Padma Purana · Chapter 6.164

mahādeva uvāca/
atra tīrthaṃ mahaccānyatkaśyapākhyaṃ sureśvari /
yatra hrado mahānāsīnnagadeva vinirmitaḥ

tatra kuśeśvaro nāma devo yatra virājate /
yatra kuṃḍaṃ tathā ramyaṃ kaśyapena vinirmitam

tatra snātvā tu bho devi na naro nirayaṃ vrajet /
agnihotrakarā viprā nityaṃ vedaparāyaṇāḥ

nivasaṃti mahadevi kāśyapāyāṃ bahuśrutāḥ /
yathā kāśī tathā ceyaṃ nagarī ṛṣinirmitā

kāśyapena yataścātra taptaṃ bahutaraṃ tapaḥ /
gaṃgā vai tapasā yena ānīteśajaṭodbhavā

sā gaṃgā kāśyapī devi mahāpātakanāśinī /
yasyā darśanamātreṇa mucyaṃte duṣṭakilbiṣāt

godānaṃ ca praśaṃsaṃti rathadānaṃ tathaiva ca /
śrāddhaṃ kṛtvā tu tatraiva dānaṃ deyaṃ prayatnataḥ

kalau yuge tathā ghore mahāpātakanāśanam /
kaśyapākhyaṃ samaṃ tīrthaṃ na bhūtaṃ na bhaviṣyati

yatra vai devatāḥ sarvā ṛṣayo vītakalmaṣāḥ /
nityaṃ tiṣṭhaṃti deveśi tīrtharājaprasādataḥ

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe sābhramatīmāhātmye kaśyapahradamāhātmyaṃ nāma catuḥṣaṣṭyadhikaśatatamo'dhyāyaḥ