Padma Purana · Chapter 6.165

mahādeva uvāca/
bhūtālayaṃ tato gacchettīrthaṃ pāpaharaṃ padam /
bhūtālayo vaṭo yatra yatra prācī tu caṃdanā

bhūtālaye naraḥ snātvā kṛṣṇāṣṭamyāmupoṣitaḥ /
yastu kṛṣṇatilāndadyānna sa preto'bhijāyate

pitṝnuddiśya yo dadyādudakuṃbhaṃ tilaiḥ saha /
pūrvajānpretabhāvātsa mocayennātra saṃśayaḥ

yasya nāmnā naraḥ snāti pretatvātsa vimucyate /
caturdaśyāmathāṣṭamyāṃ prabhāte vimalodake

tīrthe bhūtālaye snātvā dṛṣṭvā bhūtālayaṃ vaṭam /
bhūteśvaraprasādena bhūtebhyo na labhedbhayam

iti śrībhūteśvaratīrtham /
atastīrthātparaṃ tīrthaṃ ghaṭeśvaramiti smṛtam /
yatra snātvā tu taṃ dṛṣṭvā muktibhāgī bhaveddhruvam

yatra sābhramatī tīrthaṃ ghaṭo vai paramo mahān /
dṛṣṭvā caiva mahādevaṃ mucyate nātra saṃśayaḥ

tatra gatvā viśeṣeṇa plakṣapūjāṃ karoti yaḥ /
manasābhīpsitānkāmām̐llabhate mānavo bhuvi

iti ghaṭeśvaratīrtham /
tato gacchennaro bhaktyā vaidyanātheti viśrutam /
tatra snātvā narastīrthe śivapūjanatatparaḥ

pitṝnsaṃtarpya vidhinā sarvayajñaphalaṃ labhet /
vijayo devasaṃbhūtaḥ sarvapāpakṣayaṃkaraḥ /
yaṃ dṛṣṭvā vividhānkāmānprāpnuyuste narāḥ sadā

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe vijayītīrthamāhātmyaṃnāma paṃcaṣaṣṭyadhikaśatatamo'dhyāyaḥ