgadveṣeṇa vidvatsu guṇavatsvapi matsarī/
kālenāhaṃ tataḥ pretya prāpya lokāñjugupsitān

so'haṃ kīrakule'bhūvaṃ sadgurāvatiniṃdakaḥ/
kāle dharmaṇi duṣkarmā pitṛbhyāṃ ca viyojitaḥ

nidāghe'dhvanisaṃtapte ānīto ṛṣipuṃgavaiḥ/
pātitaḥ paṃjarastho'haṃ māśrame mahadāśraye

āvartayadbhyo gītānāmādyamadhyāyamādarāt/
śrutvā ṛṣikumārebhyaḥ pāṭhaṃ cākaravaṃ muhuḥ

etasminnaṃtare kaścidvāguriścaurakarmakṛt/
māmāhṛtya tadākrīṇāditi vṛttamudāhṛtam

śrībhagavānuvāca/
adhyāyo'yaṃ purāmnāto yena pāpamanodayam/
pūtāṃtarātmā yenāsau mocitaśca dvijottamaḥ

evamanyonyamābhāṣya tanmāhātmyaṃ praśasya ca/
te japaṃtoniśaṃ dhīrā muktiṃ gehe prapedire

tasmādadhyāyamādyaṃ yaḥ paṭhate śṛṇute smaret/
abhyasettasya na bhavedbhavāṃbhodhirduruttaraḥ

/
iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe satīśvarasaṃvāde gītāmāhātmye paṃcasaptatyadhikaśatatamo'dhyāyaḥ