Padma Purana · Chapter 6.166

mahādeva uvāca/
vaidyanāthātparaṃ tīrthaṃ sarvasiddhipradāyakam /
tīrthānāmuttamaṃ tīrthaṃ devatīrthamanuśrutam

vibhīṣaṇādrākṣaseṃdrādgṛhītvā karamojasā /
prārabdho dharmaputreṇa rājasūyo mahākratuḥ

digjaye dakṣiṇe jāte nakulena hi pāṃḍunā /
sābhramatyāstaṭe devi pāṃḍurāryeti viśrutā

sthāpitā parayā bhaktyā bhuktimuktipradāyinī /
snātaḥ sābhramatītoye pāṃḍurāryāṃ namasya ca

aṇimādyā siddhayo'ṣṭau tathā medhāṃ mahīyasīm /
naraḥ prāpnoti vai nūnaṃ nātra kāryā vicāraṇā

pāṃḍurāryāṃ namaskṛtya śuddhabhāvena mānavaḥ /
saṃvatsarakṛtā pūjā dātavyā tattvabuddhibhiḥ

tatra tīrthe tanuṃ tyaktvā pāṃḍurāryāsamīpataḥ /
kailāsaśikharaṃ prāpya caṃḍeśvaragaṇo bhavet

purā hanūmatā tatra tapastaptaṃ suduṣkaram /
samudraplavane śaktirjātā tīrthaprabhāvataḥ

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe pāṃḍurāryātīrthaṃnāma ṣaṭṣaṣṭyadhikaśatatamo'dhyāyaḥ